THIMTHU LE ZAILA GROUP  KHAMTANG LANU By- William Lhonga Madrid. (8731974334)  (PART-6)

THIMTHU LE ZAILA GROUP KHAMTANG LANU By- William Lhonga Madrid. (8731974334) (PART-6)

0
(0)

THIMTHU LE ZAILA GROUP

KHAMTANG LANU
By- William Lhonga Madrid.
(8731974334)

(PART-6)

Kamchenga houpi nom jongle, phat le nidan nin eitoh tahlou jehchun, kalungset Kimneova dingin SMS kajih in, hiti hin kathot tan ahi.

Kalungset pen Kimneo, kakho langu va kahin dalhah kajopa in anatna alel jeh in, gelphah louvin kouna o ahung gingtan, hijehchun nang dalha a vaikon dohtei ding chu kahitai. Nanga konna gam vangla jongleng, kalungsetnan na umpi jinge tivang hin sumil hihbeh in. Mitmu phah louna gammin umingting, Sangmol simjou louvin eikhen lhon jongle, chimlouvin songpi bangin dettah in pangjing hite o? Nao, ikimukit kahsen taonan khat le khat kigel dohto jing hite. Lhalam vah noiya ilelsa thimthu cheng lungin geldoh jing hitin, lungtup molso nadin, pangdet jing hite. Nang dalha a kavaikon doh dingthu nakomma kachenga kasei manlou jeh in, kalung anommo lheh e. Chule ikitepna banga Pathenni nilhahle vahchoila kasah khompi theilou ding tah jeh injong, phamo kasa lheh e. Boi, iba iloding ham? dammo chungchang ahijeh in, chelou thei kahipoi. Keima umthei tahih jongleng, nangin kipah tah in, Pathenni nilhah teng vahchoila hinsa maitan. Boi, kahin ngailheh in, kahin lhalel lheh jeng’e. Kalungset pen le ka itpen nangbou nahi. Nao, damsella kajotna munna, kaga vailhun theina din taonan neihin geldoh o. Nalungsetpen keima na Uthangcha.

Hitichun SMS kathot in, ahin jankhosot nung ahitah jehchun donbutna vang ahungpon ahi. Kalungsetpen Kimneo dalhah a, kavaikon doh dingchu kagelle kagelmo in, kaki gel gelnan jansot samang jong jalthei louvin, jingkho kavah lotan ahi. Jingkho ahung vah in, kapute kathou khang loijin, kakho langu va kaki nungle dingthu chu kaseipeh tan ahi. Kajopa dammo jeh a vaikon dohding kahi jehchun, eikham nom vangun eikham thei pouvin, hijehchun damsella kajotna mun kalhun theina din, eivailhah un, taona eiman peh jou un, kahung kipat doh pai2 tan ahi. Jingkah matah ahi jehchun koima athounai pon, jule va ten zaila a oigin tilou thildang gin akija pon, athip chet jengin ahi. Vangkhojol anguichet jengin ahile lunghel2 aummin, Kimneo toh somai nuiheuva katouna mun galla patna kamu chun, lunghel akai phongin, dalhah ahahsa lheh jengin ahi. Ahin kaki no loule Gari kalap lelding ahijehchun, dalhah ding hahsa lheh jongle, katou khomna munlhon kagal vet pummin, kache jingin ahi. Kamit a kamu phah channin kagal vet jingin, achetoh kathon ahile phat chomkhat jouvin, mit a muphah ahita pon ahi. Chuin hattah in lam kajot in, Gari lhaina Road chu kino tah in kadeltan ahi. Road kaphah chetle Garj khat ahung paijin, kenjong “akijen behseh jenge” katin, Gari chu kakham min, kahung toudoh pai2 tan ahi.

Phat chomkhat jouvin Diphu kaga lhungtan, chuin Train ngahto gommin, cha Hotel khat a kalut in chadon dingtin, cha kathum tan ahi. Cha donding katile kaphone ringtone ahung gingin, koiham? tia kavet le kalungset Kimneo ana hi in ahi. Chuin kenjong kapick loijin
Kei- Hello, nao jingkahpha.
Kimneo- Nangjong jingkahpha. Uthangcha hoilai naphah hitam?
Kei- Nao, tule lechun Diphu kapha bepme. Ipi nabol hitam?
Kimneo- Oh apha e. Imajong kabol hih e. Uthangcha kalung ahel valle eitin ahile lunghelna eiki pebe abangin, kiki nungle kitleh kanom jengin ahi. Chuin Kimneo jah a kaseiyin
Kei- Nao, keijong kalunghel mong mong’e. Kahin ngaidan jong alamdang’e.
Kimneo- Uthangcha itouna munho kavetle lungset set aummin, lunghel2 jong aumme. Kahin ngaina asandan atepi ding aumpoi eitin, kenjong donbut kitding kati laitah in, ka Chunnu in phone eihin bollin, hijehchun Kimneo jah a
Kei- Nao, ka Chunnun eihin phonne. Injole eini kihoukit nai hite o?
Kimneo- Henge Uthangcha akhohpoi. Damsellin najotna mun galhungin lang, nachun lejo toh melkim dellin gaki muto tan. In nalhun phatle neihin phone ta o?
Kei- Heng nao katin, kakoi pai2 in, ka Chunnu call chu pick kabol paitan ahi.

Kei- Hello, Henu ipi thu hitam?
Chunnu- Boi, Thangcha nahung hinam?
Kei- Henge henu, kahung’e. Ipi tiham?
Chunnu- Nahung ham? nahung louham? kahet nom jeh a, kahin phone nahi e. Boi, nahungle apha e. Tua chu hoilai mun nahin phah a, ipi nabol petham?
Kei- Henu, Diphu kahin phabep nalaijin, Hotel khat a chadon ding kati in, cha Hotel la katouve.
Chunnu- Boi, hung kino jep o. Napa in anat athoh lelval jeh in, nang nakouvin, nahol holle. Injole hung vaigei khan nate eitin ahile kalungsung teng’a kisun abangin, seiding jong helouvin, kalhi ahung londoh jengin ahi. Ajehchu kapa adamna lai vanga, athi banga kagelle kalungin apoh joulou ahi. Chuin chajong don ta louvin, kahung kipat doh loijin, Train chunga katou doh paitan ahi.

Kalunggel la kangaiton “in kalhun kah in, kajopa hi ana thi jengdem? ana thi jengle ipi kati dem?” tin gellou ding tincheng kagellin ahile kei dinga vang hinkho nopna him2 aumpon, in kilhung loi henlang, kachun lejo mel kinungmu loile tin, Train kipat doh dingkal chu kangah lel jengin ahi. Ahin ei kino manna, Train jong kino jeng ahilou jehchun, phattep dung juiya lhai Train chun kalunggel eihetthem peh pon, akipat dohmo jengin ahi. Mihem mong monghi ikino ni komle, aki vaigei dehset ji ahile akilom min ahi. Kakom kavella tou kol levai hochu la achoh lha jengun, akaploi, akidai loi, thiljoh loi achuti lha jengun ahi. Keichula ummuh vilou kabangin, kalunggel nop louna chun nehding donding leh, seiding jong eihetsah theipon ahi. Hijehchun thipchet in katouvin, mi umchan hochu Cinema vet in kamoh vet jengin ahi. Train kipat doh ding ngallel la, kaki gel jing laijin, phattep dung juijin Train jong ahung kitol tan ahile kakipah lheh jengin ahi. Lamlhungin kaki gellin “Kajopa in damlai mellin eina lamtoh teile, kipah umna ding’e” tin, kalunggel lachun kapa jengbou ka gellin ahi.

Nilhah langin kakhou kaga lhungtan, ka innu kanai deo2 le mi ahusa lha jengin ahile kalunggel lachun “kajopa hi athi ahi jeng tadem? kapa athi jeh ahi khosung mipi, ka innuva kikhommu va hinte” katin, keilunggel chun kapa kathisah in ahile hetman louvin kamaiya mitlhi ahung longdoh in, kalhi kaki theh2 tan ahi. Ahin athu alajong kihe chen nailouva, ibolla kalhi kaki theh jengham? tin, keile kei themmo kaki channin, kalhi katheh hul loijin, ka insungu vachun kalhailut loitan ahi. Kachunnu in kavailhun eihin muchun, kajopa jah a aseiyin “Thangchapa, nachapa nahol hollin, nakou kouvin, tun ahung vailhung tai. Vetemmin nachapa Thangcha ahung lhungtai. Akomma ipi nasei nomham? seipeh tan” tin, kapa chu ahoupi in ahile kajopan keilang ahinven, eikounan eihin khutjap in ahi. Kabag pohjong tolkoi man louvin, kapa henglam chu kajon loijin, kajopa somai melchu kavetle masanga kajopa mel kana muji toh abang tapon, ana gonglha jengin, vetngam ngamjong aumta pon ahi. Chuin kajopa jah a kaseijin
Kei- Hepa, ipi nati a, tukah seh a chubanga chu nana gonlhah jeng hitam? Hepa, nacha keiman nanatna ho kave joupoi. Ipi ham kajah a naseinom? seiyin kangaiye.
Jopa- Boi, kahin ngaiyin, kahin lhalel lheh jenge. Hijongle iba ilo diuham? leiset hi kikhen namun ahi. Tahsa a kikhen louthei ihi ta pouve eitin, aban seibe thei louvin alhi akitheh2 tan ahi. Chuin kajopa jah a kaseijin
Kei- Hepa, hitichun nei thumop hih in. Kangai ngampoi. Naphat jong alhing naipoi. Nadam doh thou2 ding ahi. Ibolla naki hollel ham?
Jopa- Boi, damding nom jongleng kanatnan eijo valtah jeh in, damdoh jouhoi kahi tapoi. Kei thita jongleng, kisonglel hih in. Tah chapa pasal chapa nahi. Nalung le natha pannin lang, insung hi nangman hin lamkaitan. Nanu thusei jouse hin ngai jingin lang, hin lhaset sah hih beh in. Nachunga nachunnu alhaset khahle keijong ka lhaolha seding ahi. Boi hung damsel sellin lang, thohhat tah in hung pang jingin. Meithai cha kahi tinjong lungneo hih in. Pasal lungpi kengin lang, napa toh bangkhai hohi, nangin hin tong jommin lang, hin tong molso in. Napa kei umhih jongleng, kei sanga chungnung jo Pathen aumme tivang hin sumil hih inlang, kadamlai kahatlai nikho a, kana hilna thu hole tu kalaicha konna kahilna thuho hi nalungsunga lekha a thucheng giltah kijih bangin kijih lut inlang, hin sumil hihbeh in. Injole lamse lammin che khan nate.
Kei- Hepa, ibolla hiti hochu naseiya, neivailhah pai jengham? nacha kei khankho ding nagel loutah jongle nasenji, ka Chunnu khankho ding beh gelpeh inlang, khongai tadi tangem? Ibolla kachunnu Meithai hinkho naman sahgot jengham? naselung oimong hinam hepa? katile alhi alongin, kamcheng khatbeh a donbut ding eiti vangin, apao dohjou tapon, amit jong ahahdoh jou tapon ahi. Chuin kachunnu toh jo channin kajen lhonnin, ahin asempa Pathen nin ateppeh phat le nikho alhintah jeh in, damdoh jou louvin, ahaitan paitan ahi.

Tongdon theilou kapa longdamsa chunga chun sennao bangin kakap in, “Hepa hung thouvo. Ibolla neida lhah hitam? Kakholjin nathu hobeh nakomma neisei sahnom lou hitam? Hepa, hiti dingin namel lom theipoi. Ipi vanga kaneiya, kipah tah a kivailhun louva, hitia iki vailhun jengu ham? Hepa nang jao louvin insung alhing joupoi. Insung bulpi nang nahi hilou ham? napoh naho gelkhoh louva, idinga tongdon thei louva, kumkho a dinga maimit nasin jengham? Hepa nang na um loule, i insungu hi ahong valle. Lonlhi a vakang dia kachunnu toh kei neiphal lhon hitam? Hepa, houthou vinlang, kamcheng khatbeh in kajah a “Boi kap hih in” neiti tang’em? kei khankho ding nagel loutah jongle kachunnu mitlhi behhi hungtheh hul peh tangem? idinga nalungset pen nasenji kumkho a napuldou dia, na laitan jeng hitam? Hepa, nadam lai mellin khatvei beh hung kilang tangem? Hepa nakomma dohnom thu tampi kaneiye. Hiti hobeh neisei peh louding hitam? Iti kavailhah a, ipi a kaka lai lonlhi hi katheh hulding hitam? Kachunnu koijin alhep lung monga, koi komma alunggel natna ho aseiya? puldou hinkho hoiya solam abanding ham? Hepa, gelphah louva, ichungu va thinan vai ahom jenghi janmang himaileh kanom ngeiye. Aw chaga hinkho mang dinga laitan kahi jenghi kasang ngampoi. Kahinkho hi ahah in, ana e. Tuni kho a kamitlhi longdoh jathi nadamlai mellin mule chun, neive jou mong nadem hepa? Nang beiyin, nadalhah insung hi thimpi meipi ajingin, lunggel jengjong aum thei tapoi” tin kaplai bangmon, naocha kan kakap kap jengtan ahi.

Kei lainat nale kaka na ocheng bon iham kitia? Kachunnu kana ocheng ho kajah a, alhatset dan aumchanna konna kamu dohchun, kalhasetna asangin, kachunnu thohna hochu kave jou mong2 pon ahi. Keini nucha kana ocheng chun ahung kikhom mipi jouse jong aka sah in, alhi kitheh lou koima aumpon ahi. Thoh hahsa kasah lheh vangchun, kachunnu khankho ding kagelle kave joupon, hijehchun hahlheh jongle kamaiya mitlhi katheh hullin, kajopa kavai lhahtan ahi.

Aban jingle simkit tao hite o? Chol le nang pumma, jansot nunga hung kijih ahi jeh in, jihkhel tam ding ahin, hijehchun ol ollin ana sim taovin. Lunglut tah a sim jouse chunga kipathu kahin seijin, Pathen nin Phatthei naboh taohen. Kakipah e.

How useful was this post?

Click on a star to rate it!

Average rating 0 / 5. Vote count: 0

No votes so far! Be the first to rate this post.

Admin: Get in lamka

Get In Lamka - Digital Marketing & Information Services, Shopping site Lamka, Churachandpur, Manipur, Shop online at getinlamka.com, Read Daily news of CCpur.

Leave a Reply