LUPKUON A EIMA HINKHUO ZATDAN KIVEL CHIEN NADING IN SIM CHIET VAI | KOI NA NA HIEI…? BANG NASEM NA HIEI…?

LUPKUON A EIMA HINKHUO ZATDAN KIVEL CHIEN NADING IN SIM CHIET VAI | KOI NA NA HIEI…? BANG NASEM NA HIEI…?

0
(0)

LUPKUON A EIMA HINKHUO ZATDAN KIVEL CHIEN NADING IN SIM CHIET VAI

KOI NA NA HIEI…? BANG NASEM NA HIEI…?

Pastor M. Thangboi Zou

*Text: Jonah 1: 1-9*

*Thumapui*: Amasan tunia thugen thei dia deisahna lianpi hingpia Pa Pasian leh lamkaite tunga ka lungdamna thu ka hing Phuong hi. Tulai khristian khanglai mitampi koi ahi kitheilou atmata man un tunia ithupi dingin tami kahingtel hi.

*Jonah i chi koi ahiei?*

Amapen Karmel muol leh Galili tuipi kikal a Jebulun mite khopi Gath- Hepher ateng Amittai tapa ahi (2 Leente 14: 25). Jeroboam 2na in Isrealte tunga leeng vai ahawmlai a (782-753 BC) guolnei (prophet) nasem ahi. Jonah in Mangpa Jesu Khrist toh kibahna khat anei hi, aman Nineve Jentel khopi ah thu agen a mite akisia ua hundamna amu uhi. Jesu Khrsit zong Isrealte maimai a ding a hingpei ahisih a, Jentelte ding a hingpei zong ahi chi Jonah in a ensah hi.

*Khristian ichi bangchi bang mite adiei?*

Mikhiel ka hi, ka khelna vanga gawtmun tung ding ka hi chia ki thei a, akhelnate kisia a Mangpa Jesu Khrist khu Mang-le-Hundampa a kisang zousie khu khristian akichi hi (Jn. 3:16-17, Eph. 2:8, Gal. 2:16, Isai. 1:18). Na nulepa khristian ahivang a nang zong khristian hilai zanglou na hi aw, khristian ichi khu akhelna kisia a Jesu Khrist a hundampa kisan a A nuozui dia kilan khei ngamte bou khu ahi (na theisa hileh zong ngaituopha in, na din mun). *Ferrer in,“Nungzui ichi chiengin Jesu Khrist thuhilte gingta a kipumpiehna a kinga in, Ama Hagau tuibang dawn in, Thu zousie a Ama (Jesu) etton in ahinkhuo zangte ahi”* chin agen hi. Na khristian hinkhuo tawh akituo naima? Kivel pha in.

*Pasian in Jonah asawlna (1: 2-7):*

Nineveh kho mite gitlouna asangta ziehin Pasian in amaute kunga kisiana thugen din Jonah asawl tahi, nanleh Jonah nuomlou in Pasian sollouna khopi dang (Tarshish) zuon in Tembawh in atuongta hi (V. 2-3). Tembawh nuoinungpen a nuomta in ana imu zieuzuou hi (V. 5). Tulai itenna Lamka khopi sung a zong khristian tampi khelna khu khelna simnon lou phiel a gamtang akitam ta mama hi. I china san ahileh, *“Khamthei bawl khu sietna lienpen in i gelchiet ua ahoi mama hi, ahinla i sum suikhietdan uh ahileh Kani leibawl, Nos. 4 zuoh leh khamthei tuom tuom a sum sui igam in ahau tamama hi, lamdang e maw Sum ka mu nading ahipouleh midangte a utut suohen chi hilei kilawm, tam bangteng taw sum isui maw upen abawltute taw akikhietna bang e alamdanna, chinuom ihi!”* Guolnei Jonah Pasian thupie banga umlou in khopi dang zuona Tembawh nuoinung pen a a ihmut tawh akikhietna um tuonlou ahi. Jonah Tembawh atuongna a gingloute nasan in buoina, mangbatna leh chitunna atun maw pen lamdang e maw! Pasian mipa lah hingal!(V.6). Tunia nang sum muna ziehin innsung, khosung leh vengsung bangzatan abuoi tai chi nagel dawgh ngai ei? Thamlouin Meithai lou dingpi Meithai, Taga lou ding tampi taga, nu-le-pa tampi Mittui luong, khanglai tampi lampiel siengta, ahinla eima lah kibawl theisa nalai, kithupi sanalai, mite bangma asimlou vial nalai, guoi natuo dingkhu kipah tain na maituoh ngam nadia maw! Na khristian hinkhuo zat kivel phan akikhel man. Bangzie Tembawh atuongte mangbang, chitun leh beidong ahia nachi leh, Jonah tuo Tembawh ahingtuongta chiengin Huipi in tuo Tembawhpi khu ahingmut tamai hi (V. 7).

*V.9 nan “Kei Hebru mi ka hia, Mangpa van Pasian tuipi leh leitung siempa giing mi ka hi’ chin adong hi.*

Atunga igensa mabangin Jonah Tembawh ahingtuong tachiengin Huipin tuo Tembawh ahingmut tamai a, asung a tuong zousie koima azaulou, achitunlou leh amangbanglou khatbe aum sih uhi, tuochin Johna kunga tami thu ahing dongta uhi. “Nang bang nasem na hiei? Hei a hingkipan na hiei”? achi ua, (v.9) aman “Kei Hebru mi ka hi, Mangpa van Pasian giing mi ka hi” chin adong hi. Amazie tambang buoina, mangbatna leh chitunna tunglam kitheilou louin, Tembawh nuoinungpen a nuomsatain ana ihmu zieuzuou nalai maw hi, lamdang e maw! Khumbangma in, tulai gingtu ka hi, khristian dihta ka hi kichiin, kisuongla loukei a Nehgu, tahgu kho salou, thudih a vaihawm sang a dilou tah a vaihawm a sum tampipi muding nuomzaw, thutah get khietsang a zuouget nuomsa zaw, ki-itna thu get sanga mite kisietna ding thugen nuomsa, khentuom nei, sihnei a vaihawm Jonah bang akitam tamai hi.

Jonah Pasian mipa jieh tambang buoina thupita atun bangin, tulai Hattuam sunga kibawl theisate zieh in zong hattuam tampin athuolaw ta mai uhi, Jonah Tembawh avatung sileh tuona mite huchia mangbang leh chitun lou ding u hia maw! Ahinla ava tuongta zien tuobang hing piengkhie ahi. Tambang main, buoina, sietna enbawl sih leizong leitung sapsietna gam leh Setan thuneina ahiman in tamte aum dingma ahi, ahinla ava bawltute khu mihamsiapen ahingsuo kie uhi. *Gentenan*: Mangpa Jesu eite khelman peidia (ashi dia) hingpei ahia, Setan in Juda Iskariot zanga Rome Sipaite kunga apiakhietsa khu Juda ading a hamsiet huoipen ahingsu tamai hi. Tunin koi khuo Kelham aumtuon sih, Hattuam chin ah mi khenkhatte, Piengtha ka hi, Jesu nuozui ka hi kichi un, Hattuam sum nehchitanga Nehgu maw, Gin-um nalah neilou, thutah kichi hei a um e chithei khop agamtang, zuougen lah ahidingma bangsa, Nehgu lah tulai vai ahichia bawl teitei ding hileh kilawm agel, mi muonhou khen khat tamte a Mangpa nuo azuina uh kimanghil khop a gamtang aum tahi. Tuomi jieh ahi, Tembawh Huipin amut bangin Innsung, Hattuam sung leh khosung, vengsung a buoina hichia tam tam akhu! Akhenten buoina hing kipatna pen khamthei-guithei bawlte ahi chin amuda ua, langkhat a dih naven, ahin tuomi dikim suolou ding in atung a igente theinapia kisuongla loukei a bawlte zieh zong hidin gingtat ahuoi tamai hi.

*Akhupsitna*: Jonah bung khat nasung a siltung zousie khu koima dangzie hilouin, Pasian mipa Jonah thumanlou zie ahibou hi. Tunia itenna khopi sung uzong buoina hingtungte khu hoitan kikan chien leh, Khristian passport aneite (khristian ka hichi kichite), ahinla kisuongla na neilou kei a Nehgu tagu khosalou, thudih thutah avaihawm lou, khentuom nei a vaihawmte, dihlou tah a thukhente leh society sung a mihau mizong khenna neite zie hizaw din gingtat ahuoizaw tamai hi, na chisi ama! Paul in hichin agen hi, “Sil zousie enchien unlen, ahoiloute paikhia in, ahoite tudet un” (1Thess. 5:21-22) chin Thessolonica hattuamte kunga agen hi, tuomi khu Lamka khopi atengte kunga zong ahinggetnan lachiet lei aut huoi hi. Itenna khopi a buoina hingtun najieh khu sildang zieh hilou in, ahina kitheilou Khristian akitamta zieh ahibou hi, hina kithei chien a Mangpa nuoh gin-umta leh siengthouta a zuite hithei chietta din, simtu zousie Mangpa ama mimal kithei chien ngeidin thupha hingpe chiet tahen, chi ka thumna ahi. Lungdam ing e.

How useful was this post?

Click on a star to rate it!

Average rating 0 / 5. Vote count: 0

No votes so far! Be the first to rate this post.

Admin: Get in lamka

Get In Lamka - Digital Marketing & Information Services, Shopping site Lamka, Churachandpur, Manipur, Shop online at getinlamka.com, Read Daily news of CCpur.

Leave a Reply