A MIN DI’N NULLAHPI HILOU IN, LANVA LUI MAH I CHI DING UH  By: Muamuan Tawmbing
Get in Lamka

A MIN DI’N NULLAHPI HILOU IN, LANVA LUI MAH I CHI DING UH By: Muamuan Tawmbing

0
(0)

A MIN DI’N NULLAHPI HILOU IN, LANVA LUI MAH I CHI DING UH

UTTHU A VA KIZUAK KHA A HIKEI By: Muamuan Tawmbing
By: Muamuan Tawmbing

Muamuan Tawmbing

_Lanva Lui tuang a Niin bulom om a, Polythene khawng tui in tuah selou a, a tuang khawng a Suang leh Leingawi la chih mawk, Polythene leh niinte gik china e, suang hiam leh leingawi a late tuisiam mah ahi vovok ding uh maw tuitaw a na va sem thei, Saktiman mahmah leng tui a siam vovok ding maw a driver hangsanna e,,,!!! chi a chiamnuih thutak a mi khat in a gen ka theilai, a lamdang lua hilou pi, Lanva Lui tuang natawm a Tui a omlouh ziak a tua teng hithei aka chihlouh ngal zaw a dawnna ding a om kei..!_

Huai khawng i ngaihtuah chiang in Lanva Luipang khawng ah Sihzou kung khawng hoihtak om seseuh leh chih bang mitkha ah lang duanduan zel a, gilkial ziak mah leng hikha thei zel veh. Sihzou i gen lailai in Sahou i chih zaw Sihzou omlou a bukim zoulou bang sim hive aw, a diak a Sihzou toh pok huan hang a, Gotuai leh Vokthu khawng malta meh dia bawl in i hon neek leh kituak mahmah diamdiam hi. Himahleh kholum lai a huaibang i hon meh chu a riau khat om a bang zawzen. Lim si, thak si, gilvah si, kho-ul in hon pumtuam louh theihlouh chu…. Nitaklam anne khin chu kihita hi, khua mial dek pipelh pan ahi a, hong kai hun omzel mahleh huai ni khelkhel a hong kai ding inle gintakna omlou mah hi. Himahleh kum 5 paisa khawng bang a na om gige lou ahi ngei ding a, hiai Damtui tuh hong kai ana hi maimah hi. Sintex khawng a ki khol zel ahi a, a kai haatlua hilou ahihman in nawnluutna ding in hunluut a, i doh pen leng dim pahpah lou hi. “Hiai Khuga Dam leng hoihtak a i kepbit gige kei ua leh tui hong mawk kai gige tuanlou ding eive”, chih khawng ngaihtuah kawm in,, va pum ngak zen sang in chi a Whatsapp ka hong leh Whatsapp group khat ah “ADC CCPUR makaihna a Lanva Luidung hahsiang na neih in om”, chih kava mukha a, a lim ah JCB in Luitaw Niin omte a hahsiang lai lim a om hi. A luituang Cement a zutmam a a baang bawl mai ding hia, tulai pau dan leh Lanva lui le Pucca suk maileh chih ding lah hilou in ngaihtuahna a paisau zawzen hi. Huai ka muh in kum bangzah hiam paisa a leng awlmoh ziak a ka na gelh khak tei Mihingte’n i hamsiatna thu uh leh huai in Mihingte a ding a siatna a hontut thu, hiai Lanva Lui toh kisai ka lungsim ah hong suak thakthak a, huai pen lumlet sawm zaw hikhang, himahleh heutute lunggel siamna ziak a huailai a i awlmohte tua seppat a omta ahi chih ka muhziak in lungnopna khat chu ahi veve chihthu ..

Ka theihkhelh keileh Nikum hiam hi’n ka thei hi, nidang a Luitui zat manpha tak ana hi, himahleh puahlouh leh zunlouh a na om a, niin paihna ding a zat ahihziak a Nullah suak maimah tuk a om Maharastra a Morna Lui suk hing thakna ding a, a kim leh kiang a tengmite’ panlaak dan ka phawk suah thak hi. Huai Lui a hahsiang na ding un Kha 3 sung luut a, huai hah sung a milip kuan zah 28,000 pha hi. Amau ahihleh “Clean-up drive” chih minvoh in Kal khat a nikhat zel huai bang in Lui hahsiangna ding in hun ana pezel uh a, a nasep sung un tua Lui apan in tuitung a loupa niin deih huailou 19,300 leh Tuipuan (Polythene) 8,440 ban ah Niin chi tuamtuam tamtak na lakhia uhi. Huai nung tuh hiai Morna Lui pe’n mihing te a ding a dawn theih ding khop a tun ding ahihban ah Loubawlmite a ding a dinmun poimohtak luahtu in na omta hi.

Huailou in Pune municipal corporation panlaakna in Mula leh Mutha Lui hahsiang na ding bang leng Kum khat sung, huai tuh kal khat a ni khat zel, hun pia in na a na sem uhi. Hiai nasepna a a tup uh Luitui kepbitna ahih kawm in hoih kasak mahmah khat bel, “kal khat a nikhat zel a cleanliness drive paizel pe’n in mipite’ lungtang a Luitui a poimohna a theih ding uh deihna leng ahi”, chih ahi. Hiai drive ahihleh a pat chiil un Luiguam a niin paih hoihlou ahihdan mipite lak ah awareness bawl masa uhi. Tuni chiang in hiai Luite zat manpha ahih kia uh hilou in, a kim leh pam a tengmite a ding a vualzawlna hita a, mipite lak ah Luitui kepbit poimoh mah ahi chih theihna lungtang om in, siangthouna lam manoh mahmah uh ahihdan Gamsung Niteng Tanchinbu-te ah muh khak in om sek hi.

Khopi tuamtuam in Kum khat- Kum nih paisa a a nasepte uh leh panlaakna a na neihte uh tuni a i kisaktheih pih mahmah Lamka kholai lung a luang Lanva Lui in a zal zoukha dek ta ka chih chiang in kipahhuai kasa a, khatvei hun teng a Nullah guam lianpi kana chih sek pe’n Lui lianpi, huai tuh Lanva Lui mah, hong suak nawn ding eive ka na guk chih hauhau hi. Kum 5 lam paisa inleng awlmoh tu tuamtuam apan in Lanva Lui kepbitna ding toh kisai thu na om gige sek a, DC Lazarus ka chi suk sek mai, huai hunlai ngei inleng Lanva naak lam ah Singsuanna nasatak na kinei sek in Awareness lam bel deihbang a haat khollou hi a muhtheihna chiang om hi. Job-Card pe’n innteek nailou ahihman a diam a kuapeuh kithalawp mahmah ahi ding, a neikha peuhmah tuh Lanva luinaak tan khe a paitou a, vuahzu nuai leh nuailou chih omlou a, a kim leh kiang hah siang leh singnou suan a kitel i chih tuh panlaakna masa ana hita mai hi. Himahleh Job Card a sum muh tei sam na ding maimai a nasep chikhat hiam sa a nasem kitam lua a batna a om hi. Bangziak a huai a singnou va ki suan chitchiat ahia, bang ziak a a kim leh kiang ki hah ahia, chihte mipi’n ki suut saulou ahih khak ding lauhuai lawkhin ana hi hi. Lanva lui tuh nidang a tui tam thei mahmah, dawn ding leh poimoh kisilna ding a niteng a kham ding khop hon pekhe gige lui hoihtak ahihna pe’n mansuah sak i hihziak ua a luitui in kanlam manoh ahi a, a kanlouhna ding a a naak lam puah a om ahihdan mipite lungsim ah tham den lou lai kha thei hi. Himahleh huai nung in tua singsuante bangtan tung ahia chih bohzuina a om lam ka thei kha kei chitchiat sese ve.. (kei theihlouh man himai thei). Kum hong paizel a, Lanva lui toh kisai in gen leh sak a tam deuhdeuh hi. Tuuk hun a hong tun chiang in siluang kikhamna hong suak zel a, Khal hun chiang in noptaalna mun a suak zel hi. Suun hun inbel Suanglaakna leh Leingawi lakna a suak maimah a, a kim leh kiang a te a ding in Niinpaihna hoihtak, Ektui zawlkhiakna hoihtak a suak hi. I muhphakna chiang chiang i ensek ua, a meel a se petmah mai. A luituang lah kuak kemkum in a phok bebolh a, niin a vum metmot mai, a namsia a, tui a tam chiang in lah Singpi awm khelh a bang maimah zel, khokeu hun in lah Pitek kizenlou zuntha a khe langkhat zui a bang nilnel thethup..! Bangmah i gen kei na ua, i lungsim uah zaw, “maizen” chi in i ngaihtuahna uh a paisau veve thou ding.

Mihingte mah in Luitui a ding a poina leh siatna tun i hi uh chih haih vuallouh ahihdan chiang huntawk hi. I Lamka khopi sung ngei uah leng a kua-kua in Luitui’ poimohna toh kisai in taksap khat kinei chiat a de aw ka chi sek hi. Ahi a, a diak in ADC Churachandpur, District Administrator leh heutu tuamtuam-te’n panlaakna in thupuan leh khamna tamtak ana neisek mah le uh deihbang in bohzuina na omlou sek a, tuni chiang in Lamka Khopi sung ah Siangthouna toh kisai in Awareness hoihtak hong om thei ta hi. Huai toh kiton in Lampi kawchik, Nullah ginalou leh Niin-bawm-te zatdan ban ah Niin paihna lam ah halhna chikhat hong om hi in ka thei a kipahhuai mahmah hi. Hiai i genlai a zumhuai kasak mahmah ahihleh, eilawi bang a siamna leh pilna sin leng hilou, silh-le-teen neileng hilou Indus Valley Civilization hunlai khawng a te’n Drainage system kha na ngaipoimoh petmah ua, hoih leng ana hoih lawtel ahihdan a tanchinte uapan in muhtheih a, tua hunlai a mite’n huai bang ana ngaihtuah theih ua leh bangziak a eilawi in Nullah i chih khawng a poimohna theilou bang a hichi throp om i hiding ua aw..! Zumhuai dek sim na vial e maw… Hilele a kikhel bilbel thei thil ahi tadih kei na, Nullah guamte hah a, puah ahihkawm in utna munmun a niinte hal a i paih nawnlouhna ding un ADC in Niinbawm hawm uh a, Niin buakna ding gari zang in naa hong sem uhi. Huai omzia bel, i niinte uh Nullah guam hiam, Lui hiam a paih hinawn lou a, Mihing damtheihna a dia a poi batlouhna ding a mun seh a ompe’n a Khotang a dia nasem te’n va baw zel ding ua, huai in Nullah leh Lui a niin om sekte om saklou ding ahihziak a Siangthou ta ding chihna ahi chidan in la phot peuhmah leng deihhuai hi.

Tu in, hamphat huai i chi diam, ADC makaihna nuai ah pawl tuamtuam leh mimal tel in Lanva Lui hahsiangna nasatak kipan hi. Hiai panlaakna leh kalsuanna in mipite lungtang a Luituite kepbit poimoh mah ahi, Luitui poimoh mah ahi a, ken panna ding nei ka hi, ka kepbit ding ahi chih theihna lungtang neihna a hon tut lam-et huai mahmah hi. I gen kawmkawm in deihthusam khawng hel mawk le, Lanva lui a niin paih kia hilou in, Suang laak, Leingawi laak leh a kim leh kiang a tengmite’ Ektui zawlluut sek natan a i heutute un Khamna detdoutak hon bohzui ua, mipite kiang a theihsiam sakna dia awareness hoihtak hong hih uh leng lam-et huai mahmah hi. Luitui i chih a taw khuak thuk semsem leng, tui hong tam chiang in a Pang chim semsem thei zaw a, suang laakna leh leingawi laakna ahih chiang in a luiguam sia in tui paidan ngeina saklou a, mihing a ding in lam tuamtuam ah manna liantak tun sek hi. Luiguam sung ngei ah leng inn va nai lam lawdah in, luipangte siangsak in, kepbitna toh kisai a panlaakna omte thuap lehang, hiai Lui tuh sawtlou nung in a etlawm mahmah leh a kim leh kiang a omte kia hilou a, Lamka khosung a teeng mite a ding a lam chi tuamtuam a manphatna leh vualzawlna hon tunnawn Luitui suak ding a, Nullahpi hi nawnlou a, a Damtheihhuai Lanva Lui hita ding hi.

I Pupate hun a pan a Khosat ding peuhmah in Luitui hoihna et masak pen a a neih uh ahi a, tui ki ningching mah tuh i poimoh masa uh hiden chihna ana hisek hi. Huai theikawm in mipi kuapeuh in Siangthouna ngaipoimoh a, Nullah hi in, Luitui hitaleh, Tui lampite kembit a, a poimohna leh ei a dia damtheihhuai ahihna phawk thak deih huai a, huai mah lenkip a, innkuan sung leh lawm leh vual kal a leng kihilh a, naaktak a panlaak thak poimoh ahihdan i sin uh deih huai ahihkia hilou in, tam sem a awareness hoihtak bawl a panlaak hun ahi chih phawk hun mahmah hi. Heutute’n pan hon laakna uh phathuai i sa ua, i kipahpih lai un, mipite’n sinkhiak neilou leh Niin paihna, Luitui kepbit a poimohna leh Nullahte a poimohna i theihchet tatak kei ua leh bel maban saupi et in thawn suak thei veve hi. Huaiziak in a diak in Lanva Lui dung kim leh kiang a khosate, loubawlte leh gamtatna nei peuhmahte a ding in tutung a Lanva Lui hahsiangna pe’n kivelna thak hong hileh deihhuai mahmah a, tuabang a halhna thak a hong omleh maban ah hong phatuam touzel ding a, khangsawn te tan ah hiai Siangthouna lungtang leh Luitui kepbit a poimohna chii kituh tou thei ding ahihkia hilou in i gamsung ua heutute’ lam-etna tangtun tu ki hithei ding hi.

How useful was this post?

Click on a star to rate it!

Average rating 0 / 5. Vote count: 0

No votes so far! Be the first to rate this post.

Admin: Get in lamka

Get In Lamka - Digital Marketing & Information Services, Shopping site Lamka, Churachandpur, Manipur, Shop online at getinlamka.com, Read Daily news of CCpur.

Leave a Reply