Biography of Pu Lhukholun (Pakang) Haokip, Chief of Henglep  By~ Phungsong Tongmang Haokip, Henglep Churachandpur

Biography of Pu Lhukholun (Pakang) Haokip, Chief of Henglep By~ Phungsong Tongmang Haokip, Henglep Churachandpur

0
(0)

Biography of Pu Lhukholun (Pakang) Haokip, Chief of Henglep

By~ Phungsong Tongmang Haokip, Henglep Churachandpur

Minthang lunlai Pu Lhukholun (Pakang) Haokip Hengleppa hi Pu Lhupao Haokip chate pasal mi nga lah a alen pen ahi. Kum 1854 chun Henglep Khopi ah anapengin ahi. Amahi misalen leh mi mel hoitah ahina ban ah adong kikhaiheu le mai pehdep mikhat anahiye. Kum 1917 apat Kukite chenna Thinglhang gam-le-lei jouse a British te’n Vannoi Gallen khatna toh anakito jeh in France gam’a potpo a solding in mi analheng uvin ahile Kukite chenna mun jouse jong ahinphah phad uvin Kuki Haosa ho ananom pouvin hijeh chun kidouna le gal’a kisatna jong ana um tan ahi. Hijeh chun May lha 1917 nikho khat hin Haosa len jouse Ukha Loikhai Khopi leh Henglep Khopi ah kikhopkhom a kihoutohna khat boldingun kithulhuhna anasem tauvin ahi. Gal bol a jaoding chu Haosa ananom pouvin hinla muntin a Haosa Upa tampin hiche Galpi chu douding tia kilolna ananei u ahitah jeh chun alou thei lou ahitah jehchun 1917 kum mama chun Kikhopna khat anasem doh tauve. Hivachun Galpi chu nanding le doudi’n thulhuhna anasem un hichu anapom cheh tauve. Hiban chun Joujang Kho ah Galbol dingdan chung chang-ah kikhopkhom na ananei kit uvin hiche nichun Pu Pakang Hengleppa in Sajamlhah dingin Sel nao nga khat anathat in akihom Haosa jousen Sathing Salung aneuvin hiche nikho apat chun Henglep gamkai jouse a khotin ah Galkouna Thingkho le Malchapom ahintol tauvin ahi. Hiche apat a chu British te doudinga khotin le vengtin gal a kigotna chu ana umjeng ahi.

Hiti chun Pu Lhukholun @Pakang Haokip chun Lhanglam Gamkai (Southern Sector) Lamkai hina (Comander) hina panmun anatuh in ajochan in pan ahin latan ahi. Hitia Sajamlhah abol uva Galpi douding’a kigotna anei phad uvin Pu Tintong Haokip le Pu Enjakhup Kholhou jong amaho sudet ding in Henglep ah anache lhon in ahi. Pu Enjakhup Kholhou chun Gallou athei jeh chun Galbol dan Henglep gamkaiya Kuki Sepai mi 100 val hochu kichuhna (training) jong lhakhat jen anabolsah in ahi. Hiche a Pu Tintong Haokip le Pu Enjakhup Kholhou chu Kuki sepai mi 70/80 veltoh hung lhungu ahin Pu Pakangin Selkhat anathapeh in anavahva in ahi. Hiva pat chun Pu Pakang in jong Gamkai Gal lamkai hina lhingset mopohna anapo in, asun ajan umlouvin gamsung ho kholchilna (Operation) anabol jiuvin ahi. Haosa len khat ahikeu hilouvin Sepai jalam kai khat ahijeh in mihoidan athemin asepai hon jong angailu thei lheh uvin chule tahjong atahsan un jajong ajathei lheh uve. British hojong gamtin a Kuki te kho le veng ahin nokhum nao banjom in ahung machal uvin nikhat Ukha -Loikhai kho jong ahin lonvuh tauvin ahi. Aban chu Henglep Khopi jong lonvuh ding lunggel nei ahijeh uvin British sepai tampi chu ahung kitol tauvin ahi. Ajeh chu Pu Pakang Lamkaina a Kuki Sepai mi 100 langin British Doudinga Galkichuhna (Training) abol uve ti ahet jeh uvin kicha sasan Henglep chu ahin jon uvin ahi.

BATTLE OF DAIBANG (HENGLEP) IN ANGLO-KUKI WAR 1917-1919
British hon Ukha-Loikhai ahintoupha phad uvin Henglep gamsung’a hunglut teiding ahet phad uvin Pu Pakang Haokip lamkaina a Kuki sepai ho Galmi lamtin (Ambush) dingin nasatah in kigotna anei tauve. Henglep khosunga pasal hon Thalpi asem uvin, Gopi tah khih kheh ho chu Thalpouvin asem un Tingjang ngat ho hoisel selin amet uvin Thalpi thaljang ho nisom kikapto jongle selou ding chanin hoitah tah in asem uvin ahi. Thalpichang hojong kol thih ho akhengun, Pum japloi, thalchang khengloi, twikhai loi chule meilou suloi hiti chun ama ama toh thei cheh tongin anakithokhom uvin ahi. Thalpichang kibuto nading Gopi tahkheh suiya hiche a chu Thalpichangka leh thalpi chang gokang ho hoitah tah le det kheh kheh in asuto uvin ahi. Chule Thihnang Jangvoh anei kham kham ujong Meilou asu uvin meichang jong akikhen /sem uvin nengchet in kigotna anei tauve. Hitichun Khopi sunga nupi nungah ti umlouvin gal a kigotna chu nasatah in ache lha jingin ahi. Pasal a gimnam in jong Daibang Lhanga lampi khatseh umna mun achun British Sepai ho Lamtin nadingin panmun asem uvin ahi. Thingphung jouse ah kiselna thei asem uvin, ngalpeh thang ado uvin, anoijah Soutung adouvin, kah lah lah achun Songkhai thang jong anakhai uvin ahi. Kigotna anei chai phat uvin Pu Pakang Lamkainan Kuki Haosa hon British Sepai ho chu Ukha Loikhai apat chun aga kousah uvin, “Haosa hon hunguvin kihoutoh utin chamna thu seiju hite atiuve” aga tisah uvin ahi. Hichun British Sepai ho hungna ding lampi chu “Daibang Lhang” kiti ahi. Hiche Daibang kiti hi Lhang/Dingpi (Range) kijot ding kon’a dam khat uma hiche damkom tobang mun a chu Daitwi khejing jeng mun khat ahijeh a Daibang kiti ahi.

Hitichun British hojong ahung tauvin Daibang Lhang ahinphah phat uvin ginchat loutah chun Kuki sepai hon alamtin nau Thokot (Killing zone) ahunglut tah uchun Thingphung jouse a kisel Kuki Sepai khatcheh chun British Sepai khatcheh chu adoijun akap tauvin ahi. Thihnang jangvoh meipum chu Kuki sepai hon atam nei loujeh chun aning ningah khat le ni gingjongle meipum ginna lang adoi kah uchun anung ama umlouvin Thalpi changin akap uvin ahile, kiselna a neiding tia British Sepai hon Thingphung songphung abel uleh hiche ah jongchun Kuki sepai ho anapan sauvin British te chu anakap jiuvin ahi. British Sepai mi 12 langin thina ato phat uvin achat thei tapouvin, alona je ahetlou phat uvin anungchal tauvin, anunglangu lam akisat uvin akinubgtol tauve. Hichun British Sepai hing ho chun commander ho kom’ah, “Gammang thingphung jouse hi Kuki te ahijeng uvin, mihem ka-hathi ding phad uvin kahung kinung tol tauve” tin report anabol uvin ahi.

Chuti chun British te chu akinung tol uvin hinlah Henglep gamkai se chu jothenga lahlut lou akhoh jeh in ahung kithah got kit uvin ahi. Hitia imalou theh a akijumso phat uvin Shillonga Assam Rifle DIG pa kom’ah report abol uvin thil umdan asei peh phat un hiche gal hi galneo mai mai ahilou dan aseijun hijeh chun Sepai tampi ahung kitol be tauvin ahi. Chutia Gal akisat jinglai un nunao chapang ho inle louva gehthei louva, gamjang gamvaiya dungjam vaijam athouva, an le twi jengjong nehje donje helouva a um uva, gamsunga numei chapang ho gentheina asanval tah jeh in aniveina a British te hungkit chun Pu Pakang lamkaina a Kuki Sepai hochun ajochan in gal chu ating uvin hinlah meilou meichang abei phat in akidalkhin tauve. Hinlah aniveina a gal akisat uchun Kuki sepai jong mi 10 val in thina anatoh in chule British Sepai hojong mi tampi anathin chule amachang jong tampi ana umuve. Daibang Lhanga ana kikapto masat u banga kigotman na ana umlou jeh chun apansat nau ananom pon chule British Sepai jong ahung tamval jeh uvin meichang leng jong Gobahlha bangin along jengin ahileh tin hahsa anasa lheh uvin ahi. Hiche a British Sepai Lamkai hochu Captain Goodall, Lieutenants Carter chule Liuet. Hooper anahiuve. Hiche aniveina a anakikapto nauhi Feb -March 1918 sung hi ahin hijeh chun British Sepai hojong Henglep Khosung alut uvin Sel-le-Loi, Bong-le-loi, Vohcha, Uicha, Ahca kiti lou amu jouseu akap peh uvin chule Khosunga um Changpong jouse jong meiyin ahal vam uvin chule Loujaova Changkul sunga kikoi chang jouse jong meiyin ahal vam uvin ahi. Ajeh chu hiche Henglep a kikaptona achu British Sepai tampi leh lamkai phabep in thina anato jeh uva chubangse a laina ahiuve. Hijeh a chu Pu Pakang Haokip le Henglep gamkaiya Haosa ho jaona a gamkai dang dang’a Haosa len jouse jong mat doh a Phatop (Jail)’a koidin Secretary of the Director General in warrant chu Telegram message ah ahin thot in ahi. Hiche Warrant Order message a matdia kisei Haosa hole Phatop (Jail) a aumna diu kum hochu noija banghi ahi.
1. Chengjapao Doungel, Chief of Aisan -15 years
2. Khotinthang Sitlhou, Chief of Jampi 15 years
3. [email protected] Haokip, Chief of Chassad 20 years
4. [email protected] Pakang Haokip, Chief of Henglep, 15 years
5. [email protected] Haokip, Chief of Laijang 15 years
6. Semchung Haokip, Chief of Ukha 15 years
7. Ngulkhup Haokip, Chief of Lonpi 15 years
8. Leothang Haokip, Chief of Goboh 7 years
9. Heljason, Chief of Loibol, 7 years
10. Mangkho-on Haokip, Chief of Tingkai 5 years
11. Enjakhup Kholhou, Chief of Thenjol 15 years

Chunga Haosa ho hi Tezpur Jail a tangdinga Council Committee, Govt Of British India thulhuhna, Secretary to the Governor General of India mina kiso dungjuiya thupeh kipe chu ahi. Hiche holah a chu Pu Pakang Haokip, Henglep pa, jong jaila tangdia pang ahi. Hitobang machun Assam gamkai kivai homna ajong lekha thotna ananei uvin ahi.
“FROM THE ASSAM ADMINISTRATION NO. 6310-P DATED 14TH JULY, 1919 SUBMITTING FOR ORDER PROPOSAL FOR DEALING WITH THE LEADING REBELS CONCERNED IN THE KUKI REBELLION 1917-1919”.

Hiche heading’a konin Order anakiso in ahi. Chule amaho cheng hi Haosa len lamkai ahiuve ti’n giltah in achungthu u ahinkhol chil uvin ahi. Chingthei tah in ama ama panmun toh kitoh in achung thu u anatan lhah peh un ahi. Amaho chenghi Tezpur Jail a kum khat sung Jail ah ana um un chujouvin amaho cheng lah a konin mi phabep achungthu atanpeh dungjui uvin Saudiya Twikol ah akoikit uvin ahi. Pu Pakang Haokip jong Tezpur Jail akon in Saudiya Twikol, Assam, a kikoi holah a ana pang ahi.

Hiti chun British khut a kon a genthei hesohna chom chom tamtah jeh leh Warrant Summon Telegram hungho jeh chun 1919 kum chun hahsa tah in anapelut tauve. Pu Pakang chunga British India Govt Council Committee in themmo achan naho chu:-
1. Gamkai Haosa-Upa ho British douna dingin akoukhom in atildoh in ahi.

2. Haosa hochun Thal ahintodoh uva chule hiche ho a chu British Govt adou diu ahi tia Haosa ho chu thu anapeh ahi.

3. Amatah jong Thal choiya British Govt douna ding’a lamkai (Southern Command) a pang ahi.

4. Haosa ho British Govt khut a kipelut kigo ho akhamtang in ahi.
5. Sahlam gamkai Silchar lampi tingdi’n agamkai leh akimvel a khomi hochu thu ape’n ahi.
6. Amajong hi Haokip Haosa ho lah a lamkai luboh khat ahin Govt douna dinga panmun lentah tuh ahi tin Warrant achun achungthu hiti hin anajih peh uvin ahi. Hiche hojeh a chu Pu Lhukholun @Pakang Haokip chu Council Committee in achung thu anatan lhah peh uvin ahi.

How useful was this post?

Click on a star to rate it!

Average rating 0 / 5. Vote count: 0

No votes so far! Be the first to rate this post.

Admin: Get in lamka

Get In Lamka - Digital Marketing & Information Services, Shopping site Lamka, Churachandpur, Manipur, Shop online at getinlamka.com, Read Daily news of CCpur.

Leave a Reply