KON MISS LUA!    By: M Liankhansiam

KON MISS LUA! By: M Liankhansiam

0
(0)

KON MISS LUA!

IHMU THEILOU... By: M Liankhansiam
By: M Liankhansiam

By: M Liankhansiam

Nitaklam ninem hun laitak ahi. Sunnitum a inn a om khinta ka hihman in ka ning a kitel mahmah mai a, banah, lup maimai nasep pipen a neikha suak ka hihman in ka chim petmah hi. Sep ding gelkholhsa bangmah neilou ka hihman in ka sun ihmut ziak a thabei, nguai mahmah leh gik keihkuih a ka kitheihnate khempeuh thengsak ding in ka kisa hi.

Bathroom ah ka lut a, kholum luat ziak a ka pumpi a kho-ul gim nam ka hihman in sahbon tellou in ka va kihahsiang masa a, huaizoh in ka kisa a, park manoh in ka pawtkhia hi.

Lampi a paikawm in ka lungsim ah a hithei ngeilou ding leh a tak a tungthei vual ding leng hi nawnlou duhthusam khenkhat ka samsuk kawmkawm hi. Lunggelna bel a kidang law lawmlawm kei! Huchibang a ka kingaihtuah dedu hunte bangleng nitaklam teng a ka nasep thupipen khat a hihman in kei’ aa ding in bel ngeina dan khat leng a hiphot mai hi. A khenchiang in hun paisa kum 2/3 khawng ka sutkik zel a, lunglenna leh khasiatna lou zaw ka tan ding a omkei!

Ahi a, hinkhua a haksa ka sakluat gige leh hon dahsak theizel khat bel thudang hilou in ‘Hunlui Ngaihna’ a hilel hi. Hunlui ngai vungvung a hinkhua ka zatna a sawt chiang in ka taksa leh lungsim in a thuak nakthei mahmah mai a, huchih hunchiang in a hoihpen hi hetlou na pi zu tamlou va dawnzek a ihmut vengveng ding, chihpen ka ngaihsutna a hikha pahpah sek hi.

Huchia kholai pawtkawm lah hi, zu buklam a ka paisuk kawm bang in Pathian laa khenkhat bang ka sasuk hauhau zawmah veh! Hundang in bel ka pau theihtamlouh man in kei kia in zu ka dawn theikei(a lei didan ka theihlouh man in)! Tu’n bel “quarter/half dedo” chithei nemnum sam ka hihman in kei kia in ka kuansuk hiauhiau lel veh!

Lampi ah nungak melhoih pipi leh etlah huai theiphial ding khop a kicheisiam tampi ka tuaksuk zawmah a, ka nitaklam lunglen khitkhiakna ding in bel a hoih huntawk mahmah mai uh! Huchibangte pen taksa utna suk pichinna ding in lunggel nei hikei mahleng pasal khat hihziak a ka mittai saktute a hihman un ka lunggel leh ka puakgikte hon dawn zangkhai thei uh a hizaw hi.

Zu zuakna ka va tung a, tamlou ka dawnkhit in zing ann ka neklouh ziak a hi diam kham chihtak in ka kham a, ka mit inleng khua a muthei nawnkei phial hi. Tam dawnlua zaw hilou hiveng aw, ka chi a, lah khawphawklou phial in ka om a, ka buaise dektak! A ngolvei lah hizen lou ing a, hiai a vaite’ muh a khamsia a om ding ka utlouh man in ka pawtkhe tou a, ka khut langkhat a ka zu dawnbang tawi letlat kawm in lamlianpi dung ah ka paitou nelhnelh hi.

Saulou ka paitouh nung in ka chii bang hong liing deldel zawzen a, ka zing ann neklouh ziak a hichi bah keive maw, chi in khapet zen in ka paitou a, ka kho-ul nel bang in leng hon pumbuah hial hi. A khenchiang in ka khuk sawnkawm in lamnawl ah ka kundedu zel a, ka thil dawn in nopsakna sangmah a haksatna hon tunzaw maimah a hihman in inn a kipan ka pawtkhiak bang ka kisik tuntun hial hi.
Zu kichi zalentak in kimuthei mahleh home delivery bawl hiallou a hihman un pawtkhe kei peuhleng dawnkha lou ding, pawtkhe lengle zu zuakna mun va tungsuk sese keileng ka haksatna kibehlap lou mai ding a hihman in kei-le-kei bang ka kimohsa mahmah thepthup veh!!

Awlawl in ka ngap dandan in ka paitou zel a, a chang in ka tawilai pen ka dawnkawm zel hi.

Munirka Tempo Stand(nidang a munirka metro station a om ma a Hauz Khaz a metro delh dekchiang a cheng 10 lel a tuan theihna gari, paupu auto-te toh kibang, hilehle a design chu tuam mahmah, peithum nei, mi 10 a chin keileh taikhe vetlou chihdan ahi) ka tuntouh tak in huihvot hong nung hiauhiau a, ka khamsiatna hon dawn zangkhai petmah! Tomchik lampi gei ah ka tutkhawl a, huihvot dikdek kichi Delhi a nung mengmeng lou a hihman in aam mahmah kawm in ka tuap dimzen in ka diklut kuaikuai hial hi.

Sawtlou nung in huih ngeina a hong nung nawnpah a, lum huthut maimah a hihman in ka dingkhe nawn a, awl in ka paitou leuleu hi. Hiai hun in bel ka zu dawn a beita hi. Ka zuthawl lampi nawl khat ah ka paizat a, kuaman huchidan a paihmawk lou a hihman in a kilang chiang ngial veh!

Anupam Restaurant mai ka tuntak in veilam a kihei in ka paiphei leuleu a, innlam zuan ka hi hia, chih leng ka theibun naikei lai! Kholak ka pawt chiang a ka inn zotna lampi himahleh hiai hun in bel inn a pai ding lunggel in leng ka neikha nai hetkei!

Khua lah mial ding in a kisa ta a, street light vak philphial zawmah a hihman in ka omnate’n ka pawtna ding ka genlouh ziak a hon lunghihmoh ding un ka muangmoh thepthup a, ka zu khamluat ziak a khomial nung a kholai a kivei nilouh mawk lah hithei ka sakei zel a, lungbuaitak in ka paizel a, a khenchiang in dawr a van kizuakte leisawm hileh kilawm in ka dak loplop kha hial hi.

Ka zu dawn lah khamse sim, hi meimuai kawm a ka pai pheiphei leh ka maizawn ah nungaknou melhoihtak mai, ngou hihhiah leh kisaput litlet khat leh pasal khat van leisa tamsim tawi tektuk kawm in hong paiphei uhi. Kiphukha ding ka batsim man un keileng a lampi side langkhat lam ah ka kiheikhia a, himahleh huai mi nihte’n leng honna galmuh manta a hihman un kei kianglam naih ding in hong paiphei zawsop uhi.

Ka zum tha a suak petmah a, hundang a hichi bang a hon mukha ngei lou a hihman in huai nungaknou in hon houpih khak ding ka laugu mahmah mai hi. Inn a kipan ka pawtkhiak sese bang ka kisik petmah mai a, a hihziak in ut leh utlouh gentheih/teltheih a hih nawnlouh man in ka kituah chiang ua ka gen masak ding leh ka gen nanung ding saikak in ka paiphei kawmzel hi.

Ka kituak petmah ua, huai nungaknou bel nidang a a melhoihna leh a ngaihhuainate nengchik mah leng a kiam naikei hial! Ahi lel gen in, kum tamlou paisa a itna ka na piaksa, ka haiman leh ka thikthusiatman a ka itna uh buching zoulou a om a, khovel a omlai a hih leh hihlouh nasan ka theihphak nawnlouh ahi(kithuzak nawnlou, chihna).

Hunkhat lai in ka itpen ana hi a, tuhun in bel ka theihngeite khat bangmai a hita! Hunkhat lai in ka ngaihpen ana hi ngei a, tuhun in bel zomi nungak melhoih mahmah khat a hilel! Hunkhat lai in ka hawmthoh leh ka duat penpen ana hi a, tuhun in bel ka meltheih ngeite’ lak a khat banglel ahi!

Zumna leh kisuanlahna in ka dim a, Lengtong Pauno’ laa khat a “Hibang liang a zuanna ding’ bang ding’ mel kong muse hiam?” chihbang ka lungsim ah a hong suak maimah aka! Zumluat man a lunglenf khamawk!!

Gensau zek maileng, amah toh ka kikhenna ziak uh thutuampi ahi a, himahleh kenbel khovel a itna khatkia ka neih amah ka na piaksa a hihtak man in it-le-ngaih dang neita mahleng amah ka itna zah in tua ka ngaihzawngnu itzou taktak hi in ka kithei kei! Titanic laa “My Heart Will Go On” chih laa a second verse “Love can touch us one time and last for a lifetime…” a chih ana zuifuh lawkha chu ka hi peuhmah hi. Tua ka itna neihpen zulhzauna toh kidim, ka chihna bel a hi zenhouh kei! Himahleh ka lungsim tawng a itna khatkia ka neih a hihman in kamvang in a utpeuh a genkhiak hang in khatvei mansuah pen damsung daih ding ana hi maimah hi.

Hunlui sutkawm in amau kianglam ka naihphei a, ka kituah tak un thudang bangmah ka kikup ma un huai nungaknou in, “Siam, bangziak a zu na dawn la?!” hon chipah a, ka dawnkik dingdan ka theikei! Kundide in a mai ah ka ding a, ka zu kham teng bang huai dotna ka zak ziak in the betkhiak a bang hial hi. A kitonpihpa leng kei’ aa di’a midanglua a hikei a, huai nungaknou aa di’a leng a tongsan ngaihnou bel hilou ahi.

Ahihhang in a mai ua ka dintak in a nih un ka zahtak mahmah mai a, ka om dingdan leng theilou ka hihman in ka khut tegel in ka mai ka hum hial a, zumna leh kisuanlahna in ka pumdim hi. Bangmah ka genkik ma in, “Siam, ana hichichi nawnken, kon chi hilou maw?” khase mahmah kawm leh aw liing pilhpilh in a hon chi a, hiai hun in zaw ka kidek zou nawnkei! Ka kawiphei a, aman leng hon nialkei! Lampi lai himahleh zumna leh zahtakna nengchik leng ka neizou nawnkei! Ka kawikawm in, “Na vang mubang kong ngaihluat man hi ngaihnou aw…” chi in ka kidik hithit maimah hi.

A tonpihpa’n bel pau hetlou in honna ngak nginget hi.

Tomchik ka ki-angkawi nung un bangchidan a Delhi hongtung kha mawk a hiam, chih ka dong a, aman leng hong phakna san uleh maban a a tup-le-ngimte kilawptak in a hon genkhe zungzung pahmai hi.

Minu bel a inkuan ua Delhi a hongpai zual a hi ua, India khopi dang khat a paisuak sawm, hiaimun pen ni 2 tam ding lel a hong tawnkual zual lel uh ahi. Banah, zingkal chiang a baihtak a kipankhe nawn ding uh a hihman ua van poimoh tuamtuam leh nektheih khenkhat lei a Munirka hong hohkha ahi a, a zintunna uh bel Munirka a kipan kigamla lawlou, Kishangarh ahi.

Kenleng kilawp takmai in hichi’n ka dong a, “Ahihleh tunitak in kong zuisuak ding a, na zintunna uah tuzan i kithuahkhawm ding ua, zingkal chiang in kenleng Airport tan kong kha diam?” ka chihleh ka zukham luat ziak a huchia pau honsa hileh kilawm in hon en heihoi hial a, ka kisuanlah luat man in bangmah hon genkik ma in, “Ah! Ka chih maimai hi…hehee” chithak kawm a kiheikhiaksan ka sawm leh, “Siam, nang zu khamlua neivoi tua! Denchiah U Min(a Ute lak a khat) in hichia na om hon theileh hon hehsan law di eive!” hon chi khialkhial a, ka kisuanlahna a kibehlap semsem hi.

“Aw… Huchi a hihleh tua na van lei ding uh omlaite bek i va leikhawm sam ke maw leh? Sawtpi nung a kimukha thei i hih kia hilou a, bangchik chiang in i kimukha nawn dia chih lah theihbut hi nawnlou a hihchia kon aamlaw vele!” ka chihphut leh a nuihmai hon suahcheuh kawm in, “Ei khawng nimnem toh hun zatkhawm di ut na hihleh a poi zenzen di hia!” hon chi a, ka nui nalhnalh tuak hial uh aka!

A van lei ding uh omlaite dawr tuamtuam a enkual kawm in ka houlim kawmzel ua, kenbel a kiang a ka omsung aamlua ka hihman in ka itna thu leh amah ngai a lungzuan ngaihtam ka sialdante bang ka genkawm zel a, ka lungsim a ka gen ut a tamluat man in ka pau tottot kha hial veh! Ka lungsim ah gending thu tam in a tam maimah a, himahleh singdang anglai belta hi di’a gingta ka hihman in ka utzah leh ka lungsim a thu omzah bel ka genkhe ngamkei! Ahi a, amah ka itna pen midang kuamah kiang a pesawn theilou ka hihdan leh chikmah chiang a mangngilh theilou ding ka hihdan bel ka gen thithe hial!

Khua lah mial petmah ding hita! Street light-te lah vakpha semsem, hun in lah ngak neilou a hihman in ka om tengtung kha hial a, ka pumbuai ahi penmai ding e! Ka gennop a tam a, ka theih ut a tam petmah! Amah lah sawtpi kholai a om khinta a hihman in gimchi mahmah ta zawmah a, kei’ paunuam tuk in hon houlimpih tamkei hial! Ahi a, kholai a pawtna gimlaw lou hileh aman leng hon gen ut thu tampitak om a hihdan bel khutdim a van khai lenglung hi zenpi ka khutban langkhat a a kiluaidet dan a kipan in ka haih hetkei!

Hon khelah mahmah sam a hi ngei ding a, a van lei dingte uh ka leikhit vek tak un, “Siam, momo na duh hia? I va ne di uam?” a hon chi a, kizekai sak nuam a hihlam theipah ka hihman in ka nial sese kei! A mi tonpihpa’ bel inn pai utgawp a hihdan kilang chiang mahmah mai a, himahleh mipa’n leng bangmah a genkei!

Momo lei ding in ka thum un ka kizuikhia ua, momo zuakna ka tuntak un, “Siam, na manleh tua ka zin tuna uah nong hohmai diam? Kon ngailuaa…” a hon chikhe phut a, huchibang kampau za ding a leng kinem nawnlou lua ka hih banah, denlam a ka kinget lai a hon dawnna ziak in tua a thugen pen ka bilkha hi ding in ka muangmoh hi.

A dotna ka dawn zoklouh tak in, “Siam!! Ut lou maw?” hon chi thak a, ka kiguih hial veh! Kenleng, “Den a kon gen masak in U Min paulam in non nial a, tua hiai non chihthak leh ka bilkha hi di’a ngaihsun kha ka hi…hehe… Awle! Kong hoh lawtel di! Nu Ching(a nu) le a miss huai gawp a, kimuhkhakna ding hun lemchang a himai di chu!” chi in a nu bang ka paulam kha hial veh!

Momo nekawm in thu vantang ka houlim zek ua, khua lah mialsiangta a hihman in hun paihat ka sa petmah! Kimukha baih deuh hi le ung zaw zu kham nemnom a omlou ding ing a, lungzuan ngaihtam ka sialte bang leng tua sang a nounel zawtham a genkhe theilai sam ding ka hihdan khawng ka ngaihtuah a, “Ngaih aw nang toh kholhkhawm chim theikei veng, hunte vaibang thamsak thei himai leng maw!!” ka chichi mai veh!

Awl a ka nektheih lei uh nekawm in ka houlim ua, a mel ka etchiang in hon it petmah hon ngai petmah lai a hihdan ka theichian semsem a, hiai hun in zaw iim guk ding bangmah ka neithei nawnkei! Amah ka itna thu leh ka kikhenzoh nung ua ka hinkhua kisezak a om a, hinkhua a kipahna nei nawnlou himhim ding a kikoih a, kingaihsiatna hinkhua zangden ka hihdan khawng leng ka hilhvek hi! Banah, tulel a ka omdan pen amah ngai a ka lunglennate thuak haksa ka sakluat ziak a hihdan khawng ka genchiang in hon theihsiam kawmkawm in hon hehpih mahmah mai a, ka biang a ka theihlouhkal a kidaihlah tak a hong luangkhe zel ka mittuite a dialpuan namtui hiuhiau leh nel mahmah a hon nulhulsak thiamthiam kawm in, “Siam, huchi nawnken! Kenle hon itlua hon ngailua ka hi. Nangle maban saupi kalsuanna ding nei na hi a, keileng hinkhothak(itna lam thu ah hilou in nekzonna lam ah) pandek pan ka hihman in Simlei ah dawnbang i tuakkei zong in Thangvan bek ah dawnbang i tuahkik sawm ding aw!?” hon chi hi.

“Ngaihnou aw, non mangpha khaknate’n ka lungsim nasak na maizen e maw!” ka chihleh kidek zou nawnlou a hingei ding a, hon angkawi tonton hial kawm in, “Siam, kon ngailua… Kon ngailaw petmah!” hon chi a, keileng pauthei nawnlou in ka kawithuk a, ka nih un ka kap keuhkeuh hial uhi. Tomchik nung in, “Aasshh!! Siam, a kilawmkei deuh ka chi tua i omdan!” chi in hon huau siausiau a, kenleng, “Bangziak in eita ngaihnou?!” ka chihleh, “Enve, mi’n hon en utlua uh eivoi! Mi’n bang hon chi di uh a, chih i theihlouh pi!!” hon chi a, kenleng nakzaw deuh di’a kawibelh kawm in, “Mi’n maw ‘hiai tegel ki-it kingai petmah uh eiveh maw!’ hon chi ding uh ahi..hehee” ka chi a, khahkhiak ka sawm tuankei! Aman leng ka dawnna theisiamlua a hihman in hon kawikip thakthak hial hi.

Tomchik zoh in huai pasal hong tonpihpa’n ka liang hon beng zatzat kawm in, “Paita ni uh! Dak 9pm gingdek eive!” hon chi a, ka kikhahguih zawzen ua, lampi a mi paituahte’n bang hon nuihsan heuhau hial uhi.

Kihalhsak thak in ka nektheih nek uh ka sunzom nawn ua, ka nek khit un a zintunna lam uh zuan ding in ka kisa ua, huchih laitak in ka omnate’ tapa upa zaw pen in ka khe hon betsak zatzat kawm in, “U Siam! Thouta ou, ka papa le hong tungta eive!” hon chi a, khua ka phawkguih hi. Ka gei a phone ka etleh nitaklam dak 5:30pm ana gingdek tak a, ka mang a ka nektheih nek un ka gil a kialsak tel aka!

@kipak!!
__________________________

A taktak bangthei ding a phuahtawm pumlum ahi a, kuahiam hinkhua leh min toh a kituahkhak zenzen leh tupmawng hilou ahi…

How useful was this post?

Click on a star to rate it!

Average rating 0 / 5. Vote count: 0

No votes so far! Be the first to rate this post.

Admin: Get in lamka

Get In Lamka - Digital Marketing & Information Services, Shopping site Lamka, Churachandpur, Manipur, Shop online at getinlamka.com, Read Daily news of CCpur.

Leave a Reply