KUM 4 ZAW PHATA HI A!!   By : M. Liankhansiam

KUM 4 ZAW PHATA HI A!! By : M. Liankhansiam

0
(0)

KUM 4 ZAW PHATA HI A!!

IHMU THEILOU... By: M Liankhansiam
By: M Liankhansiam

By : M. Liankhansiam

A ni, a hun leh a dakkal a hong chin chiang in “31st August” lunggel mitkha ah a hong langkik theizel hi. Mi khenkhat aa di’n bel kum beina ding ni khat a kibehlap lel a hihkia hilou a, a BER kha kipatna ding a ni tawpni pen ahi lel! Ahi mah leng ahi! Amaute’ aa ding in a ni tawpni uh ahi. Kuate a hia ka gen? Lawm aw, nang amaute ngilhta na hiam?! Kenzaw khovel kilehpei hial a hihkei leh ka mangngilh ngeikei ding!

Hun paisa thute zaw gengen ding leng hi nawnkei! A theilou om nawnkhang! Ahihleh kum 4 sitset nung in bangtan i salphate i tunpih ua le?! Press Release a kinakna ding tanlel maw i tunpih uh?! I pawlpi deihthoh uh nih kisuah ding tanlel maw i salphate’ kipiakna man?! SoO hun bangtan hiam behlapna tanlel maw i salphate’ sisan man?! Delhi a Five Star Hotel tanlel maw i nam-le-gam itna uh?!

Hichi ding zaw hilou hiveh!! Gensau deuh lenglah “Nang leltak in thunung-thuma theikei teh!” hon chizel di ua hiven!!

Hun-le-nite mualliam zel mahleh 31st August zaw i ngaihnep theih ngeilouh ding ni uh ahi. A mangngilh i omkhak zenzen uh lehleng kihilhthak ni! Tha kiguanthak ni! Panla thaklai ni! Tuni tan a et in salphate’ sisan man tawmlua hilou hiam?!

__________

Ann ne di’a ka kisak laitak un thauging thawm ngaihtak a hong om a, kiguih hial simchiat mahle ung ka thupi ngaihkei uh! Himahleh thawmging dai tuanlou a a hong nasat semsem tak in a om maimai thei ka om nawnkei uhi. Ann i neksang in i gam-le-nam’ aa ding in khatvei bek gilkial-dangtak thuakkhawm leng bang a a poi luatna ding om, chi in ka kihanthawn ua, mahni hihtheihna lam chiat a pang ding in innlum ka nuse chiat uhi. Nitak zansawt nung in inn ka tungkik ua, himahleh ka kim nawnkei uh!

Unau tamlua ka hihlouh man un midangte'(unau tamte) sang a leng kingaizaw leh ki-itzaw in ka kithei uhi. Ka thilhih khempeuh uah ka kithutuak mahmah mai ua, a neupen a kipan a lianpen tanpha insung ah dinmun kikim in ka om uhi. A thuneipen ka omlouh mahbang un a vuallel pen leng ka om tuansam kei uh! A tasam tuam ka omlouh mahbang un a neival lua leng ka omkei uhi.

“Ngai un! Unaute kituak diamdiam a omkhawm a nak hoih in a nuam mahmah hi…” chih thute khawng ka zuihtheih lai uh zaw nuamtak ahi! Ka sanggampate khenkhat inntuan khia om mahle uh hun poimohte ah tutna khat ah ka tukhawm thei ua, nui hiauhiau kawm in maban ding ka genkhawm theizel uhi. Himahleh a hun hong sawt simta a, inn ana tuankhete lak a ka sanggam pasal khenkhat a zite un ana thuzoh maimah uhi!

Ka pa’ gou neitu ding ut chiat ka hihman un ka hong kina khadek zawzen uh! A huchih chiang in ka sanggamte khenkhat a zite uh ziak in hong hahpan phadiak ua, ka upa uh toh leng kituak thei ngei nawnlou ding dinmun in a hong omdek hial uhi.

Huchih chiang in kei a mibanglou pen in ka unaute ka samkhawm a, a lungsim ua a hehnate uh kingaidamtuah chiat ding in chialna ka bawlzel a, himahleh kuaman ka thu a la nuamkei uh! Kenbel zi-le-ta ka neih hunchiang in ka sanggam pasal khenkhatte dan in zaw ka zi’ thuzoh in ka omkei hial ding, ka chih phenphan hang in keileng doh-ha thuaklahpen hikha maithei hi’ng a, ka chizel hi!

Ka sanggamte’ kinak kiselna pen koi a hong kipan hiam, ka chihchiang in kuaman a genchian utkei ua, a genkhiak chiang unleng khat-le-khat a kingohtuah maimah zel uh! Kuapen dik a, kuapen diklou hiam chihleng theihzoh ding a bangkei! Khenkhat in bel, “Huchi a hihleh thagum-thatang in kinawk maive ua?! Na buaina uh a vengbaih zaw ke! Kituaklou pipi a na tenkhawm nilouh sawm mah tak un na hichi buai mah kei di ua! Na pa uh gou leng a kikim in kihawmsuk mai unla, kinialnial selou in tengkhawm dialdial sukmai un!” hon chisek ua, himahleh ka sanggamte’n kituahna ding thu himhim tu tadih in a gen naikei lai uh!

Huchibang a midangte’ ngaihdan hou chikchik leh simmohna paukam banah kivuak-kisat ding thu khawng a hon genkhak chiang un ka sin-ka-lung hon vut tuntun a, haksa ka sa petmah! Kilem ding in ka sanggamte ka chial a, kuamah ka ngahkei! Maban ding zaw a kipahhuai lametna ding himhim a omkei!

31st August, 2015 a 3 Bills ziak a buaina a hong pian lai in zaw ka pangkhawm uh aka! Ka kithutuak uh aka! Ka kikoukhawm ua, lampi tuang dim mitmet hial in ka kigingkhawm zuazua uh aka! Khut kilen in ka sualkhawm sam uh aka! Nang’ ma in kei aw, ka kichi tuah ua, ka ki-it lawtel uh aka! Ka semkhawm uh aka! Ka thuakkhawm uh aka!

Kituak diamdiam a pankhawm nak noplua zaw hiven maw!! Khut kilen a khekhat khai a kal ka suankhawm lai un ka doute unleng hon khenzak sawm in pan nasatak in a hon la ua, ka sanggam pasal 9-te innlum a hong tungkik nawnkei maimah uh! Amaute a chang in ka lungsim mitkha ah a hong kilangzel ua, huai hunchiang in keibel kisuanlahna leh khasiatna mittui in a hon tuamzel!

Khenkhat liam-le-bai in inn a hong tungkik ua, khenkhat lah taksa poihlongsa in a hong tungkik uh! Khenkhat khua leng phawklou in a om maimah ua, khenkhat ngial houh taksa bukim nawnlou in a om uh! Bukim takmai a kuankhia himahle ung, tasam takmai in ka tungkik maimah uhi!

Nidang a neknek nekhawm a, silh-le-ten nasan a neituam omlou a hinkhua zang zaw hi ung a, tu’n bel ka kim nawnkei uh!

Nidang in zaw gam kuankhete thumna toh ka khakhia ua, tu’n bel a kuankhiate hi in ana omte hitaleh ka kingaihsak nawnkei uh! Huai naksang in a kuankhete leh ana omte ka kituakkei deuhdeuh ua, “Hiai nang’ aa, hiai kei’ aa…” chi in a omlai sunsunte ka kikhen ua, himahleh ka kituak tuankei uh! Ka neihsa teng uh ka gawmkhawm ua leng midangte’ neihzah pha zoulou na pi in ka neih sunsun nasan uh ka kineihtuam nuamlai uhi. Nidang in “i U, i Pa, i Nu, i Sanggam” ka kichi ua, tu’n bel, “Nou leh Kou, Eilam leh Amau lam” ka kichi zawsop uh!

Zannitak in ka sanggam pasal 9-te ka mang in ka mu a, amau bel koilak hiam a hun nuam zang di’a vakkhia hihchi uhi. Ka galmuh a, ka kikou hang in a hong kinunghei kei uh! Ka sapsap hang a bangmah phatuamlou ding a hihman in amaute’ omna lam ka va naihphei a, huaitak in ka sanggamte’ lak a a upapen in hon mu guih a hihman in keilam hong zuanphei hi.

Keibel ka kisuanglah sim mahmah mawk a, kundedu kawm in a kianglam ka zuanphei numnum hi.

A kiang ka tuntak in, “Bawi, hiai a bang hong hih na hia?!” hon chi a, kenleng, “Uu, keile nou kiang ah kongpai mai diam?!” chi’n ka dong pah hi. Huaitak in ka upa’n, “Hilou e Bawi! Nang’ hun tung nailou ahi…” hon chi a, ka gennop thu khenkhat genbeh di’a ka kisak laitak in a kinunghei a, ka sanggam dang 8-te’ geilam ah hon paikhiaksan hi.

Hichibang thu teng ka mai a tupa’ kiang a ka gen laitak in ka mittui khamzoh vuallouh in a hong takkhe zungzung mai a, ka genkhiak khempeuh a hoihlam thu ngen himai leh ka ut ngeimai! Himahleh a hoihlam thu himhim zak ding, theih ding leh gen ding a om nawnkei hi.

Genzom ding a ka kisak hang in a hithei nawnta kei! Sawtlou nung in ka mai a dohkan a kipan aw khat in, “Ahihleh huai na sanggampa 9-te tua koilam a om a hi ua?!” chi’n hon dong a, kenleng awlchik in, “Ka theikei! KUM 4 ZAW PHATA HI A!” ka chi a….

@kipak!
_________

How useful was this post?

Click on a star to rate it!

Average rating 0 / 5. Vote count: 0

No votes so far! Be the first to rate this post.

Admin: Get in lamka

Get In Lamka - Digital Marketing & Information Services, Shopping site Lamka, Churachandpur, Manipur, Shop online at getinlamka.com, Read Daily news of CCpur.

Leave a Reply