SUM MOH NA TATE, BANGPEN DEIZAW? TEL IN!  By Pastor M. Thangboi Zou

SUM MOH NA TATE, BANGPEN DEIZAW? TEL IN! By Pastor M. Thangboi Zou

0
(0)

SUM MOH NA TATE, BANGPEN DEIZAW? TEL IN!

By Pastor M. Thangboi Zou

Thumapui: Anai-le-gamla a um tam Article simtu zousie kajahna Chibai hing bawl ing e. Tunia I thupi dingin “SUM maw Na TATE, bangpen deizaw, tel in!” chi ka hingtel hi. Ka hingtel nasan ahileh, I gamsung ka et-koi chiengin, nu-le-pa tampi a Tate hoina die nnasem kisa a, Ta tampi hasuoh mi ka mu jieh, mailam hun a I hasuoh nonlou nadingun, Bible toh panga TATE kep dingdan kikum lei chi ahi. Bukim lou nagam a khawsa ihi nalai jie un, achingla leh avalseng igenkha aum ding leh Pasian leh Simtu zousie kunga na hing theisiem ding un kang ngen hi. Nu-lepa lawching ichite khu, “A Ta hauzieh, Sum leh pai, Building thupipi alampi zieh hikim khawllou in, Pasian in apie a Tate khu thuzaw, Tate etton thei dia umzingte leh Pasian thu toh apuizou te khu ahi nulepa lawching kichite”.

Na Tate hinkhuo zatdan khu na Sum mudan ahi:

Sawlta Paul in Timothy kunga, “Sum ngainat khu silhoilou chinteng zungpi ahi a, tuakhu pawlkhat in adeigaw ua, ginna akipat apielmang ua, lunggimna tampi in akisum pailet uhi” chin 1Tim. 6: 9-10 na agen hi. William Booth in, “Tubam kum bangzat ahiei chiengin, sietna khu sietna kisim nonlouna hun hing tung ding ahi” chia ana genpen dih mama hi. Tunin ahingtung tamai hi, tulai Khristian kichi khen khatte sum suidan tangpi te enlei, Hattuom sunga kizang thei mama ichiten Kani Lei hou in, Sum asui ua, akhenkhat kiaten Drugs toh Sum sui ta uhi, mi khenkhat kiaten Govt. tungtawn a Culvert bawl nadin sum tampipi la un, nanleh bawl hoi sawm lou, mi dangkie ten Lampi bawl nadie sum la, nanleh Lampi phaw thaw (asiet sietna bou bawl), tualeh Office a Zuou-le-naal a Suoi kai kai mai, mimal hamphatna die, migentheite die panpina (Govt. a Fund) ngen nanleh mi hausa ten kimu mumai, amu dingten kichiem maw nadia mugiep hileh kilawm. Koipen adia fund hing pei adiei maw! Thei zou hoi nonlou, tulai igam mite chet dan ahi (nang kang getna hilou in, tambang chindan hoilou chingte igenthu ahizaw bou hi, avalseng leh ngaidam). Tambang a Sum sui itamseng tajieh un, enkoi ding ua, Building thupipi kilam, Car hoi penpen atai, laisiem tampi ta kinei, nanleh innsung, hattuom sung, khosung leh Veng sung subuoi in apang ta uhi, tuami khu akipatna bulpi pen die kamu khu ahileh, I Sum mudan uah Pasian kipah lou jieh hidin ka gingta hi. Sum tampipi imu a, Building Inn hoi/thupipi akilam a, asung a Car mantam tam akikawi a, nanleh tua building thupipi te innsung a kipahna leh lungmuonna umlou in, khamthei addict Pasian hingpie Tate aum siengta hi, chilou maw!

Tunia zuou-le-naal a inn kilam inn pen kipahna leh lungmuonna bukim kimu lou ding ahi, Nulepa hoilou tate ahoi avang mama ding hi. Ta hoi nadei leh amasan nulepa te ahoi masat ding uh ahi, ta gin-um, mi thudih, mi chitah nadei uleh, nou nulepa te hing thudih in, hing chitat in hing gin-um uleh chin, sum zawng akizat nading bangta in ahing zang ta uleh chi’n na innsung uh hinghoi maidin ka gingta hi.

Gamdang a na koi na tate nakansui zel naima? Gamdang a Tate laisim die koizoute atangpi in, mi tungtuong deute ahi uhi (Officer, Contractor, Govt. Sangsye bang hideu tangpi uhi). Ha teng a Sum tampipi athotnua ua zong hunsa nailou in, Atate uh suty hunchieng bang un, Train a pei sangin Flight a hoizaw chin Sum tampipi seng benalai uhi, Tami khu sildang zie hilou in, Itna zieh ahizaaw bou hi. Tambang Nulepate kunga ka hing nget nuom pen khu, “Laisim a na koi na taten bangchin hinkhuo azang uoi? Koiteng toh kithuohkhawm, bang teng bawl chia kansui umlou hilei akilawm hi” (Kerela a Kum 3 sung Bible ka zil a kamu khiet leh Delhi a um Eimi Magazine Editor ka houpi te a pat ka theibete ahi), tuabangte zieh hiva I tate addict sa inn ahing tung kie nasan ukhu. Papi Khat in, “Ka tate laisim dan theinuom in kum khat in khatvei SUM pala/ batla hielin ka tate kung kavapha a, akhosatdan uh, a laisim dan uh leh koi teng toh kigawp ahiei chi kava kansui zelzel hi” chin agen hi. Ta tampi laisim die kuonkhie un, nanleh alaisim ding uh manghil a, nulepate Sum thotpen nuomchetna zang tampi um ahi (Laisim zousie hilou in, a hihna kimanghilte bou ahi), tuabang mite khu, akuon masang ua mihoite, tuabang naupang hoite Delhi, Bangalore vatung sese dah uleh adeisa ahuoizaw hi. Ajiehpen avatun masang ua mihoilai tua khen khatte sevawt hitamai ahinkhuo zat uh.

Nulepa ten a tate uh a itna zieh uleh, amaban ding akhuol nazieh uh, akhenten neival a State dang a koi hilou in, khonung chie a khanguolnu/ akhanguolpa apha zoukha uleh chie Sum tampi seng khosa lou in apang ua, ahoi mama hi, hinla akivat khat ahileh, a tate hinkhuo zatdan kansui lou um khate zien dahuoi kasa mama hi. Mundang ah aup na hunsa mailevang thukhat, tuachilou a mihoi, mipil ding nadei saleh, atung a Papi pa bangin, kum khat in khatvei tei va enkhie lechin ahoi ding hi.

Kum 2006 laibang nonlou ahi, tua hunlaiin Mobile mi zousie in (tua akinei chiet banga) nei kim nailou in, Tate leh Nulepa te Laithon akithon tuoh uhi. Tunin na tate Mobile a na hoipi in hunsa sinlen, na itdan, ama tunga nakinepdan, agin umzie a tunga nakipah dan leh na thumpi zing ahidan laithon in giel inlen, tua bangma in, amaute apat muding kinem in (Mobile a ut teng kigen ngam in, laithon a ahoipen, athupipen leh apoimawte bou akigen giep hi). Laithon pen Ha khat a khatvei tei nathot ding, tualeh amauten zong ahingthu (reply) kie nalam et ding ahi, na laithon tungtawn a na thei dingte khu, na neival a mundang a laisim die koi lou na hidan, na itdan thute leh nadeisana sangpen na pie gige ahidan Mobile a naza sahban a, tam anuoi a te chiemte in:-

i) It mama leh ngai mama hinapi a, maban ding khuolna zieh mundang a laisim die koi na hidan leh ama apat lam-etna sang tah nei nahi dan theisa zing in.

ii) Hanthawn gige inlen, ama na muondan leh ama a na kinepdante, ama gim-umna leh Pasian puina zal ah alaisimte athawnlou ding dan theisa gige in.

iii) Lai asim ding tengin Thumna leh Bible sim a chinding (habit) ahidan leh amaphatdan theikawm a Pasian zaudan leh amuon ngam ding ahidan akung a ngen in.

iv) Hasatna leh buoina, beidawnna leh mangbatna atuochieng a Pasian kunga panpina nget ding ahidan sinsah in. Pasian amuonhuoidan nangman na tuokha silte (experince) a pan hanthawn zing in, tua hileh mundang aum na tate lungmuong in kipah ding uhi.

v) Ama adie nasim a Thum gige na hidan leh theitop suoh ah ama die pang na hi dan theisa gige in.

vi) Na tate Attendence bang a College ua kansui zel in, sangnaupang tampi attendance chinglou zie Exam bawl theilou laisim amundang akuon mi um ngai ahi, tuabang miten a innsung mite kunga Mark sangpipi mudan in Zuou agen ngam nalai uhi, tuajieh in, alemthei dinga ahileh a kaina College ua Mark Sheet, College Repord leh Expenditure bang la thei zel lechin ahoi mama ding hi (Tami ginmaw na hilou in, Ginumna, thutahna leh chitahna atunzaw ding hi).

Pasian in Tate khu bang achi ei? Na Tate khu Mangpa akipan Gou manpha ahidan thei zing kawm in, gin-umna, chitatna toh na etkawl zing ding ahi. Mangpa kunga natung chiengin Aman na Building Inn thupi, na Car hoi penpen te ahing dong sih dinga, ka hing pie na Tate aum kimnai chin, ahing dawng ding hi, tuahun chinegin bangchin na dawng dieie? Pasian kipahna banga na dawn theina din, tamlou anuoi a ka hing kikhawm hi. Tuate ahileh;-

Bible pansan a tate tung a mopuohna:

i. Na tate aneulai un Piengthasa in, tualeh Pasian kunga puilut in (Mt. 19: 14, 1Sam. 1:28, Lk. 2: 2, Pau. 22: 6).

ii. Na tate mikhiel ahidan hil in, Pasian kunga khelna jieh a Thumna toh ngaidam nget ding ahidan hil in (Heb. 1: 9).

iii. Na taten Jesu Khrist a Ginna det aneizing nading un, nang apat in zilkhe sah in (Phil. 2: 17).

iv. Lom hoilou toh akigawp dingna deilou leh hil inlen, sietna alut louna dingun thu hil zing in (Pau. 13: 20. 28: 7, 1Jn. 2: 15-27).

v. Na tate hinkhuo pumpi ahoizing nadin Thumna toh delzui zingin (Ephe. 6: 18, Jn.17: 1).

Akhupsitna: Na Tate sang a maw Sum na deizaw, tel in! chi thupi igen natung ua, igetnuom die pen khu, tulai nulepaten a tate uh pilding, siemding theitop suohin pan alapi uh ahoi mama hi, hinanleh ahoilou khat ahileh, School hoipen leh Tuition Laseimpen te kunga Sum imute seng khaw salou in aum a, nanleh Pasian hingpie a Tate uh Pasian Biehna a ngaisa na uoi? A piengtha na uoi? A piengtha lou uleh bangchia piengtha ding chi ngaisa lou hilei akilawm tamai hi. Sum na thupi ngaijieh un, theitop suoh in na sui a, na mu ngei uhi. Tua sum te in na tate uh apil ding uh, asiem ding uh na thupi gel bangun ahingmu ua, nanleh Pasian thu a na thupi gelsa lou zieh un bang ahing chita uoi, tua na sum mute uh hing zangkhiel in, khamthei ah ahing kibuol ua, Pasian lam a na ngaisa lou jieh un, innsung a buoina siemtu in ahing pangta uhi. Tunin tel in, Sum maw na dei? Na Tate te maw nadei, tel in! Khamthei toh na tate na chom leh thei zingin Ngai anglai flim a Chingnou pan No.4 toh a innsung akep leh atanu neisun Chingnou khu No.4 ziehin ADIS vein ashi loh hi, nang zong tuobang na maban hithei ahilem na kithei ei? Na Tate siem diing leh pil diing nagelkhaw a, Skul hoipen a nakai sa mabangin, Pasian a hinna aneitai, awleh neinailou chi theikhiet sawm inlen, Khanglai kikhawp leh Naupang Sunday Skul a bulphu in na kisei vawt sih diing hi. Pasian theilou Tate khu pilna siemna sangpi nei uleh zong innsung, khosung, Namsung leh gamsung adie buoina siemtu in ahingpang uhi, ahinla Pasian thei Tate khu mite bangin siemna leh pilna sangpi hisih nanleh Pasian adin ahinkhuo zangin a innsung, khosung, Hattuom sung, Namsung leh gamsung adin ahing kizangthei zaw uhi. telin natel penpen na tate hinkhuo zatding ahi.

How useful was this post?

Click on a star to rate it!

Average rating 0 / 5. Vote count: 0

No votes so far! Be the first to rate this post.

Admin: Get in lamka

Get In Lamka - Digital Marketing & Information Services, Shopping site Lamka, Churachandpur, Manipur, Shop online at getinlamka.com, Read Daily news of CCpur.

Leave a Reply