Athih dan kigen min theilo | SUSHANT SINGH RAJPUT

Athih dan kigen min theilo | SUSHANT SINGH RAJPUT

4.5
(2)

Athih dan kigen min theilo
SUSHANT SINGH RAJPUT

Film star, sum hâu mah mah kum 34 a upa, Sushant Singh Rajput chuh June 14, 2020 ni a a inmun Bandra, Mumbai a ginchâk lohpi a suicide akibawl ziekin India gamsung chuh inlîng (earthquake) hâttak in thakhat phut a ahun nuk guih guol in India pumpi a hawtlîng guih a, athu hih tuni tieng in meikuong phelhmit mawh bangin muntin gamtin akasie zing a, ei thingtang mite news channel / paper haw tienga athu ahung git tâk ziek in, zie thihna thu hih gâl a patin vak gâldawt vawng vawng hiting un, athih nung thakhat vâl chieh tamahleh achanchin hih headline luoh zing ahih ziekin khatvei ana enkit hitiu.

Sushant Singh kitipa hih kum 1986 in Bihar ah ana pieng a, lehkha thiem tak, National level tienga le pahchâkna leh lawhtitna chang hiel, annêk sânga lehkha bawlthei zaw hiel ahi a, Engineering student khat ahi. Amah hih lehkha thiem ahih vangin acting ahung lung lut a, khuti a chuh film lama lut kha ahi.

Film industry hih business line / sum atam banah minpha sêkna dinga le mun hawih tak ahi. Chuleh film industry te kipuok dan khuh, ei lama hâusa kivaihawmna guola a sung lama khuh vaihawm / khutvai tu khat um ahiu hi. Kapoor te, Khân te inkuon chuleh mi dang huntieng haw khuh hâusa kivaihawmna guol a Film industry hih apu, apa te apat hung kipie sawn pek ahiu hi.

Film industry lut cheng in, Kapoor te inkuon ahih loh leh Khan te inkuon khabe akhuot ua a zût dinguh, amau lung ahawl dinguh ahi. Kapoor, Khan, Yash Chopra te lunglo lama tawi kha te chuh, Film industry apat puonpi akiziel ua apawt ding uh ahi mai hi. Industry sunga vaihawm te hin zung thûktak akhawh lut uh ahita a, Amau a dinga, film industry hih go (property) khat a umdawk ahitai.

Sushant Sing hih a melhawih chauh hilo a, Bollywood sunga dinga lehkha thiempen te laka khat ahi a, chuleh a film thawh him him hile ahit ngen thim ahi a, tulai nungâk te aguk a ana deihcha lo le umlo ahi ti’n akigen hiel hi. Film industry sunga Kapoor, Khan leh Yash te dinmun hun khêntha thei ding dinmun a um ahih ziek a îtthîk na tampi le ana tuok zing ahi. Ahinkhuo hih lungsiet umtak ahi.

Bollywood sung zienga khule faction a kikhen kit ahiu a, Kapoor faction, Khan Faction, Yash Faction abawn ua Sushant Singh hih amuhdah uh ahihdan chanchinbu tamtak in agen hi. Khuti a kichuombawl na leh îtthîkna haw hih Sushant dinga thuok hak leh thuok zawh hilo ahihdan thutut khenkhat in agenbeh hi.

Achawmlam a gên in, Sushant Singh hih kikhâi lum ahi tih i hevek ua, amah hih meithal, damdawi, lo leh âi manglo hiel a melma te’n a thah uh tih theih ahi.

Tuhin India pumpi a mi atam zawn Khan family, Kapoor family, Yash faction awihmawh na sângtak aluchang u ah akhuksak ua, nicheng thim phiel in media through ah mipi akiphin zing ui. Sushant thihna thu hih High court tieng a khuol dingin ngetna asiem ua, Sushant u pa, O.P Singh le a suohpih pa thihna thu ahin a lung awi thei puo a, kintak a khuolchilna bawl ding adeih thu agen zing hi.

Film industry sunga khuh thunei chuom um ahiu a, ama’u haw lunghawl peihlo te chuh ui êk khu bang mai ding ahiu hi. Hâusa kivaihawm na guol a aneih alam uh hung kipie sawn pek ahiu a, aneih ago uchu asuohpih tih loh bangti’n bah apie nuom ding um ? Zie laitak hih ngaihtuoh khamsêt ahi. Film industry sung nana na a chuh Kapoor, Khan, Yash te khuh Hausa tawbang ahiu hi.

Sushant hin athih ding kuon in film 6 a contract aneih ahi. Zie film 6 hile Khan, Kapoor leh Yash te kithuoh a a laksak kit uh ahi. Agamsung ua pat leh ama’u naih tuom apat puonsie paih a apaih mang kêi uh ahi. Khuti a kibawlna haw chuh agel leh thuokzo lo in, lehthuk ding dan la umlo, kilan pih hiel dinga lah amah chuh Bollywood sunga alutthak leh bangmah position nei kit lo ahih ziek a Sushant hih ngaihtuoh na gim taluo a kithat ahi tia India mipi hin ngawhna aneih ahi a, alangkhat ah adawngmanu zieka thi ahi tia ngawh paw aum kit a thuchien tak vang het ahinai puoi.

Shushant Singh thihna tawh kisai in inquiry achiehtha zinga tuni tieng hin a dawngma lui, Rhea Chakraborty leh Ankita Lokhande chuleh alawi lui Samuel Haokip telna’n mi 56 te statement record bawl ahitai.

Bihar ah mipi kiphinna anasa diek a, Bihar Assembly sung nasan a athu hih kintak a khuoldawk ahih theihna dinga CBI khut a case hih piekdawk dinga agen min uh ahitai. Mahleh Case hih tutieng in Mumbai police in a handle nalai hi. Chun Bihar a city SP Vinay Tiwari, IPS kitipa le Shushant Singh thihna thu khuol dinga Mumbai tung ahihtâk dan thutut nunungpen in agen hi.

Shushant Singh thihna tawh kisai a Conspiracy theory tamtak kigawlh lut haw leh unanswered question tamtak um haw hih hun kit lama thaihnêl dingin ana kawih mai hitiu. Sum la hâu, amel la hawih, family background la hawih, aduong la ting, zei la zei mah mah, hêtna lama lah kuomah awtcha kitlo, dawngma la hâu ngal si a, bang pen apuolah a kikhai lum mai ahim tih hih lungdawn umtak vang ahi.

Min : Shushant Singh Rajput
Pienni: 21 January 1986
Thihni : 14 June 2020
Natna : Depression (Lung kie)

*Rest in peace*

_Huihchîm News Network_

How useful was this post?

Click on a star to rate it!

Average rating 4.5 / 5. Vote count: 2

No votes so far! Be the first to rate this post.

Admin: Get in lamka

Get In Lamka - Digital Marketing & Information Services, Shopping site Lamka, Churachandpur, Manipur, Shop online at getinlamka.com, Read Daily news of CCpur.

Leave a Reply