PASIAN NASEP ICHI PEN By: Pastor M. Thangboi Zou

PASIAN NASEP ICHI PEN By: Pastor M. Thangboi Zou

0
(0)

PASIAN NASEP ICHI PEN

Pastor M. Thangboi Zou

Text: Pasian a kipat a sawl mi khat a um a amin Johan ahi (Johan 1:6).

Chimtalou kei a simtu zousie, anai leh gamla a umte Mangpa Jesu min in ka jahna chibai hing buh ing ei.

Issue masa lam in “Lungdam huoi ei” chi thupi zangin mawltah in Pasian thu i na kikum ta ua, tutung issua a zang tami thupi zangin Pasian thu mawltah in sutkhawm kia lei chia hing kisah hi. Tutung a ikikup ding uh thupi khu ka pasal Pastor ahizie a ka gen ding hilou in, Khristian khat chindia hoi kasahlou zieh leh iki siemphat thei kha u’leh chia hing giel ding kahi man in, aval seng aum leh Pasian leh simtute kungah ngaidam ka ngen masa hi.

Khristian dihtah kahi, Vangam kai ngeingei ding a kigingta ten, tami amasan ngaituo phot vai. Pasian nasemte na bangchi mu ei? Na pastorpa bang? Sunday school sangsyete bang? Amaute thupi leh thupilou toh kisai gen hilou in, na bangchi mu himhim ei? Ngaisut tha in!

Amasa pen in: Pasian nasemte pen Pasian a kipat a hing kisawl ahina theilei kanuom hi. Pasian nasempa a thupilou in zong, a nna semdia sawlpa pen Pasian ahilam theilei a ut huoi hi. Ama asawlpa thupi isah bangin a sawlpa (Pastorpa/ Evangelistpa) zong thupi isah ding poimaw hi. Palm Sunday nia Mangpa Jesu tuonna Sabiltung zong gan hing lah ah nasepen, mawlpen ahi vangin, mipite puon phana tunga lamzawt hi. Bangzieh in?ichileh, a tunga tuongpa thupi ahiman in. Pasian nasemte pen ama uh mi hina ah thupi sih nan u’lezong a nna semsahpa Pasian ahiman in, eiten zong i thupi ngaiding uh ahi hi. Na pastorpa na thupi sim sih leh A sawltupa Pasian zong a thupi simlou nahi mai hi. Na thupi sim leh, A sawlpa Pasian zong a thupi sim nahi ngal hi.

Pasian nasemte in zong ama sawlpa Pasian ahina thei siem u’leh a ut huoi hi. Mihing sawl hilou ahiman un, mite tung ah kingah ding uh hilou in, A sawlpa Pasian tunga a kingahzaw ding uh ahi hi. Mihingte maipha sui a Pasian nna a sep ding uh zong hilou in, Pasian maipha sui a nna sep ding uh hizaw hi (Gal. 1: 10).

Anina ah: Pasian nasemte khu nangma banga mihing ahilam thei siem in. Johan zong Mangpa Jesu hing peina ding lampi sieltu a pang Pasian nasem mi khat ahi hi. Pasian akipat a hing ki sawl mi khat (Johan) ahi (Jn. 1:6) chin aki giel hi. Na pastorpa zong mi khat ahi, Vansawltah zong hilou, nang ma banga mi hing khat ahi hi. Mi khat ahiman in buching lou thei, Lungtha bei thei ding, gilkiel thei ding, thangpai thei ding hi. Na pastorpa nang ma banga mi hing khat ahilam thei siem zing in. Nang zong na innsung a dia buching lou na hi man in, na pastorpa zong buching jou zing tuonlou ding ahidan thei siem in. Sap thupil khat in, “No one is perfect” achi hi. Mihing buchin lounate Pasian nasemte’n zong nei veve ahilam thei siem vai. Tuazieh in, Pasian nasemte pen, nang bang a mihing ahidan thei siem gige inlen, phun phun sin! Thumpi zawlei hing hatzaw din ka gingta hi. Nang la?

Akhupsitna: Tulai igam Khristian hinkhuo ka et et chiengin, phun thei hina chia phun hilei kilawm mi bangza ahiei um din ka gingta hi. Phun thei hina chia i Pasian nasemte tunga phun phun ten Pasian kung a tun chiengun, Mangpa’n ka nasemte leitunga na damlai in bang chin na koi ei? chin dong leh zum seng ding ihi. Nang na tate school hoi penpen ah na kaisah nuom bangin, i Pasian nasemte’n zong a tate uh kaisah nuom hi. Ei Kumpi nasemten i ha sum sang bawn tawm isah leh, Pasian nasemte ha sum sang khu kining china hituonlou ahilam thei siem in (ei Pastor law thei siemna te maw?). Nang inn thupipi a na teng in, Gari hoi penpen a tai chin a i Pasian nasemte (Pastorte) Inn san a um, Biel fung dia akuon chiengua Line Bus a ituongsah un, iphunsan ngam nalai uh, nang tua dinmun a kikoi lechin phun thei hina chin na phun ngam na diei? ngaisut in, ngaisut tham ching mama hi. Ka pasal Pastor ahiman a tambang ka gen hilou in, pastor nna asep masang a kipat ka et et hita! eiten (hattuom miten) pastorte imusitdan/ igensietdan uh lamdang kasah mama hi, kou chileng (ka pasal neima) ka pastorte uh hichia phunsan san, gensia sia chinglou kahi uhi. Pasian nasemte khu Van apat hing kia Vansawltah hilou in, na tenkhawmpi, nang neh bang neh, nang dei bang dei, ahilam thei inlen, gensiet thaw nonlou in, Pasian nasepna lam a ahing hatsem sem na ding un thumpi vai, tua hileh tusang in mailam hun a I hattuom in halna tha, Pasian thutah, thugil a thei siem a hagaulam mit vahna kinei zaw ding hi. Pasian nasemte na simmaw a, na gensiet siet leh asawltupa Pasian gensia, musit na hilam kimanghil vawt sin! I tate ikhuol ma bang un, i Pasian nasemte zong gensietthaw lou in thumna toh apanpi gingtute hithei chiet din Mangpa’n simtu zousie hing guolzawl chiet tahen, Amen!

How useful was this post?

Click on a star to rate it!

Average rating 0 / 5. Vote count: 0

No votes so far! Be the first to rate this post.

Admin: Get in lamka

Get In Lamka - Digital Marketing & Information Services, Shopping site Lamka, Churachandpur, Manipur, Shop online at getinlamka.com, Read Daily news of CCpur.

Leave a Reply