SUALNA THUPHA CHAWI NGAM   By:GL Muana Neitham

SUALNA THUPHA CHAWI NGAM By:GL Muana Neitham

5
(1)

SUALNA THUPHA CHAWI NGAM

By:GL Muana Neitham

*Ziaphatchun, ka gitlona la kiang in ka puang ah, ka khawlona chu ka îm ta pua’n; “Ka sukkhialna chu Lalpa kiang ah thupha chawi ta’ng ka,” ka tin; tichun, ka gitlona chu la ngaidam ta ahi* (Selah)
SAM 32:5

Khawvel ahin *SUALNA* chi chuam chuam tam tak a um in. Khawvel dan kal ah Sualna chi tamtak a um hi. Sum leh pai lam ah dan phallo zawng ah sum hawlna, muna leh matna tite, Nek hawlna, insung etkawlna hihenla nupan kikal, tangval leh nungak kal ah Sualna tamtak le gen thei a um hi.

Zia khel achun sualna tamtak zat chuam chuam gending le um in a.

Khawvel ah milian leh mi lalten sum diklo tak ah a selguknau thu taklang/mudawk ahem, gam khat President chu zamaw (sex) lam ah diklo tak ah a umna mudaw ahem, matdaw ahi chun; chanchin ki suana (Newspapers) haw chu a lun ma ma sek un ahi. Gawlgukna mangcha diklo tak ah Government a sepna chawte bang mandawk in, a Min uh taklang in hung um taleh chu.. Sualna pang, diklo tak ah sum mu, sepna gawlguk ah chawk thaw matdawk Kristian kiti te lak ahin atam na ding e maw…
Mihiatlo leh mi mulo ah Sualna bawl kristian kiti atam na ding e maw.
*Lalpa mit chu mun tin in a um a, mipha leh phalo a entha zing hi*
THUPILTE 15:3

Sualna ahiloleh gitlona chu gentamlo in Sualna ahi mai hi. Gitlona chu akang, avom a um chuam puai. Sualna chu sualna ahi mai hi. Hinla zamaw lam ah gitlona hi, gitlona huaise ma ma chu ahi. Sex lam ah sualna chu taksa pawlam hitalo in mani taksa ngei subuak ahi.
*Thanhuaina hi haisan un. Gitlona dang hi taksa pawlam thil ahi’n, mi thanghuai chun vang a taksa chung ngei ah gitlo bawl ahi*
1 KORINTH 6:18

Gam thupi leh changkang ma ma te haw apat, a lawi upa teu hem, biakna lam ah hotute bang zamaw lam ah a sualnau matdaw atam sek ma ma un ahi.Ei uh chenna gam neucha leh gam mawlcha Kristian kiti te apat hinle sex lam ah sualna matdaw ding, taklat thei ding tam in a e maw.. *Pathian in vang chu ei hechian in, ei muchian ma ma ahi* Mihing chanpi te chu vang themzo in, mi mulonan sual bawlsek maleu hin le..

Tunin Unau nang le Sualna nei lahi, laki hetchian chun;
*La gitlona, la sualna selgua ham ham kin*
Leng David chu Bethsheba tawh Uriah chung ah a sualna,Zawlnei Nathan in agen khum phat in, David in a thiam channa ding ahawllo ahi. A Lunggil tak ah kisik in Pathian kiang in ngaidam a dawn mai hi.
*David in Nathan kiang ah chun, “ Lalpa chung in ka la gilo ta a hi,” a tia. Nathan chun David kiang in, “Tu’hin la gitlona chu Lalpa ‘n a lamang tai; thi lo ding la hi*
2 SAMUEL 12:13
La sepna mun ahem, khoitak mun hitaleh la sualna leh la gitlonate Pathian ma in taklat zing ahi ti hia in, tu mah2 hin Kisik in ngaidam dawn ngal in. *Genthiam kamthiam leh nang pilna leh chalak mang in kisel guk gua kin aw, Lalpan khatvei tei chu hung hawkdawk tho tho ding ahi*
David le migilo leh sual ma ma ahi, hinla gitlo selguk gua leh thiamchanna ding hawl gua mi ahi puai. Lunggil tak ah kisik a Pathian kiang ah gitlona thupha chawi mi ahi.

Pathian in a hepina awnem tak in ei ko zing ahi.
*I gitlonau thupha I choi uh chun, I gitlonateu ngaidam ding leh, I dik lona zosiau silthiang dingin ama chu a ginum in a dik hi*
1 JOHAN 1:9

*THY KINGDOM COME*

How useful was this post?

Click on a star to rate it!

Average rating 5 / 5. Vote count: 1

Admin: Get in lamka

Get In Lamka - Digital Marketing & Information Services, Shopping site Lamka, Churachandpur, Manipur, Shop online at getinlamka.com, Read Daily news of CCpur.

Leave a Reply

×
×

Basket