SHYAMKUMAR DISQUALIFICATION THUA THULHUTNA TUNI COURT IN THULHUTNA NEI DING
Achesa 2017 state assembly election a Congress party akon Andro AC a MLA hungkaidohTh Shyamkumar chu MLA dinga kitepna anei masanga Congress dalha a BJP a analut toh lhon a Congress in Anti-Defection Law noiya disqualified bol dinga ngehna ana nei utoh kimat a tuni (Tuesday) a High Court of Manipur in thulhutna aphondoh ding ahi tin Nitin Thusoh correspondent report chun aseiye.
Milun Shyamkumar hi Congress akon MLA hungkai doh ahin, hinla MLA dinga kitepna anei masang in Congress dalhan BJP a ana lut a MAHUD, Forest and Environment leh Horticulture & Soil Conservation Department minister peh a ana umchu Constitution’s 10th Schedule, tia kihe Anti-Defection Law toh kikal ahi tin disqualified bol dingin Congress MLAs Md Fajur Rahim, K Meghachandra leh ex-MPCC president TN Haokip in court a case ana bol uh ahi.
Milun Shyamkumar Anti? Defection Law toh kitoh louva Congress akon BJP a alut jeh Congress MLA hon court a petition ana bol utoh lhon in Justice Kh Nobin umna High Court of Manipur Single Bench in kumlui akon hearing ana nei chu thulhutna phondoh ding chu tu July nisim 2 nia kon reserved a ana um ahi tai.
Chuleh Congress akon BJP a jamlut MLA dangho case jong Manipur Legislative Assembly Speaker’s Tribunal leh High Court a case pending ah aum nalai in ahi.