NA TATE BANGCHIN NA KEM EI?  By Pastor M. Thangboi Zou

NA TATE BANGCHIN NA KEM EI? By Pastor M. Thangboi Zou

0
(0)

NA TATE BANGCHIN NA KEM EI?

By Pastor M. Thangboi Zou

Thumapui: Bang ding a i gamsung a khangthaten hoina sanga sietna hichie apibawl zaw uh adiei? na ngaisut ngaitai ma? Ngaisut thamching mama hi. Mudan theidan kibanglou na gam a khawsa nalai ihi zie’n, imudan leh theidante kibangkim suolou maithei ding hi, nanleh keimu khietdan ahileh, tam anei a bangte zieh hidin ka mu hi, nang ateh toh akituoh nai, ana et-kah in aw sanggam? Tamna tamlou hichin kahing kaikhawm hi, tuate ahileh:-

Aneulai in Pasian thu toh pui in (Prov. 22:6, Deut.6:6-7):

Atung a Bible Tang tegiel sim lechin Pasian in Tate kepdingdan/ puidingdan anghil zouta hi. Tulai Nu-l-pa tampi Tanei siem in, akep siemlou, ka hingchi nasan khu, “Laisiengthou ka zui hi chi nu-le-pa tampin Laisiengthou get banga Tate thuhil/ pui atawmta zieh in mitampi Mittui luong ta uhi” aziehpen Pasian thu toh pui ding ahilai ua, amauten Pasian thei lou nu-le-pa tami igam in anei hi. Nupi khat in Evan. D.L. Moody kunga, “Pu, ka tapa banghun chie Pasian thu a kapui ding e” chia avadoh leh, Evan. D.L. Moody in, “Tun na tapa Kum bangzat aphatai chia” adoh leh, Nupi nun Kum 3 chingta achie, tuachin Evan. D.L.Moody in, “Kum 3 in na vaigei tahi” chin ana dawng hi. Tualeh Nupi gailai khat, Naupang Sunday School kaiteng in, amanu zong avakai zing hi, miten lamdangsa kawm in, Nu bangdie nang naupang Sunday School ahingkai zing na hiei? Chie adoh uleh, nupi nun, “Ka ta Sunday School kaipi kahi” chin adawng hi.

Tate tunga Khristian Nu-lepa te Mopuohna: Ezek. 2: 9 nan, “Tam Naupang la inlen hing kepsa in, thaman ka hingpe ding hi” achi hi. Singnou na suon ah a Ga Hoi nadei leh, akimvel housing inlen, Tui, Haal pezing lechin Ga Hoi namu die, a Ga tungtawn in na kivah thei ding hi, khum bangma in, Ta hoi na die leh amasan nang hoi masa in. khuleh Ta Hoi nadei leh, “Thanuom tah in, na Tate enkawl in” chin Pau. 27: 23 nan agen hi. Billy Sunday in, “Naupang abul napat dih leh Setan in abanbul in hingkai mangsa lou ding hi” chin agen hi. Tate tunga Mopuohna (etkawlna) ding toh kisai in, tamna thupi 2 in ikhen ding hi, tuate ahileh:-

Bible pansan a tate tung a mopuohna:

i. Na tate aneulai un Piengthasa in, tualeh Pasian kunga puilut in (Mt. 19: 14, 1Sam. 1:28, Lk. 2: 2, Pau. 22: 6).

ii. Na tate mikhiel ahidan hil in, Pasian kunga khelna jieh a Thumna toh ngamdam nget ding ahidan hil in (Heb. 1: 9).

iii. Na taten Jesu Khrist a Ginna det aneizing nading un, nang apat in zilkhe sah in (Phil. 2: 17).

iv. Lom hoilou toh akigawp dingna deilou leh hil inlen, sietna alut louna dingun thu hil zing in (Pau. 13: 20. 28: 7, 1Jn. 2: 15-27).

v. Na tate hinkhuo pumpi ahoizing nadin Thumna tph delzui zingin (Ephe. 6: 18, Jn.17: 1).

Tahsa lam mopuohnate: Tahsa lam a Khristian Nu te Tate tunga amopuohnate uh ahileh:-

a) Ginna lam a: Timothy Ginna a etton ahitheina ding in, a Pi Loisi leh a Nu Unisi te ginna lam a etton dingin hinkhuo azang uhi.

b) Siengthouna lam a: Na Taten Khristian Hinkhuo azatna dingua, ki sinsahna leh Hasawtna thupipen khu, “Khristian Nu te, Tate etton theidie Tep-le-muom, neh-le-dawn ah akisusiengthou zing ding uh” ahi. Thupi khat in, “Ai-pi a sihva leh anoute zong sihva” achi hi.

c) Kipiehzawhna lam a: Hanna in nau apai apan Pasian kunga ata apekhie sie, nanleh tapa Samuel ahingnei in Pasian mizat ahing hi theina din, theitop suoh in asinsah hi. Tuajieh in Pasian in Samuel khu Isrealte Guolnei din asiem khie hi (1Sam. 3). Sadu Sunder Singh nu in atapa Sadu Sunder Singh, amaute pasien nnasem Siempu (Sadu) ding adeina zien “a pasien uh kunga a thum masie, Ann-le-Tui bangma ape sih hi” nanleh Pasian in ama nnasem din azang hi, tam khu Ginna a Nu anakipieh zaw jieh zong hithei hi.

d) Haam kamsuoh a: Khristiante zatdie kilawmlou haam kamsuohte Khristian nu ten na tate masang uah nazat vawtlou ding uh ahi, haam zatlou dingte ahileh, “Chiemnui thanghuoi, Zuau gen, Mi gensiet, Haam selawh” chite Bible in tamte akipan kihemkhie un, achi hi (Kol.3: 8). Theitop suoh a na tate na thuhil lai a, atung a igente haam hoiloute na tate masanga nazat zing leh, Vail ah a Zun kitha bangle ding ahi, chi thei in.

Susannah (John Wesley nun) in atate a etkawldan tamlou envai:

i) Ahamthei tung uah kipan “Mangpa Thumna leh Thumna tuomtuom te” azilsah pai hi.

ii) A Tate khothei akipan, “ihmut hun, Thawhun, Ann nehhun, Ni-le-Von khelhun, tualeh deizieh nget zousie pielou dingin apoimawh zieh pieh ding ahi dan” azilsah pai hi.

iii) Innsung kikhopna leh Bieh kikhopna photphot a sip dode a umding ahidan a sinsah pai hi.

iv) A tate kunga thuchiem abawl leh, muolsuoh lou in koi ngai lou hi (Ei nuten thuchiem nei nei mai, muolsuoh ngailou, tuate jieh hiding ahi, na tate un ahing thusim lou na jieh, ahi diei?).

v) Naupang zuau gen leh suhkhelna immangte khu gawt louin akoi ngai sih hi.

Nu-le-Pa te kunga Tate Ngetna: Tamna na taten na kunga ahing thungette uh chiemte inlen bawlkhietpi sawm leh chin, Tate tunga na mopuohna ahing dawngzangkhai mama ding hi.
i. Thupetu hisih unlan, thupia hilou in, nget thaw dan in nangbawl chiengun, na thu uh mat nophuoi kasa mama uhi.

ii. Ka tung uah na lungsim uh heng paipai sih unlan, sil ka bawlhoi chienguah kipahman piedia nahing chiem ngal uleh, na thuchiem un sutang tung un aw.

iii. Ka lawn-le-guolte um chiengin ka chital nate/ hoilou nate gengen sih unlen, kouma tang a I umkhawm chiengun ka chital nate hing hil in, kalsuon dingdan uh hinghilzaw din ka hing ngen uhi.

iv. Ka tung a aw sang hing zang sih un, ken zawng nou tunga hing zang kha ding ka hi. Na loite na kithuopi bang un, kei zong hingki thuopi un, tua hileh, keizong na loute hivangin, nou zong kei loiter nahi ding uhi.

v. Theisiem hamsa kasa te uh, “Innsung a kakimawl chieng uah inn sunin nang chi un, inn mai a ka kimawl chieng uah na inn hepding uh” hing chizel, umding dan theilou in “ka va chiengin, vava mai hingchizel” um dingdan ka theiseim thei sih uhi.

vi. Mi dang tate toh hing tehka ka non sih un, Mi sezousie toh nang tehka zing uleh, ka hinkhuo uh hing susie in, tuate sanga thupizaw a gamtang thei ka hi uh, tuajiehin midang toh hing tehka ka loudin kang ngen uhi.

vii. Na lungsim uh ahoi a, na thutah mama ua, hinanleh, ka loiten ahing nelthei sih uh, na kungua um nuom salou uhi. nuimai deu ulechin ka dei uhi.

viii. Ka loite i inn uah ahingva chiengun, ana ngaisa deu ve uah, “Drugs addict maw? Khanglai Lamkai maw? Sunday School Lamkai, Innvengte, ahilou leh ka lawmngai pen” chibe ana theisawm ve uah.

Akhupsitna: Tate hoilou ding nulepat adeilou ki umlou ding hi, nanleh ahoi tahtah na ding ua theitawp suo a Pasian thu toh tate puihuoi nulepa igam ah vang mama hi. Na taten Pasian hing thei u’hen na chileh aneulai ua kipan Pasian thu toh pui inlen, nang zong Pasian thu ngaisah lechin ang pichin chiengun mittui luon a thumpi, kaa pipi ngai nonlou ding hi. Sum manphatdan ithei chiet bangun Tate Pasian thu toh puiding ahidan leh amanphatdan thei siem a ei tanu-tapa te zieh a midang tate asietlou nadin tunin nulepa ten eima tate Pasian thu puichiet thei tadin simtu zousie Mangpa Pasian in hing mapui chiet tahen.

How useful was this post?

Click on a star to rate it!

Average rating 0 / 5. Vote count: 0

No votes so far! Be the first to rate this post.

Admin: Get in lamka

Get In Lamka - Digital Marketing & Information Services, Shopping site Lamka, Churachandpur, Manipur, Shop online at getinlamka.com, Read Daily news of CCpur.

Leave a Reply