ANGELTE’N ZAWLLA SA MAWK UH EIVE By : M. Liankhansiam

ANGELTE’N ZAWLLA SA MAWK UH EIVE By : M. Liankhansiam

0
(0)

ANGELTE’N ZAWLLA SA MAWK UH EIVE
By : M. Liankhansiam

Thupi chituam deuh khat ka hon zangdek mawk a, ana sa-ik sim bang leng i om uh ka gingta! Bangteng hileh hiai a nuai a thu saulou ka hon gelh na sim khitchiang in a thupi na theihsiam mai ding!

Nitak lum ding in ka kisa a, ngeina bang in ka lupna gei a tuithawl khat ka koih pen tuithun ding mangngilh zel ka hihman in ‘annhuan buk’ ah ka va pai hi. Light leng off khinta, ka phone torch light devak keukau a ka paileh pindan kongkhak ah ka kitatpuak buk hial hi. Ka lawmpa ihmu khinta a hihman in thawmging nei hetlou a ka gamtat a ngai a, pilvan theihtawp suah a tuidim ka hihman in filter a kipan tui hong pawtkhete’n tuithawl taw a deng ging nasan a ngaih mahmah mai hi(Zinglam dak 3 vel a hihman in thawmging dang zak ding a omkei!).

Lupna pindan a ka lutnawn tak in ka lupna tung ah mikhat a na tu belbul mawk hi. Hon nungngat a hih banah ka puansilh pen kilukhuh a hihman in ka lawmpa’n ka thawmging za a honna khemsawm hi ding a muangmoh in ngaihsak luat ding inleng ka koih kei! Ka khut langkhat a tuithawl tawi, a langkhat a phone mekvaksa tawikawm, kidaihlah tak a pindan kongkhak kalhkhin a ka lupna ka salhvak leh huai second tamlou paisa a ka mi muhpen ana om nawnta kei! Ka lawmpa’ lupna tung ka salvak ngal a, ihmu hoih mahmah a hihman in den a ka mi muhpen amah hilou a hihdan ka theichiang ta! Lamdang sakna in ka dim a, ka thilmuh in hon thawmhausak mahmah mai hi.

Ngaihmuang hetlou in ka lupna gei a tuithawl koihkawm in lupna tung ah ka tusuk a, denzek a ka thilmuh ka ngaihtuah hi. Ka mitkha hia leh? Hikei veh aw! Ka ihmut a suahluat ziak a ka mitvai hia leh? Huai chih di’a lah hundang a ka ihmut hun tung nai leng hi samlou a! Ka lungsim a nuam nawnkei a, lauhthawngna chiang neisim mahleng ka khekhuantaw a lungmuangtak a ihmu ka lawmpa bel bangmah ka hilh ngamkei!

Ka lukham bawlhoih kawm a awl a lumsuk di’a ka kisak leh ka kong kilhna kiplou hia chihleng theihlouh in hong kisawnhong mawk hi. Thakhat in ka thoutou a, kintak a ka phone ka detvak leng puanngou silh khat kongkhak bul a kimuchian ngellou a ding ka mu hi. Kenleng ngaihlaw lou a, “Nang kua e?” chikawm a ka va naih pheileh kongpi lam ah pawtkhe ding in paiphei hi. A nung ah ka zuiphei a, “Bang chisim e? Khawl dih! Nang kua e?” chi’n dong mahleng hon dawngkei a, a hong kinunghei samkei! A mel munuam a a maizawn ka salhvak thakleh kongkhak bul tung manta a, laithem khat nusia in konglam ah pawtsuak hi. Delhzui mahleng kongpi bul ka tun in lampi ah kuamah muh ding a omkei!

Kenleng a nutsiat huai laithem ngaihsak nailou in, “A kua le na maizen a!” chikawm in kongkhak ka sungkilh thak masa a, huaizoh in huai tuangtung a laithem tawmtou in ka lupna pindan ka zuan nawn hi.

Hiai hun tan in bel banghiam lauhthawngna chiang neisim ka hihman in kintak in ka gamtang a, lupna pindan kong hoihtak a sungkilh thak in lupna ka zuan nawn a, lupna tung a tukawm in huai laithem sung a kigelh bang thu hiam chih theinuam in phone devak keukau kawm in ka hon sim a, a sung ah thumal tawmchik himahleh ka hinkhua hon hetkha mahmah thu a kigelh hi. Ka simkhit in ka kho-ul nel in a hon tuam a, ka chii bang a liing sungsung hial; “Dost, sihna in ka thuchiam ka hihkip ta!”

Thazoi takmai in ka phone leh huai laithem ka lukham tung ah ka koihsuk a, ka khut langnih in ka mai ka sukzut huamhuam hial a, huchih sung in ka mittuite’n ka khutpek sunglam ana zuisuk uh a hihdan ka theithei hi. Ka lungsim in, “Dost, nang nana hi maimah vele maw! Bangziak a kamkhat le hon houpih lou a hon paikhiaksan neita?!” ka chi vungvung a, khasiatna leh kisiamtanlouhna in ka dim a, zanpuan a ka mai humkawm in a ginglou-lah ngaih a ngaih ding in ka kap huphup maimah hi.

Sawtlou nung in ka lumsuk nawn a, ihmut suaknawn hetlou a hihman in hun paisa ka lungsim a sutkawm in lungleng takmai in zan hun ka hon zang hi. Lauhthawngna ding leh thawnhauna ding bangmah ka nei nawnkei! Huai naksang in lunglenna in a hon tuamdaih!

“Dost” ka chih kua a hia, chih ka hon genchiang ding aw…

Naupang chik ka hih ua kipan lawmta hoihtak ka hi ua, ka siamsinna mun(school) uh leng kibang ahi. Ka lawmpa bel laisiamthei lua hikei mahleh a siamtheilou pumlum bel hilou hi. Kei ka hihleh laisiamna lamah nengchik ka na tungnung zawdeuh a, huaiziak in ka thu hon mang mahmah hi. Tu oh, ka chihleh tu, ding oh, ka chihleh ding a himai a, ka kithuahlai ua a omdante khawng ka ngaihtuah kik chiang in a Nu-le-Pa leh a sanggamte’ sangmah a leng kei’ thu hon mangzawk hun tamzaw hi in ka thei hial hi.

Insung khosakna ah a neizou zekzuk hikei mahle uh a Pa sepaih pension a hih banah, a Nu nurse a hihman in kuamah englou in khosa ua, a duh uleh deihte uh nezou leh neizou mahmah a hi uhi.

Hunte hongpai a, ka lawmta ki-itna ulah thuk semsem a hihman in khat lunglutna ah khat leng ka lunglut sukmai ua, ka hihhih uh hihkhawm leh ka hoh nana ua hohkhawm in ka valnou hun uh ka hon zang uhi. Kuahiam khat toh a kisukheh khakleh ama’ sang in kei ka na hehzaw a, huaimah bang in keileng kuahiam toh ka kinoplouh khakna a omleh kei’ sang in amah ana hehzaw zel hi. Lawm dang leng ka thuah tamkei ua, amau’ inn a ka om louhkal un kou inn a om ka himai uhi.

Lawmta, duh leh deih banah lungsim kibang ka hihziak mah un ka kal uah thuguk bangmah a om theikei. A Nu-le-Pa’n leng banghiam a awilouhna ziak ua a thuhilh ut chiang un kei’ kiang ah a hon gen ua, ken ama’ kiang ah ka gensawn zel hi. Huaimah bang in aman leng ka Nu-le-Pa’n hon deihdan uleh thuhilhnate uh kei’ theihma in a theizel hi. Huchikhop ka hihman un tunglam a Pa’n leng ka lawm it hon laksak baihlua hi in ka ngaihsun hial a, a laitah ni a kipan kalkhat sung mawngmawng ann leng ginatak in ka ne theikei!

Taksa hatlouhna neisa chihleng hilou, tuahsia(accident) ziak leng hi samlou, bang hiam damsak theihlouh ding zen a natna gil nei leng hilou a, zankhat thu a a hinna amah-le-amah a kilak maimah pen in ka lungsim a nasak mahmah! Ka lawm itpen a hihkia hilou, huai hunlai a di’a ka lawm neihsun a hih zawkmah ziak in a kivuini a thugenna hun piak a ka om inleng ka gennop teng nasan ka genkha theikei a, a hai ka bangzou hial hi.

Ka lawmpa’ hon omlouhsan nung tukum toh sim in kum 8na a hita a, himahleh hon beisan nitak a a Nu’ kahtam ka bilkha ah a chang in a gingthei lai! Huai kia leng hilou, a lupna gei a zu kidawn khinlou kikoih leh a lukham nuai a heroine(no. 4) vui tamlou kikoih banah laidal neuchik a, “Dost, sihna in ka thuchiam ka hihkip ta!” chih kigelh a nutsiat om a hihdan a Nu’n hon hilhguk siausiau in ka lungsim ah mun poimohtak a luah gige a, ka damsung ka mangngilh theih ka gingta hetkei!

A hi a, bangziak a tunitak sese a a kha in hong veh a laizang de aw, chih ka ngaihtuah zomnawn a, thilkhat ka theikhe guih! Kintak a ka phone ka etleh March 3 a hihlam ka theikhia a, “Aw… Dost, kha na kiak ni tuang hong tung nawnta eive le maw! Innlam ah ka omkei a, tukum leng na hansuang bul a hongpai theilou hilai photmai ding ka hi aw…Ngaihsiam” kei’ zakkhop ding in ka chi siausiau lel hi.

Ka hun zatkhawm lai nite uh ka lungsim ah chiang mahmah in a hong kilang dundun mai a, a biktak a a sihhun kuan a ka hun zatkhawm dante uh ka lungsim mitkha ah a hong kilang phadiak mahmah a, “Ana hichi khaleng, hichih zaw deuh khaleng…” chihna ngen in ka dim hi.

Ka lawmpa toh ka kibatna mahmah uh a hihleh, thil banghiam hih/sep ding ka chihsa uh vuahzu-daikai mahleh hih/semsuah teitei ka hi ua, huaiziak tak a leng ka lungsim ua kitheihsiamna om hi inleng ka thei hi. Awle, a sihna ziak ka muanmoh thu tampi omkei mahleh ka gintakdan thu tamlou ka hon genlai ding;

Pawl 6 ka hih kum uh ahi. Ka classmate-te khat uh toh a hong kingaihbawl uhi. A inkuante leh ken bel ka awi hetkei uh, a ziak bel naupang lawlai a hihman un! Himahleh khamzoh ding a hikei. A numei in bel nektheih khawng a leisak zoh ziaklel a ngaihbawl a hihdan ka thei a, ka lawmpa theihsiamsak ka sawmchiang in a utkei hi. A khenchiang in huai minu’ ziak in ka kinuaksan dek phialphial ua, ka lawmta kal uh hoihna ding a hih nakleh chi in minu’ thu ka genpih nawnkei!

Pawl 8 ka hih kum tan unleng ama’ lamet bang itna tangkha a kitheilou a hihman in ka lawmpa hong lungke piansim a, himahleh minu bel itna lamthu a zeilua a hihman in a naknuai kamsiam in khemzou zel hi. A kihou tung ua kipan ka na awilouhsa a hihman in a lawmngaihnu’ tung a khasiatna leh lunggimna a neihte hon gentam ngamkei! Huchilou thudang bel ka theihlouh a omkei hi.

Pawl 9 ka sin kum uh, exam ding kuan in nitak khat a lawmngaihnu’ kiang a hoh ding in hon zawn hi. “Bang i va hih di’a eita?! Lehkha sim di hichituk a tam a!” ka chihchiang inleng hon zawn teitei a, kenleng kithalawp ngellou pi in ka va zui hi.

Lampi a ka paikawm un,
“Dost, tunitak chu maw, na duhduh gen oh, kon leisak di. Ka kipak law mahmah!”
“Chimawk! Hong kipak na mawk chia! Hong kilankhe zou khongkhong ta a hi di maw!hahaa”
“Hithou mah e!hehee”
“Dost, ken zaw hon kipahpih lawlou keive. Na lungsim a natluat di ka lau a, na lawmngaihnu ka theihdan, muhdan leh a lungsim hi di’a ka gintakdan hon gentam utlou ka hizaw. Banah, hon gengen leng i lawmta kal a siat di ka utkei a hiven!”
“Dost, keichu lamdang kisa ka hi. Class 6 i hih a kipan hoihsa ing a, tutan a le hoihsa deuhdeuh lai ka hi. Ka muhtam deuhdeuh leh hoihsa deuhdeuh ing a, ama’ aa di’a ka hun, sum-le-pai leh ka lungsim ka piaktam deuhdeuh leh kei mahmah kipak semsem ka hi. Huaitak hilou di maw itna diktak ka chimai a?!”
“Dost, nang’ itna hon muanmohsak hilou ka hi. Na lawmngaihnu’n nang hon itna pen ahi ka muanmoh zawk!”
“Bangchidan in eita?!”
“Gentam a theisiam dile na hi tuankei a, nang-le-nang in kizonkhiak mai oh.”
“Hehee… Dost, tua nu’n chu maw hon it taktak hi a thei keive…”

Huchia ka kihoulim sung un innkong ka tungman ua, ka houlimna uh ka khawlphot uhi.

Kong ka kiu kauhkauh ua, inn sunglam a kipan aw nemtak in, “Honglut uau! Kong kikalhlou ahi.” chi in honna vaidawn a, kilawptak in ka lawmpa a lut a, ken a nung ah kilawp ngellou in ka zuilut tei hi. Minu kia ana om a, a innkuante bel a khua uh zodawn lam a om ahi ua, a chang in Lamka hong phazel uhi. Kouteng thum kia ka hihman un ka lawmpa’n bel gen ding a hauhchi mahmah mai a, ka hohna nu uh bel kizumsak hia theikhang, pau tamlou in a chang in ka lawmpa’ thugente ana nuihpih nalhnalh lel hi.

Ka lawmpa’n kilawptak in kum 3 paisa a kipan hon suttou a, kum khat leh a kim a tuntak in, “Khaih! Hichi di a hihleh zaw i zanhak kha di uh!” ka na chih gaihleh ka lawmpa’n hon mitsat gaih a, minu bel ngeina dan in omlel hi. Genkhial ka kisa kei!

Ka lawmpa’n a hawmthoh mahmah mai a, a khenchiang in a thohbawl a, a khenchiang in a kawi a, a khenchiang in a engbawl thethup hi. A khatnu’n lah ngai hetlou a hihdan a omdan leh gamtat a kipan ka theichian semsem a, ka lungsim in “Dost, ka gintak bang ngei in taksap awnghu maimai lah na hi taktak a maw!” ka chi vungvung a, poi ka sakpih petmah!

Nitak dak 10 vel in ka pai ua, ka kiklam un minu toh kisai ka ngaihdan hon dongthak nawn a, hiai hun inleng a khasiatna ding genkhak ka utlouh man in, “Dost, ken bel amah(huai nu) toh kisai in ka thugensa ka khek tuankei. Hilehle nang’ itlua-ngailua na hih maimah chiang a hon kipahpih hetkei lengle na ngaihdan hon pompih hi photmai ka hi.” ka chi lailai hi.

A hitak in bel amau gel kal a itna omsa kum 3 chinna lawm dan a va hoh ka hi ua, himahleh kei’ muhdan in bel a bul kipanpan uh bang ka sa lailai!

Hunte hongpai a, Christmass leh Kumthak hunte nuamsa leh kipaktak a zangzou phet in a lawmngaihnute’ khua a hoh di’n ka lawmpa a hong kisa hehu mawk hi! January ni 5 ahi. Uang genleng, i kumthak sa nekna kam nasan kihahsiang khin nailou, chihtheih ding a hilai. Lamdang ka sa mahmah a, a ziak ka dot chiang inleng a hon gen nuamkei. “Kong tunkik chiang in na thei mai di.” hon chi a, a mel a bang hiam lunghihmohna nei a hihlam thei ka hihman in, “Dost, kenle kong zui diam?” ka chi a, himahleh a hon ngaikei! “Achihlelah va zin nuam inla, thusia non puak kiklouh di eikha aw…hehee” chi in ka khakhia hi.

A chang in ka call zel a, himahleh a ki-switch off den hi(network ginalou eichia!). Muallum check post a network omkha geih a hihman in lamzang tak a paithei ding in ka deihsakna thu ka khakthak thei a, ka lung a nuamtuam mahmah! Huchilou bel ka thuzak thei nawnkei!

Huai nitak in mang ka nei a, ka mang in ka lawmpa’ mel muatdek hileh kilawm in ka mu a, himahleh amah bel a nuihmai teitei hi. Thakhat in khua ka phawk a, lauhthawngna in a hon tuam hi. A zinkhiak dek a nuihmai hetlou zawmah a hihman in lamkal a bang hiam va tuak a hihkei lehleng a hohna mun a banghiam lungkham luatna va nei hi ding in ka muangmoh tinten a, ka lung a nuam hetkei!

Zingkal in ka innkuante’ kiang ah ka gen a, “Huai mang khawng khemkhem!” hon chihsak uhi. Sunnitum in ka zanmang ka ngaihtuah a, a ziak ding ka theizou tuankei!

Nitaklam dak 4 vel in ka phone hong ging a, ka etleh ka lawmpa ana hi hi. Kintak in a lakna ka mek a,
“Hello dost?!”
“Aw… Hello2! Bang chisim e dost!?”
“Bang chisim khang. I hon miss a eivoi…hehee”
“Ei’ sang a na poimoh ngaihzawk kiang a om neive le dost. Nangle amah sun in hong hichi kamsiam ngeingai kei dihle…hahaa”
“Hahahaa…”
“Eh! Zannitak hon mangsiat lua keive dost. Bangmah chikei teh maw?!”
“Hahaa… Non miss sim a hi’nteh nangle! Hmm, a nuam ei… Kihoh khiallou dan eiveh dost!hehee”
“Hehee… Hohkhelh theih eimah veh maw! Blehh…hahaa”
“Hahaa… Eh! Dost, zingchia hong kitonsuk di ka hi uh, honna dawn ve.”
“Aw… Dak bangzah lak in e?!”
“Theilou maw! Muallum check post kong tunchiang un kon hilh di’a, Dorcas Hall kong ah honna ngak lechin aw…”
“Awle… Hi e sap!hahaa”
“Okok. Chihleh ka hunsak phot aw dost, meh di pua in loutul ka va hohdek uh.”
“Awle awle… Hilehle loutul chihlouh ah zaw va kawmthawi luatlouh di aw dost…hahaa”
“Hahaa… Awle… Awle… Omnuam”
“Awle. Noule loutul hoh nuam…”

Ka lawmpa’ hon houpihdan a kipan in bel lunghihmohna ding omlou a bang hi. Aziak bel a tangpi a i mang a siatleh a hoihlam hi nuam, chi uh a hihman in ka lawmpa ka mangsiat pen a hoihlam ka kipe teitei a, aman lah nuamsak chilua a hihman in ka thil ngaihtuah ka sunzom nawnkei hi.

A zingching in Dorcas Hall kong ah ka va dawn a, lunghihmohna ding bel a omchi hetkei. Ahi a, February ni 20 a kipan niteng in ka lawmpa’n a ngaihzawngnu a muanmohdan thu a hon gen veu hi. Himahleh ken bel ama'(ka lawmpa) kipumpiak dan theilua ka hihman in mihai a hihkei ngalleh a numei in taisan ding in ka gingtakei a, hehnep theih dandan in ka lawmpa ka hehnem zaw hi. “Itna i chih khum gige lou, etlawm gige lou, kipahna leh nopsakna hi gige lou ahi dost. Itna i chih maw, a nuam-a-haksa thuakkhawm di’a lungsim leh taksa kipumpiak tuahna ahi. A etlawm teng a bukim hilou pi, rose pak inle ling(thorn) a nei vele…” chihteng kan ka genpih theih a om tuankei!

Niteng a a lungkiatna thu hon gen veu a hihman in ka lunghimoh khong a, January ni 5 zan a ka mangsiat pen ka lungsim a hong kilang kik zawmah a hih banah lauhthawngna chiang neisim ka hihman in nikhat a kal uh bangtan tungta a hiam chih theichian ut in ka dong a, huaitak in mittui luang zungzung in hichi’n a hon gen hi;
“Dost, February 20 ni ahi. Zomi Namni lawm di’a i kuandek un a inn uh ka va zing phak a, papi mel mahmah khat a lupna tung a ihmu ka va mu. Huai mipa kua a hia, chi a ka dot chiang in ‘ka Paneu ahi’ hon chi a, keileng ka lungsim nuamkei sim mahleh a thugen ka gingta sukmai hi. Hilehle maw, huai mipa mah zannitak a ana omzel inchin, hiaihun a zaw ki-imzou nawnlou ahi di, mipa’n a ut-le-dah a a ompihsa a hihdan ama’ kam mahmah a kipan in ka za.” hon chikhe khong hi.

A khase mahmah mai a, a khut langnih a a mai hum kawm in kap hithit maimah hi. Hiaihun in zaw kenleng a hehnep ding dan ka thei tuankei! Midang’ kam a kipan a zak hileh bel minu huchibang mihing ana hihkhak zenzen lehleng ka lawmpa’ lungsim nopna di’a gen a haksa hetkei ding, himahleh minu’n a kam mahmah a a gen va zakha a hihman in ka lawmpa’ lungsim nat ding dan bel theihsa ahi.

“Dost, huchi lungkham ken! Hun hongpai di’a, amah na itna zahzah a nang hon ittu ding mi Pathian in hon koihsak om ahi a, tua nang’ aa ding tuakkha nailou hilel na hi. Hichi’n genleng, na nakguh kemtu amah hilou a hihdan na theichiangta a, tuabel na nakguh mang pen mang lailai hiphot chihna ahi. A neitu theihsa ngawingawi huai mi’ vasa khoisa na kem nilouh nuam a hia?! Ken chu kem nuamlou di ka hi. Tui a thakchiang a le kei’ aa ahi, ka chihtheih di mah vasa neileng ka utzaw. Huchi hilou a, lampam singsat pian a i om khakleh denchia tui a thak hunchiang a a neitu kituh lukluk chihkhawng zumhuai khathei a hihziak a tunglam a kipan hilhchetna himai ahi.” ka chisuk zungzung a, awlawl in a kahging a hong daithei vanglak hi.

Hiai ni tuh 3 March, 2012 ahi.

Ka hohna mun ua kipan awl in innlam ka zuan ua, lungnuamtak a om ding in ka thuhilh thakthak a, amah(minu) kia khovel a numei om hilou a hihdan theihsiamsak ka sawm a, kinial simsim kawm in innlam ka zuanzel ua, a innkong uh ka tuntak un, “Dost, ka thuchiam uh maw, sihna in hon khen mateng, chihchu eiveh!hehee” chi in a kihei a, ka damsung a ka lawmpa’ damlai mel ka muh tawpna ana hi maimah!

Huai nitak dak 12:30am in ka lawmpa’ Nu’n hon call a, ka lawmpa buaisia a hihdan hon hilh hi. Keileng kisa mengmeng in ka pawtkhia a, ka lawmpate’ inn ka tuntak in mi tamlua ana om naikei uh. Innkong ah a Pa leh YPA heutute bangzah hiam ana houlim ua, a Pa’n, “Siam, room ah va lutsuak pah in aw…” hon chi a, keileng dip hawmsa in innsung ah ka lut hi. A lupna pindan sung ah nupi leh nungak nih kapging ka za a, common room a omte kuakua a hi ua, chihleng theilou in ka lawmpa’ lupna pindan lam ka zuanphei pah hi.

Kongkhak awl in ka sawn hong a, lupna tung a bangmah thei nawnlou a lum dildel ka lawmpa leh a Nu banah a sanggam numei tegel chihlouh kuamah muh ding a omkei! Honna muhtak un a Nu’n kahtam hon lou tiaitiai a, “Na lawmpa hongpai eive bawi! Hong thouve… Enve na lawmpa, nidang a kipahna ziak a samzel ing a, tua na sakmel vul ningniang en ding lel a na lawmpa ka sap telmai zaw naa salaw veng aw bawi, naa salaw veng!” aw suakzou ngellou in hon chi chiaichiai a, ka mit in bangmah a muthei nawnkei! Ka dinna mun ah ka liing deldel hial a, ka dip bang hong naa ngeingei hi. Ka tha teng a bei a, dingkip zoulou in kongkhak bul ah tomchik ka tusuk kha hial hi.

Ka tha hong omnawn deuhtak in ka lawmpa’ kiang ah ka va tu a, a khut langkhat leh ka khut tegel buptuah kawm a mittui luang zungzung kawm in, “Dost, itna gu a hattel maw! Itna ah kipahna kia a omkei ka chimah voi! Bangziak a nang ana hichi maimah neita?! Nikhat-ninih thuakzek mai lechin zaw maw…” chi in ka gen a, aban bangmah ka genbeh theikei! Ka aw nasan suakzou ngellou phial in ka om a, ka biang a ka mittui luangkhia lum huthutte chihlouh bangmah ka thei zoukei! Ka hi bengbung a, ka lawmpa’ khut vot dikdiakte lenkawm in a gei ah kundide in ka om a, ka mittui bel tuibang in a luangkhe zungzung mai hi.

Zinglam dak 3 lak in ka gimgawp a, ka tutna mun a mitsi zual ka kisakleh ka na ihmu kha laizang a, ka mang in Van Angelte bangzahhiam in khut kilenkawm in laa a sa ua, a gei uah ka lawmpa’n a khut zak deidei kawm in lungluttak in huai la kisa tuh a zui hauhau hi. A omdan ah kipak leh lungkim chi mahmah a hihman in ka lung ana kim mahmah a, huchih laitak in lengkhawmte’n, “Hun tuibang kiamzel e, simlei nunnopna bei! Nuai simlei ah nunnopna kim theilou…” chi a a sak un thakhat in hon phawng a, ka dak kimvel leh ka muhphakna chiangchiang ah mi a tudim phitphet ua, ka ihmut sung a van angelte’ lasak ka ngaihtuah kik chiang in ka theikhe zou takei!

A lasak uh Pathian phatna laa hilou a Zawlla ahihdan tan kia ka thei a, huai nitak ka lawmpa’ luangbul a tukawm a ka ihmut hun a zaw Angelte’n Zawlla sa mawk uh eive, ka chichi leltak a, tunitan in huai a lasak uh a thu kivolhdan leh a lamalte ka theikhe zou naikei! Ka lawmpa’ kha inlah hon hilh setlou a, theikhe zou zoklou lailai ding tuh ka hita mai veh!

_______________________

@kipak!
40320

How useful was this post?

Click on a star to rate it!

Average rating 0 / 5. Vote count: 0

No votes so far! Be the first to rate this post.

Admin: Get in lamka

Get In Lamka - Digital Marketing & Information Services, Shopping site Lamka, Churachandpur, Manipur, Shop online at getinlamka.com, Read Daily news of CCpur.

Leave a Reply