KINGAISIETNA BANGCHI SUHBEI DING E? (How to solve depression?) By Pastor M. Thangboi Zou

KINGAISIETNA BANGCHI SUHBEI DING E? (How to solve depression?) By Pastor M. Thangboi Zou

0
(0)

KINGAISIETNA BANGCHI SUHBEI DING E?
(How to solve depression?)
By Pastor M. Thangboi Zou

Tangtel: “Nou semgim leh puohgih pote zousie ka kungah hing pei un, Keima’n khawldamna
ka hing pe ding hi” (Mathiu 11: 28).
Thumapui: Tuhun a dia leitung a natna zau huoipen leh akisuhdam theilou natna khu
KINGAISIETNA ahi chilei igenkhiel diei maw! Nanleh asuhdam thei mi khat a um a, ama
khu Mangpa Jesu Khritst ahi hi. Tunin Kingaisietna umzie, bangzieh a kingaisie, kinagsietna
suhdam theina dia panla ding dan chite leh Kingaisietna suhbei theina hoipen Laisiengthou
pansan in tamna anuoi a mawltahin kikum khawm lei chin kahing kisah a, simsuo nailoupi
phun sinlen, simsuo phot in, na phat tuompi khamaw lou ding hi.
Kingaisetna (Depression):
Tim Lahaya in a laibu gelna “How to win over drepress” chi sungah chi 3 agente
ahileh (i) Lungkietna (Discouragement), (ii) Lungzinna (despondence) leh (iii) Kinepna bei
(despair) chin ana gen hi. Tualeh Dr Thomas Holmes (Prof. of Psychology at the University
of Washington School of Medicine) a sem ahia, aman kum 25 sung asuichetna (survey) apat
amukhiet dan ahileh, mihingte’n i siltuote apat “Lungzinna leh kingaisietna a selam a
akhandan tambang in percentage ana pai hi” tuate ahileh:- (i) Azi/ apasal (innsung mite) shi
zieh in kingaisetna 100% (ii) Khamthei bawlsiet in kingaisietna 65% (iii) Nupa kikhenna apat
kingaisietna 73% (iv) Damsung Jail tang dingte apat kingaisietna 63% chi a dang dang tung
jou chin asuikhie hi. Aman agenbe na ah, “Lungsim natna zousie kibang suolou, nanleh
lungsim natna zousie a bul tung a i suhdampai lou leh mani kithana (suicide) tan chieng tung
thei ahi” chin agen hi. Leitung a misiemte, mihingte shidan research abawlna ua pat amukhiet
dan ahileh, “Gal (War) kidouna a shi, Accident a shite sangin, kingaisietna zieh a ama-le-
ama kithat mi tamzaw” chin uhi. Leitung a kingaisietna zieh a kithat mihing 1 Million aval a,
Lithuania gam khu a khatna, S. Korea anina, Japan a thumna, aki chi hi. WHO in Geneva a
2012 kum a aphuon khietdan in leitung a ama-le-ama kitha tamna pen khu India ahi, achi hi.
Mani kithatte 80% khu kingaisietna zieh ahia, 85% te khu Zu ngawlvei (drugs addict) plus
kingaisietna ahi hi.
Bang zieh a kingaisie?
Kingaisietna kipatna bulpi tami ahi chi thei ding a um sih a, nanleh ahing kipatna
bulpi dia ginmmaw ahileh, “Lam-etna bei, panpitu umlou, Tup muolsuo lou zieh, nulepa kaal
a thangtatna, khamthei addict zieh a, leibat hau zieh, khatvei thu a sil zousie ngaituo, a
ngaituona kem zoulou, a theina leh ama dinmun kituolou zieh, kim-le-pam leh adang dang”
chin asuikhie uhi. Kingaisietna zieh a kithatte 55% khu khanglai kum 11-13 kikal ahi tangpi
uhi. Kingaisietna zieh tampi genthei ding a um dinga, tuate lah a kei mimawl mukhiet dan
ahileh:-
a) Na Tate toh Hun nazat tamlou zieh:
Tulai nulepa tampi a tate khankhuo ding gelnan, sun-le-zan a Sum sui in, tate toh hun
zangkhawm manlou atamta ziehin, a tate un lunggimna, buoina atuo chieng ua, anulepa
kunga kup ding nuom nanleh anulepaten hun pelou ahi chiengin, kholai a alawm-le-guolte
kunga aget chiengun, alawmten zong alawna ding thei tuonlou un, Khamthei toh ana henem
ua, tua khamthei ahing bawl kha chiengun, nulepate a tate khu Ui hou a hou in, mudah tami
akipat tate atawmzaw in kingaisietna hing nei uhi.
Tangmi tomkhat: Pa khat in tanu khat anei a, apan atanu khankhuo ding khuolnan zing-le-
nita in sum sui in akuon a, atanu ngaisah manphiel lou in a um hi. Ni khat atanu in apa kunga,“Pa aw, Ha khat in Sum bangzat na law zou ei?” chia adot leh, apan, naupang tuate nang kan
ding hilou, achi san hi. Tomkhat zouin, atanun, Pa Hata khat in bangza na law zou e? achi kia
a, apan zong amasa a adawng ma bangin adawng kia hi. A tanu’n zong pa Ni khat inla? achia
adoh kialeh, aget ngaima in agen kia a, atawpna atanu zong Pa Rs 100 hing batla sah in, achi
a apan zong tua Rs 100 apia a, aman Rs 100 ana khawl toh Rs 200 toi in apa kunga Pa tam ka
sum Rs 200 la ineln, Na Hun Naikal khat hun hing zatpi in, chin apieh hi. Tami apat bang
lunggel na nei ei?
Job in, “atate adin niteng in Maitam abawlpi zing hi” (Job 1: 5). Job in, nisim in
atate ading Maitam abawlpi zing ziehin, Job tate kingaisiet uh chi muding umlou hi. Dr
Holmes gen bangin, “Lungsim natna zousie kibang suolou, nanleh lungsim natna zousie a
bul tung a isuhdam pai lou leh mani kithana (suicide) tan chieng tung thei ahi” chi kho
geldoh in. Sum-le-pai, Nei-le-lam sangin na tate itzaw in, nei-le-gou, sum leh pai mansuo
zong lei nuamu khia thei ahi a, nanleh na goutan na Tate hinkhuo akisiet a ahing kingaiset
vangla uleh, nang zong buoi veve ding na himan in, atam theipen in tua dinmun na tung man
na tate toh Hun zang tam lechin, na innsung ah kingeisietna kiem din ka mu hi. Na taten
abuoina, alungkhamna na kunga aget theina din amaute toh hun zang tam in, tua ahi sihleh
kholai a alawm, aguolte kunga tung man u’leh sietmpha joulou ding na hi hi. W. Sangster in,
“Pate (nulepate) innkuon a kilekiadan athei masangsie un, a innsung khu alawsam zing ding
hi” chia agen pen hoitan ngaituo tha in aw?
b) Na tate thugen ngaisah in:
Kingaisietna kichi tha khat thu hing tung hivawtlou hi, akipatna tampi um ngei ding,
nang ngel in zong thei va te! Kei mimawl suikhietdan ahileh, “Nulepa ten a tate thugen a
ngaisah lou zieh” hidin ka mu khie hi. Azieh ahileh, na taten thu-le-la ahing dot chiengin,
naupang thudot hat chin ngaisah lou in koi vawtsin, tua na ngaisahlouna in, na tate lungsim a,
ka nu, ka pan ka thugette hing hilchien nuom lou, hing ngaisah nuomlou chin a lungsim uah
akem den ua, ang pichin chieng un zong, na kungah bangma ahing kup nuom nonsih ding
uhi. Aziehpen tamveipi nang na ngaisahlou zieh in.
Nulepate aw, Hotel a thumanlou teng a nang buoipi a “Politic thu leh adang dang” na
ngaikhaw sangin, na inn um na tate thugen ngaikhaw zawlechin tuamin na innsung humbit
zaw ding hi. Nang lou in politic vai apeithei dinga, nanleh nanglou in na innsung pei theilou
ding hi. Na telpen pen khu a ga na mu ding hi, Politic thu maw, Na tate hinkhuo ding, tel in?
Mathiu 11: 28 nan, “Nou semgim leh puohgih pote zousie ka kungah hing pei un,
Keima’n khawldamna ka hing pe ding hi” achi hi. Tami tomkim in gen chien vain
Laiisengthou toh Kingaisie mite ihan thawn ding hi.
Tamna “Semgim” tamin atup ahileh, “Semgim seng zieh a sawlsam vei” ahilou leh
“Sunglam buoina (piengtha nailou)” ahichin laisiengthou siemten asui khia uhi. Tualeh
“Puohgih” ichi kia leh, Muthei a polam buoina “lungkhamna, mangbatna, kingaisietna leh
adang dangte” ahuom hi, chin agen kia uhi. “Ka kungah hing pei un” Mangpa Jesu’n a
hinkhuo a hamsatna, buoina, lunggimna nei zousieten Ka kungah hing pei un, Keiman
khawldamna ka hing pe ding hi, achi hi.
Kingaisiet mite aw, na lungkham-mangbatna toh Mangapa kungah kipelut u’lechin,
Aman na buoina zousie hing suh vengpia mai ding hi, aziehpen a thumchiem a ginum pa khu
Ama ahi. Pasian khu muontah ahina Laisiengthou ah envai:-
i) Zau sinlen, lungke vawtsin, Mangpa’n ang umpi ding hi (Josh. 1:9).
ii) Hing han un, ka hing dawng ding, Mangpa’n achi hi (Jer. 33: 3).
iii) Leitung tawp dawngin na kunga um ding kahi, Mangpa’n achi hi (Mt. 28; 20).
iv) Lungke sin, Ka dihtatna khut zietlam in ang tudet ding hi, Mangpa’n achi hi (Isai 41: 10).
v) Zau sin, na min in Ka hing hanta hi, Mangpa’n achi hi (Isai 43: 1.b).
vi) Nun ata nawi neilai manghil nanleh, Ken vang nang kang mang hing sih ding hi,
Mangpa’n achi hi (Isai 49: 15).
vii) Na lunggimna zousie Pasian tungah nga in (1Pet. 5:7) tamte hoitan chiemte in aw?

Akhupsitna: Kingaisietna subei nadin amasan Nulepaten Tate toh Hun zat tam apoimaw a,
Politic thu sangin, na tate thuget ngaisah zaw lechin na innsung ah kingaisietna kiem beipen
ding hi. Sum in na tate hinkhuo ahumbit zou sih dinga nanleh na tate toh nah un zatkhawm,
amaute thugen na ngaisahna in humbit zou mama ding hi. Nu Eleanor in, “Nang lem sahpina
lou in koiman ahing suh lunggim in ahing kingaisie sah zou sih ding hi” achipen dih mama
hi. Kingaisietna pen shipi thei natna hizongleh, adamsah thei Jesu Khrist a um hi,
Halleluijah!!! Mangpa Jesu’n a aw-nem toh, “Nou semgim leh puohgih pote zousie ka kungah
hing pei un, Keima’n khawldamna ka hing pe ding hi” chia ahing hanta manghil lou in akung
zuon chiet lei, mani kithana ichite Aman beisah mama ding hi, tuami adin Nang Jesu kung na
zuon ngam ta diei? Zuon in kisieh sih vateh! Kingaisietna hinkhuo akipat zalenna nei chiet
tadin, simtu zousie Mangpa Pasian in A thu i kikupte a kipat hing guolzawl chiet tahen.
“SUM sangin na tate itzaw in, Politic thu naza tam sangin na tate lunggimna thu
zatam zawlechin, na inn sung a kingaisietna kiem bei pen ding hi.”

How useful was this post?

Click on a star to rate it!

Average rating 0 / 5. Vote count: 0

No votes so far! Be the first to rate this post.

Admin: Get in lamka

Get In Lamka - Digital Marketing & Information Services, Shopping site Lamka, Churachandpur, Manipur, Shop online at getinlamka.com, Read Daily news of CCpur.

Leave a Reply