You are currently viewing INDIA Â DI’N MILZAWLO ZALÊNNI’
Pu Ginlalthuam

INDIA Â DI’N MILZAWLO ZALÊNNI’

0
(0)

🇮🇳INDIA Â DI’N MILZAWLO ZALÊNNI’ 15th AUGUST 1947🇮🇳

Aziktu: Pu Ginlalthuam
Lalgin inn
Mualngat innpi
Khualzinna gam

🇮🇳🇮🇳🇮🇳🇮🇳🇮🇳🇮🇳

Zalên gaalsât, haksat-genthei, thi’na tiang a la tuak tute zosia ja’na lianpên ka hun pia a hi.
India in zalênna a del hih 1857 kum vêl a pat hung kipan a hi. Zalên delna ziak ah mêlsia tak ah a la bawlnau hin Jallianwala Bagh(Amritsar), Punjab gam hile a huaisiat lâwina munkhat a la hi’.
13th April 1919 ni’ chun zia mun a hin Congress meeting lian tak a nei nau in mipi asang asing kikhawmte chuh British Sepoy leh Gora Sepoy te’n ha’nan in a la nang maleu nang zolo in, zia phat a chun, General Dyer in kâp chimit ding in order a sua khum ta a hi. Ziana athi amang akisukhate thisan chuh tui luan in aluang mai a hi. Zia gual tuk ah Zalênna sual ah mihingte hinna a manthâina en zolo in, Pu Mohandas Karamchan Gandhi, a vainung ah Mahatma Gandhi min vuah(Nampi’pa) London ah Round Table Conferance nei ding in Sarojini Naidu tawh a zuchia nau ah chun, British lam in tiin a la dawng ui, “Gandhi, khawvêl hih lîn kiling gual ah lahawling zing ahem?” Gandhi in le, “Khawvel hih keima’n ka chawklîng zo puai, mahleh chutna'(Chair) siam ka guan, a vanding ka suk tûp zaw kêi phât in a bawl ding dân ka hia tapua, zia phat chun, khualzinmi khat ahung vâk lut ah ei bawlpi tah ahi. Zia chutna hi kua zawk hi a neitu a hi diam?” Tichun, British lam inle tiin adawng kik ngen uh ahi, “Nidanglai in naupang a nu leh pa bei, khualzinmi khat in asikha, a innlam in akipui ah, a vâk piting in, zia chapang chun a vâk tupa thu’ manglo ding a hem?”
Gandhi inle tiin a dâwng kik ngen ahi, “Tulai in gucha leh suammang ka inn ah hungin ka thil nei leh lam ei hung gûk piak piak mai hi’;Sâptè, nang uh daan(law) gual in nawmang mai chuh pha hilo ahem?” Zia zaw chun a ki khuaikhen tau ahi.

Tup kibang, ngaidân kibang lo, Pu Gandhi kithuapi tu’, Pu Netaji Subashchandra Bose, Indian Civil Servant(ICS) a hihna’ dawilo in zalênna ding gaalsât ah kipan in German leh Japante vachial in Rangoon, Burma(Myanmar) ahung tun in Indian National Army(INA) hung phu’dawk malam in, India sak-sualam Manipur leh Nagaland gam te’ni hung nawh khum in, pu leh pa te’n a la minsak uh Japan Gaal(Second World War) chuh 1939 kum ah kipan ta’ hi mahlehle I gam in 1942 kum in I hia pan ua; Sâpte Gaal dopi ding in I nam pawsal hângsan tamtak in hinna a chân khawlaw pha’ ahi.

Zia hunlai tak chun, England gam hih Mr. Winston Churchill in Prime Minister a puak lâi tak a hi’n, India chuh zalênna piak hipua’na ti’n, a la gên a hi. A ziak chuh, ‘sanggil chem ah kilâh a hi’n, sanggil chem ma’ ah kivêng jing ding ahi,’ a ti’ a hi.

Mahleh, England gam kitêlpi’na(Elections) a hung um phât ah chun, Mr.Churchill a hung lawting zo tapua’n, Labour Party ah pat Mr.Atlee zawk a hung ting ta a hi. Labour Partyte tup leh ngi’m a hi leh khawvêl ah mihiamte umchan-khanchan kisântua lumlet hih a dawi uh ahi. Mr.Churchill lamte a hiu leh(Conservative Party) England lêngte’ umdân ah kivâipuak zing hih a tup uh a hi.

Chutichun, Mr.Atlee Prime Minister a hung hih phât in, India chuh ZALÊNNA 15th August 1947 kum in a hung peta a hi. Zalênna I hun mu’ ah pat in mipite kipâkna chuh gên guallo in a sâng ma ma ta; mihiamte hindân a ni’ ni’n a hung kitheng ta a hi. A diak in, ei thingtângmite a di’n kipâkna a sâng diak a hi, a ziak chuh, ei nam niamte hih suak(cooly) vanpua, nawp leh dah kibang ah eila mat uh chuh ZALÊNNA hin ei thaimang piak tah a hi (Lalpa Pathian chawihawi in um zing zing ta hen).

Chun, lêng leh laltè paithâk a hung hih ta’n, mipite kibang tak in zalên thaneina (Human Rights) I mangkhawm thei tau a hi. Government dêk a hilo nâk leh I nawp nawp gên thei, sep thei, bawl thei, guan thei chuleh thaneina( Human Rights) I nei bân un sa’khawna lam ah le Hindu, Muslim, Christian leh a dang dang hothei (secularism) ZALÊNNA hin ei guan piak ta a hi.

Zalênna hin ei thingtâng gam zosia hih zalên gam asua sak thei a hi. Zia nading ah chun, kitha’, kimat, kido, kigaal nate haisan/chawlsan in kipumkhat tak in i chênnau tânggam ah hin Lalpa Pathian dawidân gual tak in hinkhua mang chiat leu hin zalên gam chuh himailo ding a hem? Zalên tak ah Pathian hawu I tha’ a dam in, zalên tak ah sepkhawm ajâng/ anuam in, zalên tak ah nêkkhawm a tui in, zalên tak ma’ pumkhat-sakhat I hi’nau hih mawk in tawpda henla, sakhat I hiu e, ti’ hiamil puai tiu. Ziak ah chun, ZALÊNNA NI’ hung suak hih India â di’n milni him a um tapuai.

CHUUNNU GAM DAMSAWT TA HEN.
🇮🇳🇮🇳🇮🇳🇮🇳🇮🇳🇮🇳🇮🇳🇮🇳🇮🇳

How useful was this post?

Click on a star to rate it!

Average rating 0 / 5. Vote count: 0

No votes so far! Be the first to rate this post.

Admin: Get in lamka

Get In Lamka - Digital Marketing & Information Services, Shopping site Lamka, Churachandpur, Manipur, Shop online at getinlamka.com, Read Daily news of CCpur.

Leave a Reply