I HLAU SUH ANG U, LALPAN MIN ṬANPUI DAWN. -Rev VL Nithanga.
Get In Lamka Digital Marketing & Information Services, North East News

I HLAU SUH ANG U, LALPAN MIN ṬANPUI DAWN. -Rev VL Nithanga.

0
(0)

I HLAU SUH ANG U, LALPAN MIN ṬANPUI DAWN.
-Rev VL Nithanga.

Nangmahni dotute chu engmah lo ang an ni ang a, thil awm lo ang mai an ni ang. Kei Lalpa in Pathian hian, ‘Hlau suh u, ka ṭanpui dâwn che u,’ tiin in kut dinglam chu ka chelh dâwn si a (Isaia 41 :12,13).

Tunlaiah kan lei do, kan hmêlma min beitute ber chu Covid 19, hripui lêng hi a ni ber a. India chu khawvêla tuar nasa ber kan ni ta a, Mizoram pawh min luhchilh a, mi sanghnih chuang enkawl mêk kan lo nei ve ta. Mi 23 laiin mual min lo liam san phah ta bawk a. Phai lama Zofa awmten an tuar nasa viau bawk a, thihpui an awm ta nual bawk. Kan missionary-te leh kan Pastor-te, mission field lama awmte pawhin an tuar ve zêl a. Kan nunphung a buai a, a manganthlâk ta tak zet a ni. Kan chipuite leh kan rawngbâwlpuite ngeiin an veia, an han thihpui meuh chuan thinlung a na vawng vawng mai zawng a nih hi. Ringtute hian harsatna, dam lohna leh thihna hial pawh kan pumpelh thei bik ngawt lo va, kan tuar ve fo va, mahse, Lalpan min hriatpui vek a ni. Harsatna, dam lohna leh thihna hial pawh tawk mah ila, ringtute chuan a tuar dan kan thiam zêl a, Pathian tiropuituah kan hmang ṭangkai thiam zâwk mah zêl hi Pathian malsâwmna ropui tak kan chan a ni.

Ringtu tute pawh hian he hripui hi kan kai thei vek a. Dam lohna dang dang pawh kan tuar thei, thihna hial pawh kan chhûngkua hian kan tawk thei, kan la tawk zêl ṭheuh dâwn tih pawh hria ila. Chu chu khawvêla kan awm chhûnga kan chunga lo la thleng tûr vek a ni a. Thihna râpthlâk tak kal tlang vekin kan chatuan khawpui mawi chu lut tûr kan ni miau si a. Nimahsela, hetih laia kan hriat tur pawimawh tak Pathianin min hrilh chu, *”Kei Lalpa in Pathian hian, ‘Hlau suh u, ka ṭanpui dâwn che u,’ tiin in kut dinglam chu ka chelh dâwn si a (Isaia 41:13),”* a tih hi a ni. Kan Pathian chu a thuah hian a awm a. A thu min tiam thlâwn ngai hek lo va.

Tunah hian hripuiin min nuai mêkin mi tam tak enkawl mêk ni mah ila, hripui avâng hian chhûngkaw ṭhenkhatah thihna hial lo thleng tawh mahse, dam lohna manganthlâk tak kârah pawh, lusunna râpthlâk tak hnuaiah pawh, Lalpa chuan min ṭanpui ang a, kan kut dinglam chu min chelh reng dâwn a ni. Dam lote dam lehna tur kawng chu Lalpan fel takin a ruahman ang a, lusunte awm zêl dan tûr chu Lalpa fel takin a ruahman ang. An kut dinglamah Lalpan a chelh reng ang a, an hun lo kal zêl tûrah Lalpan hma a hruaisak ang. *”Hlau suh u, ka ṭanpui dâwn che u a, in kut dinglamah ka chelh tlat dâwn che u a ni,”* Lalpan a ti a ni.

How useful was this post?

Click on a star to rate it!

Average rating 0 / 5. Vote count: 0

No votes so far! Be the first to rate this post.

Admin: Get in lamka

Get In Lamka - Digital Marketing & Information Services, Shopping site Lamka, Churachandpur, Manipur, Shop online at getinlamka.com, Read Daily news of CCpur.

Leave a Reply