THIMTHU LE ZAILA GROUP  KHAMTANG LANU By- William Lhonga Madrid (8731874334)  (PART-5)

THIMTHU LE ZAILA GROUP KHAMTANG LANU By- William Lhonga Madrid (8731874334) (PART-5)

0
(0)

THIMTHU LE ZAILA GROUP

KHAMTANG LANU
By- William Lhonga Madrid
(8731874334)

(PART-5)

Hijehchun kenjong seibe ding kahe tapon, Kimneo vin lungset nathu a, eihin donbut dingchu kamoh ngah jengtan ahi.

Phat chomkhat jouvin Kimneo vin kajah a
Kimneo- Uthangcha na kamchenga na phondoh masanga jong, na umchan le namaiso akonna, neilungsetna kana hethemsa ahitai. Ahin gollin neilungsetna genthei ken kasang ngampoi.
Kei- Boi, ibolla hitia chu neidonbut jengham? ole kalungset nahi nang dinga lhing jou ham?
Kimneo- Uthangcha neilungsetna keiya dinga alhingset e. Ahin chihna le thepna neilouvin nalungu katoh jouding vang katahsan poi. Nangin neilungset inlang, neingailu lheh jongle chun, na chun lejo in kei tobang mimol eidei lhon ponte. Uthangcha neilungset tah2 le lungset in, hiche thuchu seikit tahih in.
Kei- Nao, kalungset jeh a kalungsetna thu seilouva iti ka umthei dingham? kisonglel pumma nakomma katao nahi, gollin iding hethem louva, lungset nathu seikit loudinga neitep jengham? eini iki lungset a, ikingailut poule chun lejo in, ima seideh ponte. Boi, gelthemmin lungset nahi lungsungin adol joulou phat a, kamchenga hungpot doh jo ahi. Kalungset na sangpen kahin peh hi, gollin gelthem minlang, lungset banjallin neihin sang jengtan. Ken kangai banga nangin jong kei neingaile koiman eisukhen jou hon ponte. Ven, mihem sanga thahat jo Saipi,Selchal,Keipi chule gancha hat tah2 hojong mihem min tho akaijouve. Mihem thovang koiman akai joupoi. Ibolla kisonglel la, lungthoi nahi ham? kalhen pahcha chu kadam kumkho ading ahi. Lungset in gelthem minlang, nami lungset nachu neihin chan jengtan. Chuteng kalung lengvai najouse hi nami lungset nachun eimil sah tante.
Kimneo- Uthangcha keidin vang kisonlel aumme. Ahin, hichan kasei jou nunga jong gollin kalungset in, kangaije neiti le, ipi ba kasei tei2 dingham? gollin neichan lungset nachu hinkho adin, lungset banjallin kahin sang’e. Uthangcha, tua neilungset bangin neilungset jingin lang, ka mitlhi vang lonsah hih ta o?
Kei- Kalungset pennu chu ibolla amitlhi kalon sahding ham? Amaiya hung longlha amitlhi theh peh dingle, akipah sah jingding joh kahi . Boi, kalungsetna sangpen gollin neihet them peh a,nalungkot neihon peh jeh in, nachunga kakipah e. Boi iki lungsetna guikhao hi atan lou nadingin, jao thulam leng ho tahsan poi hite o? injole kangah jing lungtup molso nading nikho hi, lhilon nale puldou na in hung pang khante.
Kimneo- Heu, keijong kakipah e. Tuhdet jing dinga ilel thimthu hi lungin gel jingin ting, tuhdet jing nange. Nangin jong na umna mun jouse a, hingel doh jingin lang, khending lungvang hin gel hih beh in.
Kei- Henge boi khending him2 gel ponge. Khending ngah a lungset kahin chan nahi poi. Lungtup molso pi dinga deilhen joh nahi. Na kamchenga naseidoh monpi um lungset nathu hi, kalungsunga ging jingin tin, mon mangthei lou sambangin laigilla vei jing nante. Boi ikitepna thimthu hohi, ahetoh dingin nile lha, ahshi hung pang tante. Nakomma kaki tepna thimthu cheng, gollin kapel keh le katoijin bong jeng nange katile Kimneo vin akhut a kakam asimmin, kajah a
Kimneo – Uthangcha hiche hochu sei ngailou ahi. Nachunga hitobang thiphalou ahunglhun ding kaphal poi. Hitichun seihih jongle chun neilungsetna, kahethem na e.

Kei- Ibolla neikham ham? ole kalungset e neiti vanga chu lungset lhemma neilungset joh ham? ken kapeh lungset navang hinkho ading mong ahi.
Kimneo- Uthangcha kalungset lou jeh a kakham nahi poi. Kalungset val jeh a kakham joh nahi. Hitobang hichu seingai lou ahi, kati ahi bouve. Chuin Kimneo katot in, ajah a
Kei- Nao, nang komma kaum le nop kasa in, kahin monpi lheh e. Nanga konna gam vangla ding vang lungin agel thei tapoi. Kakho langu va kaki nungle phatle neihin jui jenga pha hilou ham? ole changa hinkho mang dinga nei phallem?
Kimneo- Uthangcha changa hinkho mang dinga,gollin kalungsetpen nang kahin phalpoi. Keijong changin mongjou pong’e. Hijongle Pathen danthengin kicheng hite.
Kei- Nao, changa hinkho mang dinga neiphal loule, neihin jui jeng tango. Nang beiya kei i kati dingham? nangai nan nile lha lhumjou pong’e.
Kimneo- Uthangcha, kanu le kapa in, danthenga jinei in eiti lhonne. Kanu le kapa phatsah bangin kicheng jo hite. Tahsa in umkhom hih jongle hen, lungthimma ium khomjing ding ahi. Keiya konnin, hoichan gammin che jongle chun, kalungset nan naum pi jing’e ti geldoh in eitin, kalungset val jehchun athusei kanel nompon,hijehchun hitihin kaseitan ahi.
Kei- Nao, eini sanga aphajo he chun lejo phatsah banga ium tah hih dingham? khending lung gelleo vang kinom pontin, nati lou ham?
Kimneo- Uthangcha hoiya chechu keijong kinom sam diham? Chun lejo,singsung miten jong khending lung geldeh pou vinte.
Kei- Nao, janjong sotthim ta hila. Inlanga iche a pha hita louham? injole napa ana lunghang khale, boilou dingham?
Kimneo- Uthangcha Pathenni nilhahle, Pathen vahchoila lasa ding kahi chuo. Guitar neihin saipeh o. Lakhat kijil ta di ing’e.
Kei- Ipi tela sahding nati ham? nang mama japi anga kithang atpi na um ji e katile anui pummin, kajah a
Kimnneo- Hechin Haokip in asah, Tulai ichristian chondan uhi. Hiche tela khu sahding kati ahi e. Khaiye Guitar hin saijin. Chuin Guitar kasaijin, kalungset Kimneo vin Pathen vahchoila asa in ahi. Lacheng jong jihtha inge.

1. Tulai ichristian chondan uhi, lunggil tah a nangai tokhah em? Jesu nungjui dih ihi hinam? Ivah u miho anga kilang nam?

Kiseiset kimitthip kidemto pailhau hitin, kingailut nan eikan khommu hen, kingailua khat le khat pohgih kingai jangto in, hichu Christian chondan ahi.

2. Tulai ihoubung sung chondan hi, Bible choi Houin kai itamnan, Christa kisan lou ihi khahle, achaina chu thina hi thou thouding.

3. Hinkho chomcha inei sungu hi, ipakaiya din mangchau hite, Christa kisan lou ihi khahle, phat kijenpet chahin kisan loijin.

Kimneo vin hiche Zaila mao jella ahinsah dohchun ngainom aum lheh jengin ahi. Ajehchu amajong athemmin, lajong angeijin athucheng jong ahoijin ahile itih kah a asahchai ham? kahe manpon ahi. Zaila a oi jouvin, Kimneo jah a kaseijin
Kei- Nao, nalasah chu ngainom aum mong2 nge. Hiche la chutoh na o akitoh mong2 nge.
Kimneo- Kipah umme uthangcha nangbeh in neihin pachat jiji le, kei dinga jong kitilkhou aumji e.
Kei- Keijong kakipah e. Nao, nalasah thucheng chu giltah a kangaito le tulai iChristian chondan utoh akitoh mong mong’e. Aminna Houin kai, Bible choi itam vangun, Jesu nungjui dihtah sangin mihem maipha vetna mai maiya Pathen hou itam taove. Nati louham?
Kimneo- Uthangcha maipha vet tichu ipiti naham?
Kei- Nao, maipha vet tichu kahin hilchen ding chuo? tulai ichristian chondan uhi, chentah a ivet le sum lepai houloi, lamkai ho houloi atam lheh ta e. Hiche tobang bolho chu Jesu nungjui dihtah ahipoi. Jesu nungjui dihtah chun, mihem min ipi ageldem? ti gellouva, Pathen nin ipi ageldem tia, chonchan bolla thusei pabou chu Jesu nungjui dihtah ahi. Mihem maipha vet kitichu Pathen maive louva, mihem ho mai ve a, chonchan bolla, thusei pa chu ahi. Nahet them tam?
Kimneo- Henge Uthangcha kahethem tai e. Uthangcha einin vang Jesu nung dihtah in jui hitin, thengsellin hinkho mang hite o? adeh a nang, nikho khatle insung bulpi, mipa nahung hiding ahin, Pathenna nahat angaiye. Uthangcha Bible hasim jio. Naji nacha lamdih a nakhou khah a, napuijang thei nadingin eitin ahile Kimneo vin Pathen thu akhohsah naho chu kamu chennin ahile kaki papi lheh jengin ahi. Ajehchu tulaiya nungah atam johi Pathen thu a kimangcha nom louva, leiset loupi naho a ngolgam ahitai. Setnan leiset chung alojou nunga, Pathen na kingai jing nungah pha kaki muhi keidinga Sana sanga jong manlu jo ahi. Chuin kenjong Kimneo jah a kaseijin
Kei- Henge nao kajo channin Bible simjingin ting, Pathen thua kimangcha jing nang’e. Nangjong nikho khatle insunga minu dinmun nahin tuhding ahin, hijehchun Pathenna kingai jingin. Navah in nalhunna insung asalvah a, nachon channin thu asei jing nadin.
Kimneo- Henge uthangcha, jochannin panla jing nang’e. Insung bulpi kahi tivang kihet jingo na? nang alen pen nahi? tin mailhai sellin eihoupi in, chuin ken kadonbut kit in
Kei- Nao, alenpen aneopen aum chompoi. Imopoh nading lamchom2 ahi. Alenjo aneojo aumpoi. Kibang chet ahi.
Kimneo- Nasei dih e uthangcha. Uthangcha mihem hinan lhasam nijong akinei dapon, hijeh in khat le khat kitil khouto jing hite na?
Kei- Henge nao khat le khat ikitil khouto jingding ahi. Leiset hi chamkim louna mun ahi jeh in, ipi lam jongle, mihem achamkim koima aumpoi. Nao, inna inung che a pha hita louham?
Kimneo- Uthangcha keivang nang komma ka umle nop kasa e. Nangin nop nasah louham?
Kei- Kalungset pennu komma lungmonga kaum hi, kei dinga anompen ahitai. Hitin tou khovah jongle hen kalungna chimdeh ponte. Hijongle jankho sot tahi la nao.
Kimneo- Uthangcha achutile phat chomkhat la sakhom hitin, chuteng chena hite eitin, chuin guitar kasaijin kalungset Kimneo toh sangthing chunga Zou vakhu te nupa bangin, zaila ka oikhom lhonnin, lung kitoh tah in kajan mao2 lhontan ahi.

Zaila tampi ka oilhah jou lhonnin, Kimneo vin kajah a
Kimneo- Uthangcha Pathenni nilhahle, Pathen vahchoila sakhom hite eitin ahile kajahcha in, hijehchun kada in
Kei- Nao nangin nachangin sa o. Keivang ka o angeilou toh ahile kajah jong acha in, katha ase e katile einoh in, kajah a
Kimneo- Henge kachangin sa tange. Houin na lasah khompi dinga jong neijachat le, hinkho a chenkhom pi dinga vangchu tin aban seibe louvin thipchet in, akihei mangtan ahi. Einoh jeh a hitia asei ahichu kahethem paiyin, chuin ajah a
Kei- Nao, nangvang chapang hotoh naki louji e. Hiti ho pou pouva, neinoh paiji, naki lomji hih e. Khatvei keilam hinve temmo katile ada in, amai asel chahkheh in ahi. Chuin ada sasan keilang kangat sah in, ajah a
Kei- Michula nungah nahi tan, nagah kisen sahji in katile ahung nuiyin, kajah a
Kimneo- Kalungset penpa komma chapang sen bangin um jongleng ipi boidi ham? Uthangcha keitoh lasah khomding la najahcha in, nakho langu nanung lhun phat le ikhatnu chutoh ana sakhom maijo na?
Kei- Koi ong ikhatnu? Kei neitep sanga chuba ikhatpa chu natep ding hichula katile einoh kit in, kajah a
Kimneo- Kachangin sa tange. Koima kangaicha poi eitin ahile kaki phalammin, chuin ajah a
Kei- Nao, Pathenni nilhah le ipi tela, isahkhom ding hitam?
Kimneo- Ken kachangin sa nange. Chubanga jahcha chun japi anga, ipi la nasah gotham?
Kei- Nangsah got penchu kasah got hichuo. Ipi la hitai isah got chu? katile ahung nuiyin, kajah a
Kimneo- Seiding jong nahe nalom lomme, nang mama. Achate taona ngailha jing Pakai, hiche tela khu sakhom lehen kati chuo. Najah khah em?
Kei- Henge kaja kha nama e. Atrack jong kanei chuo nao.
Kimneo- Track nanei le track in sakhom hite. Uthangcha soundtrack chu keijong neithot peh o. Kaphone nahin.
Kei- Ole na phone nehin pe o. Nahin thot peh inge katile aphone eipe in, chuin kathot pehtan ahi. Kimneovin kajah a
Kimneo- Uthangcha, track achun hung kijil jio. Keijong kahung kijil jidi ahi. Uthangcha inna inung chedi hitam?
Kei- Henge hung kijil ji nange. Nao kaseihai khat aumme. Lungset hinkho jong kimang khom tah a naphone number jong kinei nailou, na number hinseijo katile aphone number eihin seipeh in,chujouvin kajah a
Kimneo- Uthangcha ka number chu hin callo. Kenjong nang phone number kisave inge eitin , kenjong call kabollin, ajah a
Kei- Iti kamin na save dita?
Kimneo- Nangin hinsei masa o eitin, chuin ajah a
Kei- Khamtang Lanu tia save kabol ta e. Tun nangin iti nasave ham? hinseijo.
Kimneo- Ramboo tia save kabolle eitin, chuin kanui khom lhonnin, inlang kahin jon lhontan ahi.

Kimneo a innuva kaga thah pa jouvin, kapute inlam kajon pai2 tan ahi. Jansot nung ahitah jehchun, kapute jong nommin jan samang ajal joutao un, hijehchun kenjong kajalna khunchung kajonnin, kaki jampai tan ahi. Kajalna munna konna kalungset Kimneo toh khao banga kasut khomlhon, thimthu chengchu lunga kagellin ahile kipahnan kadimmin, abang komle kachang changin kahung nuidoh jin ahi. Chutia lunggel la Kimneo jengbou kagel jing laiyin, kaphone ringtone ahung gingin, “jansot nunga koijong hija, phone eihung kibol ham?” tin, kaphone chu kaga ve in ahile koima dang ana hipon, leiset mihemma kahung penna kachunnu ana hi in ahi. Chuin ka pick loijin
Kei- Hello, henu ipi thu hitam? Jansot nunga neihin call jengin.
Chunnu- Boi, napa adammo e. Jingle nahung loule aboita e eitin ahile lunggel chu anohphah lhajengin ahi. Ajehchu kalungset pen Kimneo toh kihung kiki ngai bep nalaiya, kadalhah pai jeng dingchu kagelle hahsa kasan, ahin dammo chungchang ahikit jehchun, dathei ahikit pon ahile donbut vah theilou vin kamoh kigel den jengtan ahi.
Chunnu- Hello, hello Thangcha najah theilou ham? eihin tin ahile kahung kingdot in, chuin kachunnu jah a
Kei- Henu kaja e. Kapa chu ahoilai na aham?
Chunnu- Boi anatna atamme. In nahung lhun phatle hetan nate. Jingle hung tei2 ta o?
Kei- Henge henu hung nange.
Chunnu- Boi mangpha tan o? Phone koi tang’e?
Kei- Henge henu nangni jong mangpha.

Chuin kachang changin kaki gellin ahile kakho langu va chelou theijong ahikit pon, ahin kalungset Kimneo kalhah lel val jehchun, kei dinga kigel lhah ahahsa lheh jengin ahi. Kimneo komma “jingle kakho langu va kache ding ahitai” tibeh kamcheng khatbeh in, kiseithei le kanom lheh jengin, hin jansot nung ahitah jehchun, lunggel bang ahijou deh pon ahile lunggel chu agenthei lheh jengin ahi. Kamchenga houpi nom jongle, phat le nidan nin eitoh tahlou jehchun, kalungset Kimneova dingin SMS kajih in, hiti hin kathot tan ahi.

Aban jingle simkit tao hite. Kino tah a kijih ahi jeh in jihkhel tammin te. Lunglut tah a simdoh jouse chunga kipa thu kahin seijin, Pathen in phatthei naboh taohen.

How useful was this post?

Click on a star to rate it!

Average rating 0 / 5. Vote count: 0

No votes so far! Be the first to rate this post.

Admin: Get in lamka

Get In Lamka - Digital Marketing & Information Services, Shopping site Lamka, Churachandpur, Manipur, Shop online at getinlamka.com, Read Daily news of CCpur.

Leave a Reply