PASIAN MISSION BANG A DIEI?  Pastor M. Thangboi Zou  Biel Pastor, Thanlon Division, MELC

PASIAN MISSION BANG A DIEI? Pastor M. Thangboi Zou Biel Pastor, Thanlon Division, MELC

0
(0)

PASIAN MISSION BANG A DIEI?

Pastor M. Thangboi Zou

Biel Pastor, Thanlon Division, MELC

Text: “Pasian in khovel a it sengsenga, tuachi’n a tapa tangkhat neisun a pieh hi, koipou Ama gingta in amanthat lou a kumtawn hinna anei zawhna ding” (Johan 3: 16).

Thumapui: Amasan tam article simkha zousie Mangpa Pasian in “A Mission” theisiem chiet din hing guolzawl chiet tahen, chi ka thumna masa ahi hi. Tunia i thupi zat ahileh, Ha bangzat ahiei ka lungsim a Pasian in ahing pia, tunia ka hing gel khiet ahi hi. Tamna Pasian Mission bang a diei? Chileh “Hattuomte mission thupipen ding khu bang a diei?” chi iki kum ding a, atawpna a “Pasian mission theilou a zauhuoi dan” chiin ikhupsit ding hi. Simsuo nailou pi’n phun sinlehn, simsuo phawt in, Pasian houpina na mu koi in agen thei diei?

Pasian Mission bang e?
Pasian Mission ichi khu, “Hagau mangthaite mat ding” chin tomkim aget in zaw thei ahi mai ding hi. Mangpa Jesu’n nuazuite kungah, “Leitung pumpi ah pei unlen, Khantanhoi tangkou un” chin (Mt. 28:19-20, Mk. 16:15). Tuami ziehin, Kumtawn shina tang dia i up lai un, Pasian in kumtawn shina pat tangtawn hinna itan theina ding un a tapa tangkhat Mangpa Jesu nang-le-kei adin ahing pia hi (Jn. 3:16). Mihingte’n laisiemna (degree) sangpipi nei mite, mipil ichi ua, nanleh Pasian in “Hagau mangthai mante mipil achi hi” chin (Thup. 11: 30) a gen hi. Pasian Mission na thei chienbe nuom leh laisiengthou (Rom 10:14, Isai 6:8, Jn. 4: 35, 9: 4, 1Kor. 3: 6 leh adang tampite) chite simbe in aw?

Hattuomte Mission thupipen ding khu bang a diei?
Tulai hattuom atamzaw ngai in, Budget sangpipi nei a, Biehinn thupi tahtah lam ding itup ua, ahoi hi, nanleh Hattuom hing (live) te Mission thupipen ding khu, “Hagau mangthai matna dia Missionary tampi sawl khiet ding” chi khu Pasian hing phut ahizaw hi. Pasian thugen minthang mama D.L. Moody (1837-1899) in, “Naupang khat hundamna thu a genpi ding mi a up sih leh, Pasian in Vansawltahte kungah, Leitung ah Kum 50 sung hundamna thu tangkou ding koi na ut uai? Chi’n dong leh, Gabriel nangawn ut ding ahi” chia agetlai a, eiten, Hundamna Camp, Crusare leh Revival bawl bawl lei zong phatuom sih chia i get uh toh kikhia hi e maw? Hattuom ten Hundamna Camp, Crusare leh Revival i thupi ngai lou u’leh, bang sem dia ikipat khiet ding uh hita! Tamna iget thumte (Hundamna Camp, Crusare leh Revival) ingaisah lou ua Biehinn thupi tah tah lam zong lei koite tua biehinn a kikhawm ding hita? Oswald J. Smith (1889-1986) in, “Mission nna aselou hattuom pen a shi ahi. Hattuom a chidamna leh a thahatna zatui hoipen khu Mission nasep ahi” chia a genpen hoitan ngaituo thalei ka nuom hi. Nang ngel zong tamna igen thumte (Hundamna Camp, Crusare leh Revival) tung tawna Pasian a kimu chien chin ah, Vangam kai ding kahi chia lungmuong thei na hileh, bang dia midangte adia tamte aphattuomna um sih na chi thei valong e, lamdang chia!!! Hundamna Camp, Crusare leh Revival bawl na dia Hattuom leh mimal in Sum isiel uleh, Pasian in na sum khu nadahna ding leh na kipah louna lampang a zong beisah thei ahilam thei inlen, Hagau mangthai matna din I sumte siel (it) sih vai ei guoi!

Tunia hattuom atamzawten Hundamna Camp, Crusare leh Revival chite sangin, La pawl sahchia silding Uniform, Biehinn kaichia zat ding Sound System hoipipi ipi bawl ua, tuami adin sum tampipi iseng ua, nanleh Hundamna Camp, Crusare leh Revival chite adia sum seng ngamlou hattuom atam mama hi (phatuom sih chia gel a bawl sawm nonlou), Uniform hoipen leh Sound system hoipen pen toh Pasian phat zong lei piengthana dihtah a um sih leh, sawt dai tuonlou ding ahi man in, hattuom ten ithupi bawl ding pen uleh, i sum sen tamna ding pen u’khu Hundamna Camp, Crusare leh Revival chite ah ahizaw hi. Chilou maw lamkaipu?

Pasian Mission theilou a zau huoi dan:
Pasian Mission bang a diei? chileh Hattuomte Mission thupipen ding chite mawltahin atunglam ah i kikum zouta ua, tun Pasian Mission theilou a zau huoi dan, anuoi a kikum nalai vai ei, tuate ahileh:-

i) Jonah Bung 1 napan en vai: Pasian in Nineveh mite gitlouna asang seng ta ziehin, tua gitlouna apat kisia ua kumtawn hinna anei theina ding uh gelnan, Guolnei Jonah asawl lai in, Jonah in Pasian Mission kitheimoh bawl in, Tarshish lam azawtsan leh bang thu apieng ei? (1:2).

a) Tembaw sung a tuon zousie shi-le-hin kikaal a koi sieng hi, buoina lienpi a tutlaw hi (1: 7).

b) Mihingte um nadie3 Pasian in Ngapi asiem hilou hinapi’n, Ngapi gil sungah Jonah sun 3 leh zan 3 a up loh hi (1:17).

Tunia hattuom ten zong Jonah banga Pasian Mission i ngaisah lou uleh, i maituo thei die ka mute ahileh:-

(a) Biehinn building thupi deu deu ding, nanleh tua biehinn sunga kikhawm ding mi tom deudeu ding hi.

(b) Sound system leh Uniformte hoi leh thupi deudeu ding, nanleh tuate a zang ding mi umlou ding,

(c) Hattuom budget sang deudeu ding, nanleh dihtatna leh ginumna kichi hattuom sungah kiem deudeu ding, chite ahi hi. Tamte atunlou nadin a hithei tannin Hattuom chin in Hundamna Camp, Crusade leh Revival chite bawl tamlei ka nuom mama hi, chilou maw nang zong?

ii) Mak 11: 12-14, Mathiu 21: 181-18: Tamna Lasiengthou te giel khu sim lechin Mangpa Jesu’n zingkal khat a gilkiel zieh mai in, Theipi kung a samsiet na thu na mu ding hi. Bang dinga Mangpa Jesu’n tam theipi kunga sam siet adiei? chi na ngaituo kha ngai ei? Mangpa Jesu’n Theipi kunga akipat a min (ripe) vasui hilou in, thei ga a um ei chia avasui leh thei ga mu ding khat be amulou zieh hizaw hi.

Tulai Hattuom tampi zong Theipi Na (leaf) pha mama nanleh a ga mu ding khatbe umlou toh kibang atam mama hi, Biehinn te hoi deudeu, sound systemte mantam in hoi mama, nanleh Pasian Mission suhpi china dia Hundamna Camp, Crusade leh Revival chite bawl bawl zong lei aphattuomna um sih chie Setan in asawl lungmuong Hattuom tampi um hileh akilawm tahi. Dah huoi e maw, tua bang hattuomte khu! Rev Dr J.M. Paupu in, “Mihingte bou anuatawl (blackslide) thei ka sah leh, tunua lam chiengin Hattuom te zong nuatawl thei ahilam ka hing theikhe tha hi. Hattuomten Hagau mangthaite lainatna (veinatna) anei sih leh a nuatawl ahi” chin agen hi. Nou hattuom anuatawl maw? Awleh ahing (live) ngaisut tha in lamkaipu aw…!!

Akhupsitna: Pasian Mission khu “Hagau mangthaite mat khiet a hundam ding” chi ahilai a, en tua te ngainep mai ding i ma? John Fletcher (1579-1625) in, “Kum 40 sung Khantanhoi thu ka genna tungtawn in hagau mangthai khat bou ka mat in zong septah sah veve ing” achi lai a, eiten, tua hundamna lampi kipatna dia Hundamna Camp, Crusade leh Revival chite khatvei bawl a i lawching lou u’leh lungke mai ding maw? Tualeh Mathew Henry (1662-1714) in, “Sana (gold) tum Muol chia ka tan (nei) sangin, hagau mangthai khat man leng ka lung a kimzaw ding hi” chin agen hi. Mikhielte kunga Hundamna i pe thei sih ua nanleh tua hundamna lampi kawmu nadin Hundamna Camp, Crusade chite i bawlpi thei uhi. Wilbur Chapman (1859-1918) in, “Jonah 3: 18 na sung sim inlan, tuana thutanna maitua dingte khu nazi, na pasal, na tate leh na innsung mite dingin bul inlen, tua zou chiengin 1Johan 5: 12 na sim kia in” achi hi. Tunin nang zong tami Laisiengthou te gel khu hoitan sim lechin Hundamna Camp, Crusade leh Revival bawl bawl zong lei aphat tuomna umsih na chi sih ding a, phattuom ahi, bawl teitei ding ahidan geldoh tha din kang lam en hi. Tunin hattuom chin a lamkaiten lung geltha kia vai in, Pasian Mission khu i hattuom chin in pibawl chiet din, Mangpa Pasian in simtu zousie thupha hing pechiet tahen, Amen.

How useful was this post?

Click on a star to rate it!

Average rating 0 / 5. Vote count: 0

No votes so far! Be the first to rate this post.

Admin: Get in lamka

Get In Lamka - Digital Marketing & Information Services, Shopping site Lamka, Churachandpur, Manipur, Shop online at getinlamka.com, Read Daily news of CCpur.

Leave a Reply