Pu. SN John, President, Zillai GHQ  in Zillai Shillong Block’s 38th Conference 2019 ,Donbosco Technical Hall, Shillong  2nd October, 2019 ah a zillai chan pi te kiang athucha gena 

Pu. SN John, President, Zillai GHQ  in Zillai Shillong Block’s 38th Conference 2019 ,Donbosco Technical Hall, Shillong  2nd October, 2019 ah a zillai chan pi te kiang athucha gena 

0
(0)

2nd Oct 2019 | Get In Lamka

Zillai Logo

Khublei Shibun ai phi baroh!

A masape’n in tuni 38th Zillai Shillong Conference mang ding a hung zosiate zana chibai ka hun buk hi!

_Zillai a ding ah ka seppi – Zillai Shillong Block ah President leh a Executive memberte, Adivsorte, puitu masate, dawisaktute, Kochuam puitute, Zillai ngainatna zal ah hun pawimawtak taisan ah, Zillai Shillong Block 38th Conference mang ding ah chialna ngaikhawk ah Special Guest ah hung pangte – Pu N. Neihsial, IDAS (Retd), Member (Admin), Central Administrative Tribunal (CAT), Guwahati Branch; Pu Genlawmthang Vaiphei, Ex-President ZSB, Sr Lecturer, Navodaya Vidyalaya Samiti, Ministry of HRD, Govt of India leh Pu Lamneimang Vaiphei, Ex-President ZSB, Income Tax Officer, CBTD, Ministry of Finance, Govt of India te zosia zậna leh ka ngaisanna sangpen ka hun pia’i._

Mimal ah bangmalo mai himaleng, Zillai GHQ ah puitu khat ka hina hiatpi a, dawisakna leh ngainatna ka chan hi, Zillai a ding ah – President ka hi a kipat ka dawn masak pen a hi nalai a, ka kipậkna a sậng diak hi. Zillai District, Block, Branch leh unit tamtak umte ka ngaina puai tina hilo in, Zillai Shillong block hi ka kibual khakna – thil tamtak ka experience na a hiziak in, ka ngaina diak ah, ka kineisak bik zing hi. Shillong ah kum 15 vel chiata ah, ka um lai ah tugual dinmun ah kimukhawm kit ding kinepna a la umlo maleh Pathian in ei puikhawm kit a, lunghel bang le um in, kipakna a sang ma ma hi.

Tuni tiang ah Zillai puitu masate tup supiting ah, kituakna, kipumkhatna leh masawnna ding sai thei, genkhawm thei leh pangkhawm thei nalai ah Zillai te- a bik tak a Zillai Shillong Block-te I um naklai u hi, pi-leh-pu, nu-leh-pa leh dawisak leh ngainatute pauchapna a hi ziak in kipak a um diak hi.

_*Zillai GHQ hi, tutiang in kum 80 a valta, Pathian I lam ua a pan ziak liau liau in I masawn un I khangto uh a hi ti hangsantak in ka ti ngam hi.*_

Zillai Shillong Block le kum 38 I tingta, kum 38 I ti hi mihing hinkhua ah le a tunna ding tung ta, a hi hiding hizo a hi tai. Zillai Shillong Block hi tutiang in bang a hi tam? Mite’n bang gual ah ei hia’u em? Mi phalo kipawlkhawmna maw? Sual leh thil phalo ah? _*Ken vang, Zillai sung mai hilo in, I nam leh Manipur thingtangmite a ding in “Lawting pen” a hi ka ti ngam hi. Top IAS, IPS pianna I hiu a, Gazatted officer tamtak siamdawktu, office chuam chuam lua ding siamtu, sepai leh sepna zat chuam chuam siamtu a hi mai hilo in, mi tawmngai, nam leh gam a ding ah mi ginum siamdawktu a hi ti hangsantak in ka gen ngam a hi. Zia ziak a chun, puitu masate kipiakna leh tawmngaina hi hiatmil thei hilo ding a hi.*_ *Maban ah Zillaite hi, Pathian lau, chamna leh kituakna dawi, pangkhawm leh kisawmdawl thiam hiding in panla thak hitiu.*

Zillai Shillong Block-te hi lungneulo in, I Zillai leh nam a ding ah khuam pawimawtak I hiu ti hemillo in, kithậdalo in khatvei panthak la kit hitiu. I Zillai/I nam I ti’u hi, *“Eima”* I hi chiat ngal ua!

*“Tak chapa”*, *“Tak chanu”* ti’n, lawtinna tamtak I neisate ziak ah chapo mailo in, lawtinna sangzaw, I mi masate sang ah lawtinna chungchuang zaw nei ding in ka kinepna a lian a, Zillai leh I nam khuam I hina’u ngaitua thak in, mani mimal lawtinna ban ah, “Nam sawmdawltu” hizing ding ah panla thak ding in ka kinepna sangpen pakhat a hizing hi.

Zillai GHQ in le, Block te pawimawna bangkim ah kithuapi leh zathuap ding ah mansa ka hizing ui ti ka puang ah, lungneulo in theina lam zosia’n pang chiat hi tiu.

Tuni hin, zia hun hi lemchang ah la’n, Zillai GHQ in chiapi dan tangpi a neite, sepdaw a neite leh maban thiltup a neite, project a nei tawh kisai neukhat ka hun gen nuam hi.

Zillai GHQ in maban ah, tunung tiang ah le Zillaite kingậkna thei ding go (asset) pakhat bek siamdaw leh, zia sukpitinna ding ah tup kichian nei pawimaw kingai ziak in a hithei chan ah function leh kipawllimna pibawllo ding leh zia lam ah paisa I sen ding sik ah project I neite sukpitinna lam ngai pawimaw zawk ding kitup a hi. Kuama’n kipawllimna lam bawllo ding ti hizawlo in, zia lam a hi sum leh pai, tha leh zung tamtak sen kiven a, I project sukpitinna ding lam thupi ngai zawk ding tina a hi.

GHQ ah member 15 um in, meeting kituptak leh meeting sin leh Finance report a um zing hi. Tutiang in Pathian mapuina tawh term masa General Assembly thupuknate etzui a hia, a tamzaw chai thei a hita, kipak a um ma ma hi. Sukpitin nailo tamlo chate chule, maban hun sawtlo cha sung ah sukpitin pai I kinem hi.

Project lak in, *“Zillai Hostel -cum- Coaching Centre”* kiti hi tu term thak a ding ah main project pakhat ah kawi a hi. Zia ding tawh kisai nam sung ah puitu chuam chuamte consult a hinung in project zikdaw a hia, zia nung a chun review kibawl kit in, kizo tawbang himaleh sukfel chet a hi nai puai. Zia project pat chet hinailo maleh bang ziak a ziagual project ki guanggal a hem ti chawmcha’n ka taklang ut hi.

Thingtang lam ah nek hawl a kitam a, langkhat lam ah school I neiteu haw kingakna tak a um puai. Ziak a chun I chate thiamzilna ngai pawimaw in khawpi sung ah chate thiamzil ding in I kawi ui. I cha neu chachate chu town sung ah Inlua in I kawi ua, nek leh chak man ding, school fee leh a dang dang a ding sum leh pai chate chapang cha chate khut in I kawi ua. Naupang cha’n I khut ah sum a um phat leh lekha lam I chau mai hilo in, control tu ding umlo ziak in moral character lam le nasatak in I keniam hi.

Zia gual tamtak ki um a hiziak in, a mau chu Hostel man tamtak ah um zolo a hiziak un, Zillai hostel ah kimantak ah umsak hileh, a zilna mai hilo in, a moral character na tiang uh a ding ah phatchuamna hithei ding ti tupna a hi.

Zia ban a chun, state dang ah umzo lo maleh state sung ah chate school environment phazaw um sak nuam tamtakte chun tulaitak in Churachandpur a zuan ua, hostel in a umsak ui. Kei mimal ngei in ka hiat tiang in – Kangpokpi lam, Moreh lam leh Imphal lam na tiang ah student tamtak in Churachandpur zuan in Hostel in thiam a zil ui. Ziate lak a chun Zillai mi leh sa tamtak le a pang hi.

Zillai member a ding ah Hostel a chun tampi discount ah I kawi zing lai in, Zillai memberlo khenkhat chule midang sang ah tawmzaw in bawl piak tale’n – a mau a kipat fee I mute chu Hostel leh Zillai kito delna pang thei ding ah lunggel a kinei hi.

Chuleh, Coaching Centre hin a tup chu, sepna hawllaite a ding bik deu kiti a hi. A ziak chu – Lamka vel ah I society dinmun I et leh, Kochuam leh khawtang ah tawmngaitak ah pan ngai, hun awng nei umlo. Hun awng sun ah mani buaina titaklo Mobile phone bang kikhawi ut nalai a hiziak in, sepna hawlte a ding ah lekha simna lam ah hun piak chu thil haksa tak a hi. Ziagual ah sepna hawl zing lai, In ngei ah lekhasimna lam ah hun piak zawlo ziak ah mani kingai khawkna neite a ding ah, sepna hawl sung Hostel ah um a, hun tamzaw sepna hawlna mang thei leu ti dawina a hi.

Zia project a ding bik a hin Kochuamte zathuapna a ki pawimaw hi. Dan ah I gen, Kochuam lam ah khanglaite kipiakna phasalo lam hizawlo in, Zillai lawtinna chu Kochuam lawtinna a hia, Pathian I nasepna lianzaw a hiding ban ah, Kochuamte kithuapina tawh thagau lam na tiang ah le puitu hithei ding kisekdawna le hithei ding ti tupna a hi. Kochuam chuam chuam ah lawi upate le vethak a hia, a mau le lunglut ma ma uh a hidan a kihiat in kipak a um hi.

Zia ding a chun, midang/govt fund ah kingalo in, *“Mani hekna ngei ah”* ti pancha in, cheng 10/20 ziang hilehle, mani kiphalna ngei ah tuakkhawm in, *“Mani hatna”* ma’n siamdawk thei len ti a hi. Kum khat ah Programme thupi deu khat I sai leh lakh 5-10 vel bang kiseng zo sek a hi. Zia chu a hileh sawtpi I mat phatchuam ding Project khat lakh 40/50 vel bang ziak a hem I bawldaw zawlo ding ti’n kidawng chiat hi tiu.

Hun tam neilo I hiziak in, project dangte chu detail in gen takda phawt hitin, a pawimaw dungzui ah tulai information technology le a hawita, zia lam a ding a chun khek ding kisai tiu. Himaleh, detail genlo in, a tangpi vak taklang hitiu –

Zillai Dictionary 2 vei hial edition a la umta chu, copyright I muthei leh revised and enlarge bawl ding ti a hi.

Zillai dress code kinei thei leh. Numei lam in nam puan cheng thei chiat maleh pawsal a ding ah necktie leh mantamtak ah kichaw Waist tikhel a umlo ziak leh lungthim khat pu ah pangkhawm thiam ka hinau ti suklatna kawm ah mimal in design I dawidan chiat ah kikhui theina ding ah official pawmpi dress code pakhat um leh ti a hi.

Kipak umtak in technology lam ah le update ngai ti ziak in Zillai Official Youtube channel bawldaw a hita, zia chule I support theina sun – Subscribe, like leh share chiat ding in I ki chial hi.

Activity leh plan neu chacha i nei haw um maleh ziate chu suklat da phawt hitin.

Zillai GHQ in project I neite chu, kei Zillai President a ding a hi pua, GHQ a ding le a hi chuam diak puai. Zillai leh I nam zosia a ding a hiziak in, _*“Keima a a hi”*_ ti thei chiat a pawimaw hi.

_Pathian in nam khat in ei siam a, zil thei ding ah ei kawi mai hilo in, tamtakte chu sepna thupi tak ei pia a hi. Pathian in ziate chu – eima a ding chouh ah hung piak hilo hial a hi – I chipi, Inampi, Isuapite panpi leh dawpsanna ding ah a hung piak khawm a hi ti hiatmillo ding a hi. Sepna hawitak I neite le chapopilo in, ka nam a ding ah ka pan theina lam ah pang zing ding ka hi ti thei chiat hitiu. Tamveitak Zillai leh nam a ding ah a la pang ngen ihitau a, maban ah le pang zel hitiu. Nam a ding ah I pannate khangthakte’n hemillo ding a hiu._

Nam khat ah hung siamtu chawihawina pha pen chu, a hung piak nam chawihawitu hi le pakhat a hi. Ziak a chun, ka suapi – ka zillai chanpite, tha thak lai tin un, eima a ding bep ah zillo in, ei ma a ding bep ah kaam neilo in, chipi-nampi a ding tawh sim in, sem chiat ding in ka hun chial hi.

Nam dang in bang a buaipi em ti buaipi a ngai puai – a mau chiadan ah le kisukbuai a ngai puai – Zillai te chu Pathian he kawm ah, nam ngaina, kisawmdawl thiam, pangkhawm thiam, kipumkhat leh mani zilna ginum leh titak a hiu tu mite hiatna hi hen!

Social media nasatak in I hinkhua a sukhata, matthiam a pawimaw hi. Khat leh khat kitawsawt tuakna mang hitiu in, mi gensiatna leh demna mai in mang puai tiu. Pau zilna leh kepbitna lam leh i chawndan te haw hiatbena leh kepbitna’n mang zawi tiu.

Mimal min chiat hi I *“brand”* a hia, I brand chu midangte etla thei chiat ding in siamdaw gua’i tiu. Phone lak ah le iphone I ngaisang ua, I dawi chiat ui. Zia iphone demand sang gual in, ei mimal min le demand sang pen hithei chiat ding in kisa’i tiu.

_*Zia ding a chun Pathian in Zillai te malsawm hen la, Zillai Shillong a kipat – Officer tamtak, Pathian nasem, gam leh nam a ding ah suan leh kingakna tak tamtak punbe zel hen!*_

*Zillai khangto in midangte ettawn hita hen!*

_*Khublei shibun!*_

How useful was this post?

Click on a star to rate it!

Average rating 0 / 5. Vote count: 0

No votes so far! Be the first to rate this post.

Admin: Get in lamka

Get In Lamka - Digital Marketing & Information Services, Shopping site Lamka, Churachandpur, Manipur, Shop online at getinlamka.com, Read Daily news of CCpur.

Leave a Reply