HOMOSEXUALITY KICHI BANG E? By Pastor M. Thangboi Zou

HOMOSEXUALITY KICHI BANG E? By Pastor M. Thangboi Zou

0
(0)

*HOMOSEXUALITY KICHI BANG E?*

*By Pastor M. Thangboi Zou*

Thumapui: Ei gingtute (Khristiantte) khu Leitung mite Tawndan a tawn ding maw, Laisiengthou gen bang a tawn dingte? chi theisiem lei ka nuom hi. Apeisa Kum 2015 laiin India Supreme Court in “Nei kibang Kitenna pen” damsung Thawng tanna leh Sum tampi lieusah (fine) ding ahi chin Thutanna (decision) ana bawl upen, India Thukhentu (Chief Justice of India) a sem Dipak Misra, Rohinton, Nariman, AM Khanwilkat, DY Chandrachud leh Indu Malhotra ten ningkum September 6th, 2018 ni’n Supreme Court of India in Inidan Panel Code (IPC) Section 377 in tam dan pen India Khuo-le-tui hina neiten zalen tah a zat ahitheina din phalna ahing bawlkhe tamai hi. Tami “Nei kibang kiten theina” mi tampi’n kipahpi in lawm hiel nan ulezong ei Gingtute die i Laisiengthou toh kikaal ahidan kikum khawm lei ka nuom mama hi.

Tunia khangthate adia buoina lienpen khat ahing hita man in, tamnah “Homosexual kichi bang ahiei? Gay Marriage kichi bang genna e? Gay Marriage hing kipatdan leh hing kipat khietna ziehte” mawltah in i suut dinga, tua zou chiengin Laisiengthou in phallou ahidan toh ikhupsit ding hi. Tamna igen dingte ahileh laibu tuomtuom leh internet tungtawn a kaikhawm ahi man in, get chingla leh genval a um leh Pasian leh simtu zousie kungah na ngaidamna uh ka hing ngen masa hi.

*1. Homosexuality kichi bang gen na adiei?*
Tamin agetnuom pen ahi leh, “mihing tahsa utna nei a, Nei kibangte ki-etlahna leh hip a um mite genna ahi” aki chi hi. Tami khu chini in akigen thei hi, tuote ahileh: (a) Homosexality- Behaviuor kichi khu, “lungsim leh tahsa mama uh ana zong sangte, akhawl thei nonloute (nu-le-pa thangtatna a)” gennan akizang hi. (b) Homosexuality- Orientation kichi khu, “Nei kibatpite etlahna leh lunggulna nanleh numei/ pasal umlouna a khat veivei tahsa utna pichina dinga kizangte akipan ahideu in” akigen hi. Tam banga khelna in vai ahing hawmna khat ahi leh tunia I Mobile zatte uh ahi, chin aki suut khie hi. Tam banga chindan hoilou a gamtatna ziehin Pasian in Sodom leh Gomorra khopi khu “Mei leh Kaat in ana gawt/ subei hi”, tuochi mabanga tam bang khelna lunggul a supi chingnuom a hinkhuo zangtute leh ana zong sangte kunga Pasian thangpaina leh gawtna mu diing ahi uhi, a ziehpen Khelna ahi zieh in (2Pet. 2: 9-10).

*2. Gay marriage kichi bang genna adiei?*
Gay kichi khu “Kipah” china ahimai a, hinanleh akizoppi thuteng zilin nei kibang pasal leh pasal kitengte kigenna ahi hi. Khuleh Nei kibang numei leh numei kitengte khu Lesbianism akichi kie hi. Gay marriage ahing kichi chiengin, Dan banga “Nei kibangte kiten phalna” (legalization of the gay marriage) china lam akawh hi. Tam nei kibang kitenna pen tuhun ahing umkhie hilou in, Rome Kumpipa Nero in asuohte (slave) khat ana kitenpi in, tua hun akipat hing um ahita hi.

*3. Gay marriage hing kipat khietna:*
Tam bang chindan hoilou pen Gamsung Dan (Law) toh kituoh a Nei kibang kitenna phal hun ahileh apeisa kum 2001 in Netherland gam a hing kipan khie ahi chin akisuut khie hi. Khelna in tawp hun neilou ahiman in Meikuong bangin gamteng ban Kaat in, tuochin Europe gam ah um Belgium gam ah kum 2003 in ahing kaa touta hi. Tuo zouin, kum 2005 in Spain gam ahinglut toukie hi. Kum 2006 in Canada gam leh South Africa gamten zong tam chindan kilawmloupi hinanleh gamsung a zuiding chin phalna ahing nei kie tamai uhi. Silhoi in masawn theilou bang zong leh sietna in masawn tou in tuachin 2009 kum in Norway leh Sweden ganten zong zuidin ahing phal kie tamai uhi. Leitung a teng mi koizong, apil amawl, ahau azawngten umna die agaldawt zing uh USA gamten zong ahingpom tamai uah, US gam sunga State 50 umte lah a 37ten aphalta ua, 13ten anuol nalai uhi. President Obama invang tam “Gay Marriage pen gam sunga zatdin phallou/ lemsapilou hi”. Mexico inzong phal pieh nanleh Mexico Khopi sungbou a zat din akiphal giep hi.

Koi khuo Kelham umtuonlou akichi mabangin, gamdangte ah igenlai un, itenna India gam sunga zong tami zatdia phutna tam um seng ata diei? Delhi High Court in zong alemsapi tamai hi. Singtang mite tuollenna Manipur (Sana Leibak) kichi azong ana kiphal hingei van, apeisa 25th March, 2010 in Leimayol Arts Centre Auditorium mun a Sabdeep Soibam (26 yrs) leh Nikhil Sharma (28 yrs) te mitampi mai a Gay Marriage zat ahidan phuon khietna nei in akiteng ta uhi. Khuleh kum 2005 kum in Chapi Karong a Sangsye nna kavasep lai in, ka mit ngel in Numei leh numei kiteng kava mu hi.

*4. Gay Marriage hing kipat khietna ziehte:*
Mipil leh siemte suut danin, tam Gay Marriage hingki patkhietna khat ahileh, pasal amau ngen umna a numei a kilawp mama uh akichi a, numei zong amau ngen umna a pasal ah akilawp mama uhi, akichi lai in mi khenkhatten, mani Nei kibatpite etlahna leh ngaina nei thei uhi. Tuate ahileh Sepaite, Thawnga (jail) sawtpi umte, Rebh. Centre a hun sawtpi umte, Hostel tuomtuom aumte leh amau chou mun khat a kikhumte’n tambang lunggulna neibei uh chin asuut khie uhi. *Dr. Collins* in agen dan in, “Mihing hi ngala, nei kibatpi ahiei, ganta bang ngaina, lunggul leh kithuopi/ pawlpi ahi” tami khu Homosexual ahie, tuona kipan in Gay Marriage ahinglut tou uhi, chin agen hi. Khuleh *Lawrence J. Hatterer* in “Changing homosexual in the male” chi laibu agelna sungah hichin ana gen hi. “Nute’n numei muonlouna leh zauhuoina a tapate uh a sinsah uh ahiei, a tanute uh pasal muonlouna leh zauhuoina azilsah chiengun naupang lungsim ah mani kibatpite lunggulna nei in um uhi. Nu-le-paten Sex thu zilsah himhim lou, mawhsana diing bou a gel leh tate’n amau a sil umte theisiemlou in Nei kibatpite toh genkhawm in, kithuoh khawm un, tuo thanga mi tampi alut kha uhi” chin ana giel hi.

*5. Hattuomte panla dan:*
Hattuom ichipen Jesu’n Kalvary Muol Sing Kross a a sisan toh aphukhiet ahi man in, leitung tawndan a tawn thei dingte ki hilou in, Lasiengthou deidan a tawn dingte ihidan uh Hattuom chin a tami Homosexual ahoilou dan i tangkoupi ding uhi ahi hi. Tuate ahileh:-

*i) Roman Catholic Hattuomte panla dan:*
Homosexual toh kisai Fr. Stephen Fernandes, Secretary, Justice, peace and Development, Indian Bishops Conference ah tam bangin ana gen hi, “Amasapen in Nei kibang kitenna leh kithuona, mi piching hiin pichinglou hitaleh khelna leh Dan kal ahi chi ka hing gentha kia hi. Catholic hattuom in mi piching kithutuo hinanleh uh Pasian in nupa kal a kithuona a bawl, itna a kigawmna tungtawn a ta leh nau nei ding a chi numei leh pasal kitenna toh kisai kikaal ahiman in kipawm theilou ahi” chin agen hi. Tualeh Micheal Jerrell in Catholic Hattuomte kungah thupie khautah khat abawl hi, tua khu ahileh, “Catholic mi-le-sa himhim tambang nei kibangte kitenna vatel/ panglou din hanthawn hi.” Supreme Court thukhenna in Catholic hattuomte peipi kitenna kaal ahi man in, a kinang/ dou hi, achi hi.

*ii) Southern Baptist Conventionte panla dan:*
USA Supreme Court in nei kibang kiten theina phalna abawl lai in, Russell Moore, President of the Ethics & Liberty Commission, Southern Baptist Convention in tam bang in agen hi, “Amasapen in Hattuomte patau sih un. Supreme Court in septhei tampi nei nanleh Jesu Khrist han apat hankhe theilou ahi. Ama ahing a, leitung pumpi a gam ahi” chin agen hi. Tami Dan (Law) in mimal leh innkuon tampi lungtang nasuna ahi tna chi zong ka thei hi, achi hi. Tualeh agenbe na ah, “Eima a um ginna det leh migitna, dihna hepina ah i dinkip ding uhi. Jesu Khrist hing zilsahte i gen ding a, Ama sepban isem ding uhi. Hingdoute tungah itna leh lainatna nei in, Hagau leh Khantanhoi nei in kipah tahin Zion i manoh ding uhi. Pasian leenggam zong sui vai. Khantanhoi ah ding kip vai. Pasian bou izau ding ua, khovel izau sih ding hi” chin agen hi.

*iii) MELC ten bangchi panla ding?*
Supreme Court of India in Date 6th September, 2018 ni in IPC Section 377 tungtawn in Nei kibang kitenna hing phalpia nanlezong, ei Mangpa Jesu sisan a leisa a hattuomten tami khu Laisiengthou Siemchilbu akipat Kihilna tan adihlou umlou chia gingta a pawm ten IPC Section 377 kipawm thei lou ding ahi. Aziehpen Pasian phukhietlou kitenna himhim khelna leh Pasian dan bohsietna ahi manin (Siem. 1:27, 2:24), tam anuoi a bang in itangkoupi ding uh ahi hi. Tuate ahileh:-
i) Homosexual toh kisai Khanglaite lah ah Seminar paper a la a tangkoupi ding ahi.

ii) Division chin a tami thu toh kisai Lamkaite hatkhawm a ahoilou dan leh i Hattuom in pawmlou dan hoita hilchetpi a, tami kitenna a ibuoilou na ding ua panla pi ding ahi.

iii) Pastorte leh Hattuom Upa ten tami toh kisai Sermon bang in kipe thei leh i mite adin damna hiding hi. Tami thu zumpi lou a, ei kunga um nai sih chi a genlou a koi vawt lou ding ahi hi.

iv) India Superem Court in phalnan leh ei MELC sunga tam bang chindan hoilou neite Hattuom in Ki-en maimai lou ding in, tua vaiguon a Pasian thaunu Pastor, Upate leh Hattuomte panglou ding, a pang aumleh MELC Dan kaal ahi chia koima maipha enlou a Nosuo ngam dia mansa ihi dan hangsan tah a talat ngai ding ahi.

*6. Laisiengthou leh Sawltah Paul in Homosexual agen dan:*
Tuni chiengin, leitung kivaihawmna’n tami Dan phalna pezong leh, ei gingtute a dinga kingapna ahiloudan, i thuginpi uh Bible in, tambang agamtate khu Pasian mitmu a kidah huoi leh gawt aum diingte ahidan, ana gente i en diing uhi. Tuote ahileh:-

i) Gay Marriage khu bangchituhin kigen hoi nanleh Pasian silguon kalna leh Bible zilsahna toh kikaal ahimanin hattuomten pawmthei hilou hi (Gen. 1: 26-30).

ii) Pasian silguon banglou tah a Kitenna/ Nupa hinkhuo (sex) zatpen azada mama a, tuochin Leitung a teng Mihingte Tuichim/Tuisang in Noah hunlai in mite ana gawt na khu Pasain zada mama khat “Pasian Tapaten mihing tanu melhoite am ua, adeite uh zi dingin akitenpi uhi” (Gen. 6:2) khu ahi hi. Tunia Nupa hinkhuo (Sex) zat hunlou a zangte tunga tambang Pasian thangpaina tung thei ahidan theisiem in, zangdih chiet din iki ngen hi.

iii) Pasain in Sodom leh Gomorra Khopi bangding a Mei leh Kaat ah agawt adiei? i chileh a ziehpen “Thanghuoitah a Nu-le-pa hinkhuo (sex) a pasal-le-pasal, numei-le-numei kipawlna zieh ahi” (Gen. 19: 4-5, Jude 7).
iv) Lungsiet Johan in Patmos Tuikuol a Mangpa akipan Mangmuhna (Vision) amu lain, hichin Rev. 21: 8 na sunga, “….Meipuohte, gingtaloute, numei leh pasal kaal a thangtatte tanding khu Mei leh Kaat Meidil ahia, tuokhu shi nina ahi hi” chin ana gen hi.

*Sawltah Paul in Homosexual agetdan:*
Paul hun in Asia Minor leh Europe mun tampi ah numei-pasal kal a khelna a uang mama hi. Adie in Korinth Khuo, Rome Khuo, Kolosa khuo leh kho tuomtuom ah Homosexuallity (Tokawhute) toh kisai agen dante tam anuoi a bangin muthei in aum hi. Tuate ahileh:-

a) Paul in Korinth hattuomte kungah Homosexual kitenna leh kipawlna phalna bangma apesih hi, “Sol in um sih un… kingaina thanghuoi abuolte, pasal kizuohte, tokohuaten Pasian gam luolou ding uhi” (1Kor. 6: 9-11) chin ana gen hi. Tokawhu kingai-kitenna achienzaw semna dingin Paul in Grik kammal azat, khenkhatte anuoi a ensuh nalai vai.

Kingaihatte (pornos) chia azat kammal “Pronography” kila khietna ahi. Tami khu numei-pasal guotang lim, numei-pasal kipawlna (sex) video etna leh zongsanna genna ahi. Milim bieh ahilou leh angkawmte genna in (moichos) chi kammal a zanga, tua khu “sum leh pai deina leh numei lunggulna” genna ahi. Mihuate (malakos) azang kia a, tua khu, “nem, sukhah a nem” china ahi. Tamin numei-pasal toh kipawlna a numei dinmun agenna ahi. Tokawhute (arsenoskoites) chi azang kia a “arsen” in aget nuom pen khu “pasal” ahia, “koites” in “lupna” agenna ahi. Tamin agetnuom pen ahileh, “pasal in pasal luppi” china ahi. Nei kibang kipawlna (sex) a pasal dinmun (male role) genna ahi. Numei leh numei kipawlna a pasal dan a pang genna zong ahi. Ganhing toh kipawl khu sil zauhuoi ahidan leh tha teitei ding ahidan (Pawt. 20:19) nana gen chieng mama hi.

b) Paul in Rome mite kunga Laithot anathot lai in, hichin ana gen hi, “Tuabangin pasalten zong numeite zahdan ngaina tawpsanin, huain aki enla ua, pasal-le-pasal zumhuoi tahin akizang tuo ua…..” (Rome 1: 27) chin anagen hi.

Tami Rome bung 1 na sunga Paul kammal zatte apat in Rome hattuomte siltuo, “A tahsa uh zumhuoipi a kipawltuona ding in lungtang in anei uh” achi hi. Tamna Grik kammal “Epithumia” a kizat zieh in, tamin agetnuom pen ahileh, “ngeinalou tahsa utna, nopsahna lunggul” china ahi. Tamna ngeinalou tahsa utna thoina “Homosexual” (tokawhute) khelna genna leh “lebianism” khelna hi in laisiengthou siemten asuut khie uhi. Homosexual khelna Pasian in mimal leh gam a gawtna khelna achi hi.

*Akhupsitna*: Homosexuality khu Pasian leh Laisiengthou deidan a gamtatna ahilou zieh in, tam bang agamta mite akhelna man khu ama bou in a gaa a at-sih diing a, a innsung miten zong, kho sung miten zong, Pasian thangpaina gawtna itan thei uh ahiman in tami thu ah pil vangta a hin apoimaw mama hi. Tunin eiten tami Homosexual thu a Seminar bawl pen zumhuoi nan i gel ua, i bawl ngailou zieh uh ata diei ma, tunin igam sunga tambang thangtatnan mun ningkawm chinteng adengsuoh a, itawpsan lou uleh Pasian thangpaina pen imaban diing ahiman in, mailam hun a Hattuom leh Organization a lamkaiten Seminar ibawl chiengun Paper khatin pangsa talei chin ikingen hi, a hoiloudan ikihil lou vang un, tunin tuomi theina diing in laibu tampi simthei din umta, thamlou in mit a muthei din Mobile tungtawn in umsiengta ahiman in, India Kumpi’n phalna pe zong leh ei gingtute thugin toh kikaal ahidan nasatah a itangkoupi lou uleh dachie I khanglaite tami thang ah hing aw va un, tua hun chienga a buoi dingte khu ei hattuom lamkaite ma ihi man un, tunia kipan tangkou kipan tavai, chin Pasian min toh ka hing ngen leh chiel hi.

How useful was this post?

Click on a star to rate it!

Average rating 0 / 5. Vote count: 0

No votes so far! Be the first to rate this post.

Admin: Get in lamka

Get In Lamka - Digital Marketing & Information Services, Shopping site Lamka, Churachandpur, Manipur, Shop online at getinlamka.com, Read Daily news of CCpur.

Leave a Reply