THE CRAFTSMAN ENCOURAGES THE GOLDSMITH (Isaiah 41:7) By: Pastor Dawngzathawng

0
(0)

THE CRAFTSMAN ENCOURAGES THE GOLDSMITH
(Isaiah 41:7)

By: Pastor Dawngzathawng

Zie a Craftsman kiti pen hih mun khenkhat ah “metal worker “ leh “Carpenter” ti’n le a kilet hi.

Abang hileh Craftsman sânga chuh goldsmith nasep thupi zaw him him ahi. Sana sêk chuh a dangcheng sâng in a lien zaw himhim hi. A dan taka chuh, Sana sêk pa’n anuoi a thîk sêk, bel dêngte, khut thiemte a tîlkhoh zawk ding hina pi’n aneu zaw, a niemzaw te’n a sângzaw, alienzaw te a leh tîlkhoh daih hi.

I lungkiek ni, i bahsam ni, i chauh tawp nia tha ei pie, ei tîlkhouh te hih enta leng, a tângpi’n thagau lama i ngaihsân mah mah leh i suon mah mah te ahi vek puoi. Mi vântâng, bang taluo a i gelloh te a ana hi chawk sek hi.

Paul in Rome bung 16 na a amah a dinga tîlkhoh tute mi 27 mimal mal a amin aphâkpuok te khuh mi vântâng ngen ahiu hi. Paul lungkie a, a chauh hun leh athawmhauh hun a amah suhat te khah Apostle leh mi thupi, James, John, Peter te ahi puou hi. Titus, Philemon, Onesiphorus, Epapras, Dr Luke leh adang amin phâkpuok te vâng khah a min ki zakha le a um puoi. Himahleh zie tawbanga thagau mi ahihna ban a mi thupi Paul chuh zie a mi hêtkhâk loh mi thiengtho te hih ana umlo hileh anasep dawk haw hih ana sêm dawk zolo ding a hi.

Kum 500 vâl achieh nunga John Wycliff in Bible a lehdawk zieka Rome sapchuom in London khawpi Lambath Hall a vaihawm khum ding leh thu tankhum dinga gate a alut lai in, aning chakhat a ana chû school naupang khat in “Bishop pa chuh lâu hiel ki’n aw” ti’n ana tîlkhoh hi. Zie a naupang kawma ana um lobawl mi numei hanei lo khat mah chun naupang thugen chuh kipah pih in alu anasu zauh hi. Pathien in England gam pumpi a, a suok gâlhâng pa chuh ngei hângte ( foxes) mai a adinlai in a suhât ding leh atîlkhoh ding in naupang khat leh lo bawlmi numei khat amang hi.

I Lalpa Isu le lungkie a, achauh mah mah phat leh naupang te a pat thahatna vala zel hileh aki lawm hi. Nausên nawi chêp lai te’n pahchâk na abukimsak hi ti’n agen hi. A ziek chuh khawvel in nuol mahleh naupang ten nuol ngei lo a hi.
Chuleh cross a athihni tienga va zui te khah numei vântâng te ahiu hi.

Tîlkhohna’n thil abawl theih dan tih hih ka lehkhabu “Tui kha apat Tui thum” tih ka zîkna ah kimtak in kana zîk tai.Tuchung Tuilaphai a ka VBS leh renewal week programme ah College student khangthak fel mah mah khat ka tawnpih hi. Zîngkal cheng in khuo pam lamah pauchamna ka nei khawm zel ui. Zie a tangval khangthak pa’n a insung khawsak dan uleh achanchin uh ei share haw chun ka mittui tawh ei vuk den zieng sek hi. Tuchung kaki tawnpih pa hin ka thagau hinkhuo ei ki duoh dawk sak chuom mah mah hi. A testimony chun ka lung akhawih mah mah hi. Pathien in ei suhat ding leh ei tîlkhoh dingin eisâng a piting leh sâng zawte sâng in mi vântâng i nuoi lam daih a um te amang zaw sek hi.

Zie devotional (Pathien thu) tuni tienga ei zîk zawm sak, ka chauh ni, ka thâtdah ni a le ei suhât tute hih thagau lama ka ngaihsa’n leh ka ettawn te ahi puou hi. Mi atam zaw te chuh message ka thâk sek vâng in asim uh ahim asimloh uh ahim le kihe zo talo amau a pata reply bangmah kamuh loh ziek in. Ahi’n mi vântâng ( Pastor hilou, Bible lama Doctorate hi teuh lo) thagau dangchâk te apat nicheng in tîlkhohna ka dawng zing hi.

Jonathan mi vântâng in mi thupi David bântha ava suk hât saka, Barnabas mi vântâng in Paul mi thupi khat ava pui dawk hi. Aron leh Hur in a lawi upapa’u Mose khut adawpsak ui.

Tunin i chunga mi i ngaihsa’n leh thagau mi, mithupi te sâng in i ginchâk loh, mi vântâng i nuoi lam peka um i tih te’n i hinkhuo ahin tilkhohna nasa takin ei pie tam zaw’u hi. Biek-in sermon i bawl fuh leh fuh loh chuh i chunga te aki dawng puo a, mi vantâng mi um mai mai te ngaihdan akila zaw sek hi. Ei hung tîlkhoh leh tia i na kineppih gûk mah mah te’n ei hih amau haw zawk tîlkhoh dinga eina kileh neppih zaw chawk sek dan a hi.

Tuni’n nang thîk sêk mai mai pa, na chunga Sana sêk pa’n na ginchâk sang in ahun pawimawh mah mah hi tih kihêt in.

Lalpa’n i nuoi a te chauh hilo in, i chunga te suhât ding leh tha piethei gingtu hiding in ei siem chiet tau hen.

Translated by; Huihchîm

How useful was this post?

Click on a star to rate it!

Average rating 0 / 5. Vote count: 0

No votes so far! Be the first to rate this post.

Admin: Get in lamka

Get In Lamka - Digital Marketing & Information Services, Shopping site Lamka, Churachandpur, Manipur, Shop online at getinlamka.com, Read Daily news of CCpur.

Leave a Reply