KHANGLUI TE HIKHIAL KHENKHAT APAT KHANGTHAK TE ZILSAK NA DI.
8th Jan 2021
Malai achun mi gensiat, muda, kithangsiat, ki-ipla, kihek, kitha- kimat I chin ziak un buai na chi tam tak ga chu kituaklo na leh kimuantua lo na a piang in, kitualthana tiang a tunsak sek ahi. A hatzo leh pauzo te’n a zawthei ding uh nei leh lam lakpiak thei ding te insung vai leh government court tiang in ala heksek uh ahi. Diklo tak ah gam kilakpiakna ala tam mama hi. Zia gual lungthim neu tak leh dan lo gual ah hatlo zawte chung ah hiamtatna ala tam mama hi. Zia gual hiamtatna khenkhatte vak suklat thei chu salam satsak, government jail ah kikawi, chanvo ding te thagum ah kilakpiakna leh a dangdang tampi gensen lo a um hi. A khang a khang in a thu chia in, khangsawn te kihilna ala gensek uh ahi. Zia bep chule hilo in, kitualthana tiang dinmun ala tungsek te ziak in insung leh khawtang damna a susia ahi. Ziakachun, insung leh khawtang damlo kawmkawm ah lungthim neucha put kawm ah kalsuanna te bangtik leh I gamsung in paithak in a um thei diam ti hih a ngakla um pen te lak ah pakhat in ka ngaitua hi.
