NGAIDAN THAK PHALO LA NEI ZIAK IN LA KIANG KIMVEL TE MUALLIAM SAK KIN

NGAIDAN THAK PHALO LA NEI ZIAK IN LA KIANG KIMVEL TE MUALLIAM SAK KIN

0
(0)

NGAIDAN THAK PHALO LA NEI ZIAK IN LA KIANG KIMVEL TE MUALLIAM SAK KIN

Corona Virus ziak in khawvel pumpi lungzinna leh kana ah a maulai in, ei ma mimal suangtuana diklo ningkil khat ah I la chiapi ziak un, positive case leh thina tuni tiang ahin a beithei talo ahi. Pathian in a siam khawvel mipil mithiam te mangcha natna leh hipi leng I ti te apat kivenna leh suk damtheina damdawi a um zinglai ah a lelam tak ah khawsak guat teitei na’n eia mimal hinna bep hilo, I mihiam chanpi te a di tiang in thina a tung zing hi. Khawvel dang ah thil um dan te hezing kawm ah, Churachandpur District sung ah khawsak dan chuamchuam te vak genkhawm hitiu.

Akhatna’n, Lockdown chiapi leh zui dan tamtak gen buai thei a um hi. Corona positive khakdi leh thidi lau mama ziang maleh a mihiam lungput dik theilo ziak ah Corona a lau mama apat kivenna ding ah Vaccine kikap lo tamtak aki um hi. Himaleh, vengsung ah nek leh chak hawl na khaptu pang, gari taitua te vengsung ah khamsak utlo, dor bawlte kihawnsak lo ban ah vengsung ah lut leh pawt khaptu ah tawmngai pawl ah pang ziang maleu hin Vaccine chungchang ah ngaidan mul mama ziang nei tamtak I um ziak un hiatthiam theilo mihiam ginna sual aki tam mama a bang hi.

Anina’n, puitu hingal ah mudan diklo kampau thedaltu um ziak in nungzui bangzat hem te kipui sual zo ta. Mipi nungzui thei dinmun luatu puitu tamtak te hiatna kitup kitak kichianna umlo ziak ah lamvai ah buai tampi ki um hi. Khaw hiatna neilo, gualpha lo, nu leh pa mawl tamtak te puitu bep hilo ah khangthak tamtak ettawn chi hawilo tuthei bepbep puitu a um ziak in I khaw hiatna’u tamtak lamdik ah chia talo mi tampi aki um ta mai ah. Zia chu insung leh khawtang a ding ah khantona bep hilo ah hinna a ding tiang ah puksiatna tuntu ahi. Ziachu ahiziak in, puitu fel, lamdik ah ngaidan nei, a pawimaw na ah tawmngai thei leh pan latu ding siam hun leh nei hun chu ahita mama hi. Corona vaccine ziak mai ah ngaidan diklo genthei maimai puitu I nei tam ziak un Churachandpur- christian ginna district hi a buai mama ziang hi.

Athumna’n, thigalna programme mun ah panlak dan leh Inneite lunggel in I khawtang mizia buai um dan a kilang hi. Thigalna program ah Reception Box ah sum kikhialut in, piatu te minzik lo I thaw uh hi. Physical contact um lo ah galna sum Box ah kikhialut maleh mun tamtak ah minzik lo in I um ui. Galtu te minzik lo hin a sukphat a um pua, galtute khawsak dan leh ziklut tute vaihawm thiamdan in a um hi. Alangkhat lam in, inneitu te le programme piting tak mang nuam in, SOP zuidi tite lungthim bei hial in kilaulo sak tak in lau kawmkawm in, kuate’n ei bawlpha’u em ti lungthim nei kawm ah tawmngai hunsua tute ala lungthim et hin lungthim kidaidanna chi tamtak a tun hi.

Alina’n, mi chung ah thiltung te pawmthei, khawksakpi lo ah mani chung ah thiltung te pawm nuam lo tamtak um te ziak in khawtang kivaipuakna a sunawk phak thei hi. I gamsung leh vengsung ah Corona positive te leh thite I lau bawl bep uh hilo in I pawm thei ui. Thankhuk chawna leh PPE ak ding tiang kingam lo ah lungthim ah positive te awimaw nawpna liantak nei pum ah khawsate’n amau insung ah positive ziak ah thina hial atun hun in pawmtheina lungthim a neithei ngai puau hi. Zia gual chu tapkuang mentality hawilo tak mani angmasialna bep nei tamtak I khawtang ah a um ziak in I kellu phum uh dawk talua deulo ahem ti hih ngaidan sukdik dinga pha ngaituana a tam mama ziang hi.

Angana’n, mi’n thilpha a delzing lai in ei un a phalo neucha umte petchak in ila kikhikhau masak uh hin hindan mawltak hilo ahem ti nuam tamkhawp a um ve sam hi. Sim senlo khawp ah Corona ziak ah mithi luang mi’n a buaipi’u ah, zia gual chu a chung ua a tunkhak ding launa ziak in Vaccine umna kawllu kawltaw a delzing lai un ei lam te’n Vaccine umna mun taisan ah lungthim siatna thipi ngamtak ah khawsa aki tam mama ziak in I khawtang tuni tiang ahin bitna a um lo ahi. Zia gual mite chu zakmaw tak in khawlak ah zalen tak mai ah um te hin midang hinna pamai taktak maite I chan ui kitileh kigen khial lo maithei dinmun in aki ding zing hi.

Agukna’n, siamtu’n a siam khial khak ahem tithei khawp ah ipla thei pawl aki tam mama hi. I district medical team in nasatak ah mipite kiven theina umsun Vaccine drive a bawlna’u ah damna ding lau ah thingtang lo lam ah taimang, kiselgu pawl, No. 666 ti pawl, kum 2 (ni) zaw ah thidi gingcha pawl, zombie kisuak khak ding gingcha pawl leh midang zosia kikap zaw phat leh a last penpen del pawl mi tamtak mani kilungsiat lo te ziak in I khawtang uh damna ding a um puai ti akilang chian mama hi. Mihiam ding ah siam, siamtu’n le gamsa lungthim lawmlawm nei ding ah a siam le hisam lo ah Thuakbu neutak kawm ah luchang putput ziang hile haisan hun mama chu ahitai.

Asagina’n, face mask pen hi khadang mask suaksak mihiam zulzau a tam mama hi. Pilvang lo, nek leh dawn hawilo, kitup kitak ah khawsa lo tamtak te ziak in pi leh pu, nu leh pa, cha leh nau tamtak hinna I chankhawlaw tau hi. Mitin hindan kibanglo chiat, kuama a tit pen tiding umlo te lak ahin mudaw um khat chu ahileh puitu pha taktak piang umlo ding tina ahi. Zialam chu gensau zawlo in, thei khamkham ah mani mimal mawpuakna ngai ah panlak hun chu ahi mama tai. Nang leh kei kiven hawi ziak in, I mihiam chanpi midang te dam ding ahiu ti lungthim nei hun mama chuh ahita e. Ziakachun, kei mawpuakna tithei hun mama ahitai.

Zia a chung ah kigen te hi genkhak lo tampi gennawp le um nalai himaleh a dang chu awl ah genkit ding ah khekphawt ding in kakawi hi. Thu kizik tamzaw hi ngaisiat thei gual in kilang maleh diktak ah mudan thiltung te apat zik ahiban in, simtu te’n a phalam ah la in, Corona vaccine hi thuakbu neu kawchik ah heikawi lo di’n, la mihiam chanpite damna di’n ala kikap ngei di’n kahun dawisakna thu ahizawi.

~Paudeulo Nunkhawkthang~

How useful was this post?

Click on a star to rate it!

Average rating 0 / 5. Vote count: 0

No votes so far! Be the first to rate this post.

Admin: Get in lamka

Get In Lamka - Digital Marketing & Information Services, Shopping site Lamka, Churachandpur, Manipur, Shop online at getinlamka.com, Read Daily news of CCpur.

Leave a Reply