CHRISTMAS: A HUNBI CHIN IN (Galatiate 4:4) ~Mangmuansang Tombing, M.Th. in Missiology
By: Mangmuansang Tombing, M. Th. in Missiology

CHRISTMAS: A HUNBI CHIN IN (Galatiate 4:4) ~Mangmuansang Tombing, M.Th. in Missiology

0
(0)

CHRISTMAS: A HUNBI CHIN IN
(Galatiate 4:4)
~Mangmuansang Tombing,
M.Th. in Missiology
(24th December 2016)

Jesu hongpai ding thu Bible mun tamtak in gen hi. Juda te’n Messia Hondampa piang ding ngak uh. Khawvel tulgawp leh setak inleng hondampa pianding ngak hi. Huchihlai in, Kaisar in a lalgam naktak in puah pha a, Jesu hong paina dia kisa ahihlam thei phalou hi. Angel Gabriel Mari kiang a kilak hi. Mari tuh Jesu nu di’n kipumpiak a, Jawlnei gen bang in, Kha Siangthou in Mari gaisak hi. A hunbi chin in Jesu Khrist leitung mihingte tandin hongpai a, tatna thupitak hon bawlsak hi.

1.GENKHOLHNA
Jesu Khrist hong paima tham in, a pian ding thu jawlnei te’n gen uhi. Jesu Juda nam akipan hiding hi (Gen. 49:9, 10). Jawlnei bang a hong paiding ahi (Deut 18:18, 19). Bethlehem khua ah piang ding a (Mic. 5:2), nungak siangthou apan hiding hi (Isa. 7:14). Aigupta gam apan sapkhiat in omding hi (Hos. 11:1). Amiten a deih keiding uhi (Isai 53:3). Himahleh Jerusalem ah vualzou in a omding/lutding hi (Zek. 9:9).

Jesu kitheihmawh bawl in a omdia, dangka 30 in a khawng ding uhi (Zek. 11:12-13). A khut leh khe ah kilh in a omding a (Sam 22:16), seppaih te’n aisan in a puan kituh ding uhi (Sam 22:18). Sihna apan a thounawn ding a (Sam 16: 9, 10) van ah a kahding hi (Sam 68:18). Genkholhna kichi mihing apan hilou in Pathian apan ahi. Jesu Khrist pianna ding tawh kisai laisiangthou a genkholhna teng tangtung vek hi.

2. KHAWVEL KISAK KHOLHNA
Jesu Khrist hongpai lain, khawvel ah kituahna thupi tak om hi. Atlantic apan Caspian, British apan Nile, Hadrian kulh bang akipan Eupharates ah, Rome te’n vaihawm pha ua, laibu khat in kituahna apianna ziak thilthum agente (1) Roman peace: Jesu Khrist tua sang a hongpai baih zaw hiam? Century bangzah hiam a zekai zaw hileh Tanchinhoih dal in omding hi. (2). Great roads: Jesu hong paina dia kigawmna bawltu lampi ahi. Rome engineer lampi sial te’n Jesu hongpai nang sial a hihlam thei phalou uhi. (3). Language: Khawvel kigawm saktu thumna pau (language) ahi. Missionary masa te’n pau ah haksatna tuaklou ua, A paina teng uah, Greek pau zang in Tanchinhoih gen ua, dalhhat mahmah hi.

Jesu Khrist hongpai kuan in, lampi ah mi thum zel lakah nih slave ahi kichi. Kaisar vaihawmna gamsung ah, economic ah haksatna thupitak atung hi. Sumzat siam louhna, tax ah burden neihna, mihing tam luat ziaka, nekding piak zoh louhna, lungkhamna leh kingaih siatna, banah khawvel paikhial bang hi. Mommsen in khawvel a tekta a, Kaisar in a bawl naupang thei nawnkei chi hi. Khawvel in a tuailaina mansuah ta hi. Sahkhua lamah hawmna thupitak om hi. Rome gam pathiante mun awng hu ding in, East lam apan pathian tampi honpua uhi. Kaisar mahleng pathian bang mah a biak in om hi. Pathian taktak lunggulhna leh, khalam a dangtakna lian mahmah hi. Huchihlai in gamdai ah kikou aw in, Toupa lamlian sial un chi hi.

3. MARI KIPUM PIAKNA
Jesu Khrist pianna nu ding in Mari tel in om hi. Angel Gabriel in a gen dungzui in, Jesu’ nu hiding in Mari kipia hi. Juda te’n kitenna tawh kisai in thil thum zuih nei uhi. (1) Engagement (2). Betrothal stage (3). Marriage proper stage-te ahi. Mari leh Joseph inn khat ah om khawm naikei mahle uh nupa bang a sim hi uhi. Mari in a pasal neih ding taan ngam hi. Khristian hinkhua ah taan ngamna poimawh hi. Haksatna tuah (tuak) ding laulou a, min bang teng gen mahle uh lungliap louh ngai hi. Pathian in ama ziak a taan ngamte a taan sakkei hi.

Jesu Khrist mihingte tan di’n hongpai hi. Modern preacher thupitak khat in, Jesu Khrist mihingte hinkhua nuam/ baihlam sakding a hongpai hilou in, mihingte hih thupi ding a hongpai ahi chi hi. Spanish saint thupitak khat “May God deny your peace and give you glory” chiin thuum hi. Richard Cameron, Dragoons te’n a matlai un, that ua, a khut tansak ua, apa kiang ah a theilai hiam chi’n khak uhi. Apan ka tapa ( khut) ahi. Kata deih thoh tak. Pathian deihdan hoih hina e, chi in Pathian in a hoihna dia vaihawm ahi chih a thei hi. Mari hamphat na di’n Pathian in a tungah tungsak hi.

How useful was this post?

Click on a star to rate it!

Average rating 0 / 5. Vote count: 0

No votes so far! Be the first to rate this post.

Admin: Get in lamka

Get In Lamka - Digital Marketing & Information Services, Shopping site Lamka, Churachandpur, Manipur, Shop online at getinlamka.com, Read Daily news of CCpur.

Leave a Reply