JESU KHRIST KUNGA NAUPANGTEPUIDIING AHIDAN(Leading a Child to Christ) Pastor M. Thangboi Zou

JESU KHRIST KUNGA NAUPANGTEPUIDIING AHIDAN(Leading a Child to Christ) Pastor M. Thangboi Zou

0
(0)

*JESU KHRIST KUNGA NAUPANGTEPUIDIING AHIDAN*
*(Leading a Child to Christ)*

*Pastor M. Thangboi Zou*

Naupangte Pasian kunga puilut ding amanphatdan chi thupi zangin anuoi a Point 1 apat thupi neu 3 zangin ka hing kaikhawm a, Naupang Sunday School Sangsyete ten thei a Naupangte Pasian thutah a puidin ka hing ngen masa hi. Tuate ahileh:

*Bangzieh a Naupangte Jesu Khrist kunga pui ngai ahiei?*
i. Jesu’n Naupang neute manthai diing deilou hi. Jesu tatna in naupang neute zong ahuom hi (Mt.18:19, 12:13-14, Mak 10:14). Naupangte Hagau mangthei ahi jieh un.
ii. Laisiengthou in amaute mikhial ahi achi jiehin (Rom 3:23, 5:12,19, Late 51:5).
iii. Pienpi/ Tahsa lungtang in Hagaul lam silte theisiemna aneilou jieh un (1Kor. 2:14).
iv. Naupangte Hagau manpha mama hi (Mt. 18:5, Mak 9: 37).
v. Naupangten atangpi in amau a diing bou in Laisiengthou sim in thutah kisui theilou uhi.
vi. Naupangte tunia I thuhilna leh puina in atangtawn hinkhuo diing uah kingah ahi hi.
vii. Naupangte zilsahna hun akikhelthei pai ahiman in, naupangte naupang ahilai un hundamna thu hil a Jesu Khrtist kunga puilut die ahun hoipente ahi uhi.
viii. Naupangte atangpi’n akingaingiem ua, aliente sangin hundamna thu asangbei zaw uhi.
ix. Pichingte’n Hagau anei bangin naupangte’n zong anei ua, pichingte Hagau amanphat ma bangin naupangte hagau zong amanpha mama hi.
x. Naupangte Jesu Khrist kunga puilut in a hagau guoh un hundam louin, a tahsa lam hinkhuo tanpha zong ahunkhie hi.

*Bang hunchienga Naupangte Jesu Khrist kunga puilut diing e?*

Mi khenkhatte’n naupangte naupang lai un hundamin umthei sihva, aneu seng nalai ua, hundamna thu apomthei tahtah nai sih diing uhi, chie gen pawl bang aum uhi. Hinanleh naupangte’n hundamna thu hoitah a min ahil leh hundamna thu pomthei uhi. Bang hun a naupangte Jesu Khrist kunga puilut diing ahiei chi tamlou anuoi a igen diing hi. Khumte ahileh:-

*J. Irvin Overholtzer* CEF Lamkaipan, “Naupangte kum 3 apan kum 5 kikalte hundamna thu hilthei ahita uhi” chin agen hi.

*C.H. Spurgeon* in, “Naupangte kum 5 a upa hoitah a hundamna thu nahil leh pichingte bangin a piengtha theita uhi” chin agen hi.

Hattuomte Pa (Church Father) *Polycarp kum 9* ahi in Jesu Khrist adin akipie hi.

*Spurgeon kum 12* ahi in apiengtha hi.

*Jonathan Edward kum 8* ahi in apiengtha hi.

*D.L. Moody a teirol* tungin apiengtha hi.

Naupangte’n mikhiel ahi chi athei ua kipan in hundamna thu hilthei ahita hi.

Pasian Hagau in amau nnasepna aveh hun chiengin Jeus Khrist kunga puilut hun ahi.

Amau a lunglutna nei ah aum chiengun tua hunhoi hahsuoh vawtlou diing ahi hi.

Vangam thu leh mishite hoi a pei diing ahi uai chia ahing dot chiengun hundamna thu hil hun ahi hi.

Naupangte neunou ahi ua kipan hundamna thu hil peidiing ahi. Amaute aneulai ua \shithei ahiman un.

*Naupangte Jesu Khrist kunga bangchi pui diing e?*

Naupangte Jesu Khrist kunga puidan leh pichingte puidan akibanglou deu ahi.A thugente ahileh kibang nanleh a gendan kibanglou hi. Ajiehpen naupangte theisiem thei diing a mawltah a gen diing ahi. Naupangte Jesu Khrist kunga pui diingdan tamlou enkie vai:-
i. Pasian Hagau in naupangte lungsim a nna aseptheina diing in thumna toh pangin.
ii. Hundamna poimaw ahidan theisah inlen, mikhiel ahidan zong genpi in (Rom 3: 10-23).
iii. Vangam thupidan leh anawp diingdan genpi in (Kih. 21:22).
iv. Vangam bangchi bangin nuomma nanleh, mikhielte lut theilou diing ahidan hoitah leh chiengtah in genpi in. tualeh ama zong mikhiel ahijieh a lut theilou diing ahidan genpi inlen, a khelnate amawltheipen a atheisiemna diing un genpi zing in (Kih. 21:27).
v. Pasian in naupangte it ahidan genpi inlen, tua ama a itna jiehin A Tapa tangkhat neisun Jesu Khrist in Kross a shi san toh na khelnate asawpsieng ahidan hilchien in (Isai 53:3-6, Kol. 2:14).
vi. Mangpa Jesu Khrist shina pat athawkiena in aman zong Jesu Khrist agingta leh shina pan kaithou diing ahidan genchien in (Eph. 2:4-6, Kol. 3:1-4).
vii. Jesu Kotkhah bul ah adiing a, Kot akiu a, koizong Kot honga alutsa nuom poumate kunga lut in teng nuom ahidan theisah in (Kih. 3:20) Jesu sang diingdan mawlta in hil in.
viii. Naupangte’n Jesu Khrist pomdin maw sol vawt sinlen, alungsim a Jesu a hundampa die sangnuomna lungsim anei ei chi dong inlen, asang/ apom nuom leh thumna neisah in. Hundamna pen Jesu Khrist gintatna jieh bou alut thei ahidan hil chien in (Eph. 2:8).
ix. Jesu Khrist sangte/ pomte Ama Jesu amuonhuoi dan hil in. Jesu’n “Ka hing nuasie sih dinga, Ka hing taisan ngai sih ding hi” chin Heb. 13: 5b agen hi.
x. Naupangten Mangpa Jesu Khrist ahundampa ah akisan jou chiengin ama khu Khrist innkuon mi hita (Christian family members) jiehun maw um maimai theilou ahidan hil inlen Jesu Khrist a khangtou diing ahidan hilzaw in.
xi. Naupangte adie hundamna ibawl chiengin Gawtmun (Hell) azauhuoidan uanggen sangin, amau mimal mikhiel ahidan akithei chienna diing uh genpizaw inlen, akhelna jieh ua gawtmun a lutdiing ahidan uh uang genpi zawlechin tuamin amau hinkhuo bawlhoi zaw diing hi.

*Naupangten Jesu Khrist ahundampa ah apom nadie Camp bawl diing dan:*

Lamkaite adiingin tam chielna khu naupangte kunga hundamna thugenna (Evangelistic message) leh houlimpina (counseling) kikaal gawmkhawmtu ahi. Tam chielna pen naupangte adin Pasian in apoimawte agenna diing leh Jesu Khrist hundampa a pomthei/ santhei nadie hunlem bawlna ahi hi.

*Akhupsitna*: Jesu Khrist kunga Naupangte puiding ahidan thupi tungtawn in adia a Naupang Nipi Sang Sangsyten theitawp suoh a isepna chiet ua pang chiet vai. Tuana sepna zong khu Missionary nasepna ahilam manghil sinlen theitawp hing suo chietdin Pasian min in ka hing ngen hi. 

How useful was this post?

Click on a star to rate it!

Average rating 0 / 5. Vote count: 0

No votes so far! Be the first to rate this post.

Admin: Get in lamka

Get In Lamka - Digital Marketing & Information Services, Shopping site Lamka, Churachandpur, Manipur, Shop online at getinlamka.com, Read Daily news of CCpur.

Leave a Reply