HENU,  NALUNGTUP KAMOLSO THOU THOU DING AHI (Part-III)Kilungsetna Theng,Story by: Crosby Haokip(NT Staff)

HENU,  NALUNGTUP KAMOLSO THOU THOU DING AHI (Part-III)Kilungsetna Theng,Story by: Crosby Haokip(NT Staff)

0
(0)

*HENU,  NALUNGTUP KAMOLSO THOU THOU DING AHI (Part-III)*

“`Kilungsetna Theng“`

*Story by: Crosby Haokip(NT Staff)*

*Lhingboi* _“Heu na genthei na kave joupoi. Lunggim hih in kati hilou ham? Pakaiyin nakithopi dinga keile kanu eimanchah ahi tin sangin. Heu na mitlhi lon kave jou jipoi. Heu lunggim hih in nanao kei kaumna e.”_ tin eilhamon tan ahi. Lhingboi nu in kanu kijenna sumlut jouse ape in hitichun Hospital a kon in kahung pot tauvin ahi.

Lhingboi in kagentheina ho ahet jehin a on seh le eihung kithopi ji in insung a toh thei2 chuleh kongsop vonsop in jong eihung kithopi jin ahi. Nikhat Lhingboi ka in uva ahungin, _“Heu tuni le tuitha a vonsop in che hite, keiho vonsop ding jong atamin, nangle henu vonjong sop nange.”_ atin keijong kanomin vonsop dingin tuitha lam kajon lhontan ahi. Kalhun lhonin vonsop toh houlim katho lhonin
*Lhingboi* _“Heu masanga kanasei bang chun nahinkho thusim nei seipeh ta o kangainome.”_
*Keima* _“Nao leiset hi keidia deikip lalna leiset ahibou ve………”_ katin kahinkho thusim jouse abonchan kasei peh tan ahi. Kahinkho thusim ajahchun apona in amitlhi along tan ahi.
*Lhingboi* _“Heu nahinkho gentheina hohi kavet le nang kahin suh lhaset khah ding kati aja e ajehchu napap kipo thei ahie.”_
*Keima* _“Um2 chejeh a chu neisuh lhaset lou ding hichu o. Na kisei khah mong2 e. Ahivanga nangma man neihin suhlhaset ding kamu sa ahin”_ tin kadaiyin ahile
*Lhingboi* _“Heu tah2 kasei ahie, hibanga a na kilungset a ibola kahin suhlhaset ding hammo? Nang kasuh lhaset le ken jong nom kasah ding ngeitah a.”_
*Keima* _“Ahile nao neilungsetna chu ipi lampanga neilungset ham?”_ tin tot tobang tah tobangin kadong in ahile ajahchan
*Lhingboi* _“Ash heu nang vang hi o, moh lunga kalungset nahie ajehchu nagenthei intin, naphat intin chuleh(kabilkol a olchan a hinsei in) hoi kahin sah a…”_
*Keima* _“Cho kijon pachat angai hihe.”_ katile akhut jetlam in eihin chum in
*Lhingboi* _“Tah2 ahie heu nangin kei iman neigelhih jongle chun”_ tin ahung kilhaset hamin
_“Heu nangin kei nei lungset a?”_
*Keima* _“Nao nakilungset deh ta la kalungset jeha kanao banga nakingai to a”_ katile ahung nui in von kasop chai lhonin munkhat a katoukhom lhonin ahi. _“Nao kei henu dinmun la seithei ahitapon eidalhah nungle kahinkho man dingdan kagelle hahsa kasa e.”_ Chuin kakhut a tuhin
*Lhingboi* _“Heu thil jouse kahethem sohkeiye. Hijongle lungneo hih o ken na kithopi jing nange.”_ atin kalengkouva akingaiyin
*Keima* _“Nao ahile iti nei kithopi ding ham?”_
*Lhingboi* _“Heu na lungmonna dinga kaumpi jing ding nahie.”_ _“Heu kahin ngai ji vale ipi kati hitam? Nikhat namel mu louvin kaum thei tahihe.”_
*Keima* _“Nao nahinkho kahin suhgenthei khah ding ham kati ji e ajehchu kilungset hinkho hi kamang ngam hihe. Ajehchu nikhat le keidia losapna lampi hikha ding ham kati ji e.”_
*Lhingboi* _“Heu chutin gelhih tango thiljouse hi eiman iti imanchah ham eikhut a kingam ahibouve. Heu kilungset hinkho iman vangin na lekhasim suboi ponte keiman ijakai in natilkhou ving ting nakithopi jing nange. Heu kilungset hinkho mankhom pi lou dingin vang neigel hihbeh in ken iti hinkho kaman ding ham? Kei nangjal a bou lungmong kahibouve. Heu na??”_
*Keima* _“Ahile aphat phatin potan te na?”_ katin kalungset na kaseinom loujeh in akap in
*Lhingboi* _“Heu ahinai kei ima kahilou jeha kakinepna jong ima ahipon, kagentheina ding bep a lungset kahin chan khah nahitai e. Nahin dan le nachon dan ho kadei jehin chuleh na gentheina ho kavet le kaponan hijehchun seijoulou lungsetna kahin chan kha e chutia kilungset hinkho neiman khompi nomlou jongle akhoh poi. Koi in ba eitobang mihoi mo ima hilou hi alungset ding ham?”_ atin kap pum2 in akipat doh tan ahi.
*Keima* _“Nao kalungset louvin gelhih in nang hinkho gentheina joh hi ding ham kati ahi.”_
*Lhingboi* _“Kei genthei ding na kichat chu ahile kilungset hinkho mang khom le hen neitha ding ham? Heu genthei keima na pul hin dou mei tange. Nang jong nalungdei mi kiholtan. Ahinlah nahet ding khatchu keima kiseiphatna ahipon kei banga nalungset ding koima umponte. Keiman na lekhasim kasuhboi khah ding ham tia na lunggim ahin keiman Nang HENU koma ka u Minlal keiman hasema kakisem ding ahitin kana seiye. Chutia Nang in nang suboi dinga nei ginmo jongle… Kei chetange heu”_ atin hakan akapin inlam ajontan ahi. Iti kakham vangin anompon, kalungsetna kasei dohlou kagelle kakisih in ibola hibang loma lungneo kahim? Pasal lungneo dingin ima achan diu aumpoi tin kagelin kakisih in kalhi along mantan ahi. Hicheni chu kei dinga Black Day abang jengin kipana hinkho kamang thei tapon ahi. Lhingboi koma che a ngaidam thuma kalungsetna thusei ding bou kanom tan ahi. Nilhah khojin konin kingaito pum a kanatou petin Lhingboi nu ahungin
*Lhingboinu* _“Minlal Lhingboi hoiya um ham tuchanin in a ahung kile hih laiye”_ Lhingboi nu thusei kajah chun kalungdong behseh in Lhingboi kana suhlhaset chu kakisih Val tan ahi. Kalungsetna kasei dohlou jeha a chu kalungset louva agela alhaset valjeh a in a kile nomta louva munthip lahkhat a kap ahitai ti kahin hedohin kakisih lheh jengin ahi.
*Keima* _“Henu von kasop chai lhona chu aman inlam ahinjot hija….”_
*Lhingboinu* (Lunggim le lhisoh pumin) _“Minlal in chan nahung thah ji ding chula min khubanga nangai a nalungset a tua hoilang ihol ding hitam? Ajole thilse toh kha le ong.”_ Kalungim valin Lhingboi in toset ahin tokhah dingbou kakicha tan hitichun anu toh Lhingboi hol dingin kakipatdoh lhontan ahi. Kaginmona in jouse kahol lhon vangin kamu tapon chuphat in ken jong, “Henu nangin kani te inlang holin lang keiman kavonsopna lhon lang gahol inge”_ katin kei jong ka vonsop lhonna lang kagahol tan ahi. Kache le munthip lah a Lhingboi ka ogin kajan kache le kalungset pen laltah a ana ka chu kamun kapona behseh in kapomin, _“Nao lungset tahin neingaidam o, kahin sugenthei valtai. Kahin lungset nalom lome nao. Lhingboi hichana neilungset dingin katahsan pon nao ken jong kahin lungset e. Kithouvin cheta hite. Lhingboi jong kei eimu phat in akap in, _“Heu kahin ngaivale. Kahin lungsetna asange. Nei dalha hih o. Heu kilungset hinkho neiman khompi o”_
*Keima* _“Henge nao ken jong sot a pata kana lungset nahitai.”_ katin ahile akipah valin ahungnui in olchan kabeng ahinchop in inlang a kahin domphei tan ahi.
Lhingboi in eilungset Val jehin anule pan jong hoitah a kavet tup dingin eijol lhonin ajehchu kasuh lhaset kit le amale ama kimoh tha khahin te tia kicha lhon ahin ahi. Lhingboi hichan a kasuh genthei khah vangin kalungsetna ahetchen phatin akipahin jalkhun a lum kanu ahung boipi jin asilin, an aneh sah in hitichun genthei tahin a boipi jin ahi.

Insunga hahsatna tampi kahin toh in inchen vaichat jehin kanu koma, _“Henu Delhi langa company natongin che tange. Ajehchu igenthei Val lhon tai.”_ katile kanun _“Boi nang umlou va itihinkho kaman ding ham? Kagel thei hihbeh e. Kei keo hilouva Lhingboi in itihinkho Aman ding ham? Lhingboi ding kagelle ahahsa e boi.”_
*Keima* _“Henu kei le Lhingboi kikah chu keiman phaten seipeh tange lunggim hihin.”_
*Kanu* _“Chutia Lhingboi toh nakihou toh thei le ibola kada ding ham?”_ Kanun eiphat sah phat in kakipah in Lhingboi koma kache tan ahi. Kache le achangseh in anaumin
*Keima* _“Lhingboi”_
*Lhingboi* _“Kaume heu hunglut o. Kakipahe nahung, achuti loule nangkoma kahung got hija”_
*Keima* _“Lhing, inchen hahsat jehin Delhi langa company natong in che tange. Hitia hinkho iti kaman ding ham? Hijongle ana lungneo hih ta o.”_
*Lhingboi* _“Heu ahithei lou ding thusei hihin, henu damlou khu namoh dalhah jeng ding ham? Chuleh Ken jong hibanga nakingai a nangmel mulouva iti hinkho kaman ding ham? Kanom mong2 po e heu.”_
*Keima* _“Nao nei lungset ken jong kahe themin, Ken jong kahin lungset e. Hitia kingai mei2 a hinkho mangthei ihilhon poi. Lungtup imolso theina dinga Ken jong natoh na khatbeh kanei ngai ahi. Chuleh kache a natohna phatah kahin mutengle kahung kile ding hinkho a dinga kakipui pei2 ding nahi tai. Henun jong kajinei ding a ngahlal tae. Chuleh Henun jong nangaiyin nangaicha lheh jeng jie. Hijehchun kei natohna ding holin cheng ting kahung kile tengle nangle henu lungtup kasuh bulhit ding ahi.”_
*Lhingboi* _“Heu chuti ding ahijongle anangah meitange. Natohna hinhol loiyin lang namu2 le neikipui Kom tango. Ahivanga na pot nungle kahin ngai dingdan hi o.”_
*Keima* _“Henge nao natohna kamu2 le kahung kile ding kei, Nang le henu nomtah a ichenkhom diu ahi. Kache nung tengle henu hoitah in anavesui tango.”_
*Lhingboi* _“Henge heu nache na a hung vangphan lang kei le henu neihin sumil lhon hih ta o.”_
Kache ding Lhingboi jong anop phat in Delhi a che dingin Train ticket kakikah tan ahi. Kache ding konin Lhingboi in eingai lheh jongle hoitah in kalhamon in, _“Nao henu toh taonan neihin geldoh jing tao. Chuleh lungtup molso ding galdot pumin einangah jing ta o”_

Kache ni dingin Lhingboi in Imphal chan eihung thahin kilhalal tahin kei jong Dimapur jon dingin Blue Hills a katou tan ahi. Lhingboi kangai lheh jenge hijongle malam hinkho ding gelnan kei jong natohna holding in Delhi tolpi kajon tan ahi. Bus chunga kalung ahel valin kinungle dingbou kathanom tan ahi. Hijongle malam hinkho ding gelnan ngai jongle ngailou kisan Train in Dimapur a konin Delhi kajon tan ahi.

New Delhi train station a kaloipan einangah in keini jong Munirka ka jon pei2 lhon in, kaloipa toh kaum khom tan ahi.
*Keima* _“Lun ipi na katoh ding ham? Ipi toh thei2 aumdem?”_
*Lulun* _“Min toh thei ding atame, hijongle Delhi a Eimi hon alhangpia itoh theipen u hi Call Center ahi jenge. Kigong o tunilhah le Gurgaon langa interview natou ding ahi. Company manager patoh ka kihou sa ahitai. Kisonlal na ding ima aumpoi, English pao natho thei poule ahijenge”_ Hitichun kaloipa toh room khata kaum khom lhonin call center a na katong khom lhontai. Ahahlheh jenge jan pung 8 in ka kipan jiuvin jingkah pung 6 phat le kahung kile jiu ahi. Hitichun kaloipa toh nakatong khom lhonin inlanga kanu leh Lhingboi ngainan hinkho kamang mangtan ahi. Phone kanei lhon lou jehin inlanga Lhingboi toh kakihoumat theipon adam2 nadem? Eingai dem? Kanu adam2 nadem tin kakingai to2 jengtan ahi. Hitichun lhakhat lhingset kahin tong lhontan ka salary San masa pen in Nokia keypad khat ka chon Sim kakito in Lhingboi nu no kakoi chu ka type kinchel in ka call tan ahi. Ring a che in Chujouvin _“Hello”_ ahung kitin Ken jong _“Henu Lhingboi Uma”_ katin ahile _“Heu Lhingboi kahie nadam2 hinam o. Neihin call gei na lom2 e o. Heu kahin ngai nalom2 e”_ atin akipahval in thusei naman phat eipe tapon Chujouvin ahung thip chet in chujouvin ahung kap in
*Keima* _“Hello! Nao ipi nati ham? Ibola Naka ham?”_
*Lhingboi* _“Heu Henu dinmun… Heu Henu…”_ atin thusei theilouvin akaptan ahi.
*Keima* _“Nao Henu ipitiham? Damlou ham?”_
*Lhingboi* _“Heu Henun Nang aw kamcheng bou anga ahitai. Keihon kabon uvin kalha tauve. Nang nanga hinte”_ anti chun kapona valin nao kan kakap tan ahi. Kaloipa bath room apat in ahung chomdoh in _“Min ipitinahim?”_ tin eidongin ahin adonbut ding dan kahe tapon ahi.

Jingle aban anasim taute. A Sim jouse Pathen in phatthei boh tahen.

©2018, Crosby Haokip All Rights Reserved

How useful was this post?

Click on a star to rate it!

Average rating 0 / 5. Vote count: 0

No votes so far! Be the first to rate this post.

Admin: Get in lamka

Get In Lamka - Digital Marketing & Information Services, Shopping site Lamka, Churachandpur, Manipur, Shop online at getinlamka.com, Read Daily news of CCpur.

Leave a Reply