TATE MUUK AH NU MIN BANG ZAH TA A MANPHA A HIA?
Mawi Tombing

TATE MUUK AH NU MIN BANG ZAH TA A MANPHA A HIA?

0
(0)

*TATE MUUK AH NU MIN BANG ZAH TA A MANPHA A HIA?*

📝 _Mawi Tombing_

“`Pa leh tate a din Nu hoih manpha lua hi. Damlouh hitan a tuah unle Nute hospital thupi pen leh nai pen ahi uh. Nute ngaihsakna ah tawldamna a om a, a khut a hon khoih lel leng damna a chingthei hi. Khovel theihthama mi thupite tuh Nu hoihte tuhgah ahi pen hi. Nu tellouhna inn zaw khovel tuinak omlouhna gamkeu banglel ahi. Mi kuapeuh in Pathian ngaihsak Nu a neihleh a genthei kei ding hi. Pathian thilsiam lamdang leh thupipen zaw nute ahi. Nu hoih khat sinsaktu za-khat sangin a manpha zaw a, zakhat sinsakna toh ki bang hi. Naupangte muk ah Nu min hi Pathian min bang tuk a manpha ahi. Nu chih thumal ah lungtang nopsakna leh kipahna bang zah ta in a ki phum de aw..innkuan nopna dingin kipahna chabi koltu Nu te ahi..“`

*Ka hinkhua a kana tuahkhak leh ka na totkhak tamlou kon gen di. Nu ka chin a ka hoih ka chihna hilou in, Pathian honpi dan a thupiluat ziak a hon gen ka hi zaw… A pa’n hon omlouhsan tung laiin ka tate kum nga leh kum thum mi lel ahi ua, a pa luang nai a cycle tai thei lel phet ahi uh. I lungkham ikipah kuppih theih hinailou uh ahihman in haksatna thupitak kituak sek hi. Lungkham leh mangbang a manohna ding gamle theilou a hih hamhaih a ka om hun inle Toupa’n hon taisan kei a, kei adia hoih zaw ah hon na pi zel ahi zaw. A Pa sih zoh a ka Thumna – Toupa aw ka tate kem dia hon muang a ka pasal non lak sak ahi a, kei a dia hiaitan pasal neih hun sa ta na hi ding a, ka tan ah lungkimna, kipahna leh lungmuanna honpia in la, ka tate kem dia hon muanga kei damna hon pia na hihleh ka innsung leh ka tate ading in ka hih theihna zahzah in ka pang ding chi in ka thum a, Toupan ka thumnate hon dawng in tuni tanpha nek-leh-tak, silh-leh-ten tasamlou in hon koih a, ka tate a pa luang ma a cycle a tai te bang le tun pichingthei dinmun ah honpi tung a, ka kipak petmah mai hi. Sum-leh-pai a poimohna mun ah amah hongpang a pasal poimohna mun ah amah hong pang a, ka innsung a zahlakna di tampite aman hon liah khuk zel a, ka pasal tang in Pasal in ka nei a, ka lung akim mahmah hi. Ka tate neulai in ka khanvualte hoh na khompi khong, lazilna khong ah tel ka ut thei mahmah a, amaute lungleng tak in khitui toh ka en liam zel hi. Tate don ngai – kep ngai i sik itang di omlou, nekzon ngai ahihman in mite telna te ah ka tel theikei hi. Lungleng taka hinkhua zat in om hi. Pathian in thumnate hon dawng in tun tuh utna munte a hohthei kihel theiin ka om ta hi. Toupa min ka phat hi. Tangkhatna in nasatak in hon tuam a naute toh buai a khosa a ki hi a, Pathian ni kikhop dek chiang bangin nakpi tak a Kiginni khong a ki sakkholh ngai mai hi. Mite kikhop ding khong limlang mai a ki zut a ki chei sek ua, kei tuh ki chei manin le ka om kei a, ka puanten di bang ka toi thoh a lampi a teng suk chih khong in ka om hi. Tun tuh ki chei ut hileng hun om deuh ta, Toupa min ka phat ahi. Ahun tak in Toupa hon pinate theisiam kei mah le hang ihoih na ding a hon na pi pi dan ahi.*

_Awle..tuni a i gennop tuh Nu/ Numei hoih poimoh lua, Nu hoih innsung in poimoh lua, Nu hoih Nu manpha bangzah ta a thupi a manpha ahia?? I tate adin damna Nu i hi hiam?? I pasal adin lungmuanna vaitamin petu Nu ihi hiam?? Nu hoih pilin amah a ditan lel en lou in a tate atute khang tan a din vualjawlna nu hih tum hi. Tulai hinkhua bang diakdiak Nu hoih poilua hi. Tate toh innsung a hun zatkhom mah manpha pen hi. Nu hoih tate’n a ngai ua Nu hoih omna innsung paleh taten innsung nuam asa uh hi. Tawldamna in a suak sak ua innsung nuam vangam naipen a suaksak uh hi. Ka Nu hihpihte Toupa deih na bang in Nu hoih leh manpha hih sawm chiatni uh aw!! I tate hinna ithuai in manpha lua hi. Toupa’n Goutan hon kepsakte amah deihna bangin i kem ding uh aw. Amah kiang a pilut dingin panlathak chiat ni uh aw. Nu hoih thupidan-manphat dan thupilua hi, tua ding in kipanthak ni uh aw..!!_

*Toupa’n Nu hoih- Nu manpha hi chiat di’n simtute hon vualzawl chiat hen aw.* 🙏🙏

How useful was this post?

Click on a star to rate it!

Average rating 0 / 5. Vote count: 0

No votes so far! Be the first to rate this post.

Admin: Get in lamka

Get In Lamka - Digital Marketing & Information Services, Shopping site Lamka, Churachandpur, Manipur, Shop online at getinlamka.com, Read Daily news of CCpur.

Leave a Reply