SOCIAL MEDIA ZATDAN KISINHUAI LEH KIDOPHUAI

0
(0)

*SOCIAL MEDIA ZATDAN KISINHUAI LEH KIDOPHUAI*

Minam dangte leh gamdang ten social media pen galvan lauhuai pen dingin zang uh a, minam dangte leh gamdangte tungah a thuneihna huzap (influence) uh zat khumna ding leh amau meetna leh hamphatna (interests) laihkhiatna dingin zang uh hi. Tu hun in media zat siamsiamte galvan sangin a muibun zaw leh khauh zaw nei suak ta uh hi.

Ahih hangin ei khamtung mite in ei leh ei kitawlem tuahna ding, kimindai sakna ding, ki-elna ding leh upmawh leh zuau bulomtang ut teng khahkhiatna ding leh pangpalek bangin tungnun kituhna ding leh a dik zaw kidemna dingin kilim zat lai mahmah bilbel hi.

Social media zat lawp henhan mahmah napi hangin cyber laws leh cyber crimes bang hi hiam cih lah kan sese lo, awlmawh leh palsat khak ding lah lau sese loin kum cing lo buanna tuak, kum cing lo mi buan (juvenile rape victims and rapists), sia nengneng mi buan a ngawhna tuakte maan leh min (identity) khawng a khahkhia masa pen ding kidem in khahkhia ngam ziahziah lai zen hi hang. I pil ma dong gilbeem baang i zutna ding baihlam mahmah hi.

Minam vai ah pawl tuamtuam, makaite leh minam tuamtuam teng ban suktuah in, mi’ up theih ding zuau (propaganda) khah kidem in, kiminsiatna ding vive khah kisaan mahmah dep hi hang. Kinawh khantoh henhan ngel tak sa ing. Media khawng ah sa gawhna, sa sung bawlna leh zut duatduatna, i pawlpite hun zatna teng ban khahkhah khawng zong tu lai vai nawn loin tawta vai lua ta hi. Minam khangto ten tua dante ciing nawn lo uh hi.

I gen ding i theih kei leh i gen loh ding beek zong thei zel leng hoih ding a, picinhuai zaw ding hi. A hai kicih ding kuamah ut loh ihih manin a hai huai luate social media ah khahkhiat khawlsan ta ni.

India gam bangah buanna tuakte identity suahsak ding Section 228 A of the Indian Penal Code in phal vet loin thukham khauh mahmah hi. Indian Penal Code (IPC) thukham nuai-ah section 376: numei buanna (rape), section 376A: numei buanna hanga sihna tuak ahih kei leh khuaphawk loin om suak den (rape leading to death or making victim go into a permanent vegetative state), section 376B: nupa a kikhen sungin a pasal in a zi sex va kipawlpih (sexual intercourse by husband upon his wife during separation), section 376C: thuneihna nei ten mi a luppih (sexual intercourse by person in authority) ahih section 376D: mihon buanna (gang rape) tuakte identity suahsak a, pholakkhiat sak mite thonginn ah khum ding (a thongkiat hun uh kum nih behlap sak ding), liau sak ding hi cih thukham khauh mahmah na om hi.

Na pholakkhiat theihna dingin kuama’n phalna hong pia lo ahih manin va pholakkhiat sak ding lawp lua heha sese dah in. Nang leh nang na kituisa buah khumna suak zawsop ding hi. Na vawh bang na at hun ciangin a gah kha mahmah ding hi. Thukham omna leitung ah thukham zahtak loin ganhing bangin na phengtat buatbuat leh nang tawh a kituak leh a kilawm khawm dingin ganhing bangin hong kibawl ziau ding hi. Ganhing leh mihaite lo buangin thukham amau khut sungah la-in (taking laws into own hands) in gamtang ngei lo hi.

Buanna thupiang a om ciangin a maan khawng uh suaksak in, a min leh kum uh, a khua leh tui uh i pholakkhiat pahpah pen thu hong kibawl khum leh i neih khempeuh i liau banah i pil dong gilbeem baang zutzut loh buang i ngah kik dinga kilawm zaw thudang om lo hi cih thei-in i kidop mahmah ding kisam hi. Midangte’ human rights simmawh sakin, thulimsim sak loin na palsat sak thapai leh nang rights zong hong kisimmawh sakin, kithulimsim sak loin, hong kipalsat sak ciangin khasia in tangtel sihtan bang sese kei in.

India gammi na hih leh Section 228A(2)(c) of the IPC in buanna tuak (rape victims) hihna (identity) pholakkhiat ding phal vet lo a, a sih khit nung nangawn un a identity uh pholakkhiat a, media ah suaksak ding phal lo hi cih mangngilh kei in.

#Don’t reveal identity of rape victims for public sympathy. It is violation of their rights to privacy and dignity; and violation of human rights (even the dead have dignity).

_Thang Khan Lian #ZUNs_

How useful was this post?

Click on a star to rate it!

Average rating 0 / 5. Vote count: 0

No votes so far! Be the first to rate this post.

Admin: Get in lamka

Get In Lamka - Digital Marketing & Information Services, Shopping site Lamka, Churachandpur, Manipur, Shop online at getinlamka.com, Read Daily news of CCpur.

Leave a Reply