THIMTHU LE ZAILA GROUP  KHAMTANG LANU By- William Lhonga Madrid. ( 8731974334)  (PART-1)

THIMTHU LE ZAILA GROUP KHAMTANG LANU By- William Lhonga Madrid. ( 8731974334) (PART-1)

0
(0)

THIMTHU LE ZAILA GROUP

KHAMTANG LANU
By- William Lhonga Madrid.
( 8731974334)

(PART-1)

Kachunnu le kajopan laigilga chapa changkhat seh a einei hon ahijeh chun, eingailu lheh jeng lhonnin ahi. Kapot doh komma, injot phat a in kajot theilou teng jongle, lunggim tah in eina hol lele jeng ji lhonnin ahi. Kanu le kapan ei ngailut val jehchun, gollhang kahi jengtah vangin,kanu le kapa angsunga chun, chapang bangin hinkho kana mang nalaijin ahi. Hijehchun nungah gollhang kingaina hojong hi,lunglut nale thanop najong kanei theipon,kanu le kapa toh chun loile gol bangin,kana kidai2 ji un ahi. Kaloi kapai kalen gol chengin vang,dongma anei jou tao un, loikhat chun firstlove secondlove tinjong ana sei ji taove. Ahin keivang chapang selungmol bangin, lungset nahi ipi ham? tijong kana hepha pon ahi.

Mitam pin Karbi-Anglong gamhi gamphat namun,ningju aisa lonna gam tin iheo vin, abang chun thing(ginger) phat nagam, thinglei kibolna mun tinjong iheuvin ahi. Hijehchun pu Jeff Akai Haokip in alasah na khat a Manipur Nagaland Assam gamma,kalhung taove Pakai jallin, thinglhang gamhoi gamnom, Pathen phatthei bohna gam, chullou Karbi Anglong tin ana sadoh leovin ahi. Mitin nin gamhoi gamnom tia aseijingu chu kana ja jingin, ahin kamit tah in khatvei chajong kana mukha pon ahi. Hijehchun Karbi Anglong gam chu katahsa tah in khatvei ga kivah lut henlang, kamit tah in agam loupi dan chu kimu le kati jehchun, kache nomlheh jengin ahi. Karbi Anglong gamma kapu te jong achen jeh uchun, kapu te komma gache toh gommin, khatvei beh kiche le tichu phattin na kalunga aum jingtan, hijehchun nilhah khathi kanu le kapa koomma, hiti hin kasei tan ahi.

Kei- Henu,hepa Karbi Anglong gamma cheding katha anomme. Neisol lhonnin tin, kaseitan ahi. Chuin kanu in kajah a
Kanu- Boi Karbi Anglong gamma ipi gabol ding nati ham? min aseileo thingnoimi/gamvah atamme atiuve. Naki chat lou ham? eitin, chuin kenjong
Kei- Henu Karbi Anglong gam nopdan mi seina a kija jinga, khatvei chajong kimu khalou, kamit tah in kimu le kanom me. Leiphat nagam,sum lepai tam namun ahi jeh a, thingnoimi/gamvah jong tam ahin, en thilse ibollou poule,ipi boiding ham? tin, kasei tan ahi. Chuin kanu in anuipum min, kajah a
Kanu- Boi ole nungah khattou gavet ding nati ham? eitin, keijong kagah tot kit in, kanu jah a
Kei- Henu Maneithangza Kipgen in kalung umna a kagou umding ahiti kinem min,kajontai Jorhat khopi atikhu la, kagou khattou jong hi umham? Karbi Anglong gamma cheding bou katha anomme tin, kaseitan ahi. Chuin kanu in kajah a
Kanu- Boi nangjong chapang nahi tapon, hoilai munna che inlang, umjong lechun, chingthei tah in hinkho mangin. Minset kiti hi nikhat kah ajong boldoh thei ahin, minphat boldoh nadinga vang nikho tampi suhlut ngai ahi. Ipi hile napa komma seijin lang, napa in pha asah le, nache ding ahi jenge eitin, chuin kenjong kapa komma chun
Kei- Hepa Karbi Anglong gamma kache nomme. Lungset in nei sollo tin, kasei tan ahi. Chuin kapa in kajah a
Kapa- Boi nilhah le kihou nao hite. Na bahara kham sum le pai, umma ha? umlou aham? jong kahe poi. Nanu toh hung kihou vingting, nilhah le kihou khom naote eitin, chuin kenjong
Kei- ole hepa. Kache nathei tei2 dingin,hung kihou lhonno kati jouvin, football kichem dingin,kapot doh in Ground lang kajon tan ahi.

Loi legol hotoh nomtah in football kaki chemmun,hiche nilhah chun kenjong goal ni kakhum min ahi. Kaki chep khommu chu nom kasah val jeh un,muikho jin lamjong kana hepha pouvin,hitichun khojin geijin kana kichem un ahi. Ichot nading jengjong akimu theilou phat in,keiho jong kahai tao un ahi. Chuin kenjong inlang kahin jonnin ahile kanu le kapan Maicham semkhom pi dingin, eina ngahlel lhon chu kamun,hijehchun keijong kaki sutheng loijin, an kanen kaneh jouvin, insung Maicham kasem khom tao un ahi. Kapa ahoulim min, kei eitil khouvin ahi.

Kapa- Thangcha nangjong gollhang nahi tan,hijehchun chingthei tah in hinkho mangin. Khangdong hinkho hi phatchom khat adingbou ahi vangin, lhepna ahat dehset in, ichungthu seinom mihem jong atammin,minset na imakah ahipoi. Adeh a pasal dinga kipal nathei thil chithum aumme. Akhatna a khamna thei hi ahin, ani na a sumle pai hi ahi. Athumna achu ipi ham? itile numei hohi ahi. Hiche hothum palgal kai joulou,leiset a pasal asang aja, simsen lou aumme. Ahin hiche hothum hin palgalkai jou pasal vangchu,kisonpi umtah pasal pha ho ahiuve. Ven, boi thil tampi minset nathei jong um nante. Hijongle tunin hiche hothum hi hinsei ingting, nahin hilchen ing’e. Khangdon lai nikho hi thahat lai,thisan phullai ahi jeh in, nehdinga phalou thilho nehnom na lungthim jong akinei jin, chule idei ingai tamlai phat ahijeh in sum lepai akingai cha mama jengjin ahi. Chule thisan hatlai ahijeh in,numei vetnom nale hoisah naphat jong ahikit e. Hiti ahijeh chun, pasal tampi hi jule sa,lou le aii khamna thei jatchom chom ho masanga ajamthei pon,khamthei ho angolpi jiuvin ahile adamna ding phatchan damjou louvin,thinna lhanmol ana lepji taove. Khamna thei thilho hinpal galkai pajong,leiset loupi nale minthan nahon alhim ngol jeh in, sum lepaija kitah louna hinkho ahin mangkit jiuvin ahi. Sum le paija kitah louna hinkho ahin manphat leo, aseise diu mihem atammin ahile vangphat nan ahinkho ajui dehji pouvin ahi. Sum lepai ijat neijin lang, haolheh jongle chun nasum holna a Pathen ajao loule nang dinga achaina chu manthahna hithou2 ding ahi. Aban ngaikit in,numei thu seikit hite. Achunga kasei khamna thei hole sumle paija kipal lhulou pajong, numeija akipal lhunom kit e. Bible la Samson mihat pa kipal najong numei jeh ahi chule David lengpa le achapa Solomon lengpa kipal najong numei jeh ma ahikit e. Amaho thum tilou vajong pasal tamtah kipal nahi numei jeh ahi. Pasal dingin lhepna tampi um nante,hijongle hiche chithum hohi Satan nin aha manchah dehset in ahi. Hijehchun hiche ho a nakipal louna dingin, kanei Pathen hi neijin lang, Pathen toh lhonkhom jing lechun, najet naveija lhepna twipi bangin hung kinung jongle, Zion molsang banga kiling louva,dettah a nadin jing theiding ahi. Hoilai munna che inlang umjong lechun Pathen tahsan ninlang, ama a kingai jing lechun, leiset lhepnan najo lou helding ahi.

Bible la Joseph hinkho chu ven, a uten Joseph chu silpon le gancha bangin, Gilead apat Egypt lamjon kholjin miho komma chun, dangka somi a ana johdoh un ahi. Midian miten ma Egypt gama Joseph chu lengpa vaibol ho lah a inpi ngah apang, sepai lamkai Potiphar henga anajoh tauve. Hetlou nagamma aum jeng vangin, a Pathen dihtah atahsannin, alhaso deh pon ahi. Hijehchun a Pakaiyin jong aumpi jingin, alolhin sah jing’e. Pathen nin Joseph aumpi jing jeh in, akichoh pa Potiphar jong Joseph chunga alhung lhaijin, ama jenle dingin apansah tan ahi. Potipharin Joseph atahsan jeh in, anei agou jouse Joseph khut a akoiyin,nehding tilou aman aboipi tapon ahi. Phat ahung cheche in ahile Potiphar jinun Joseph chu ahin deichan, lup khompi ding ahung nomtan ahi. Hijehchun lupkhom pi dinga Joseph chu ajollin,ahin Joseph in apinu jah a “kapu pan kei eitahsan jeh a,insunga thil imacha gelkhoh louva,kei einganse ahi. Hijehchun ken hitobang thilse chu bolthei pong’e” tin ana donbut e. Ahin apinun Joseph chu hoi asah val jeh in, phattin nitinnin Joseph chu lupkhom pi dingin ajol jol jengin ahi. Nikho khathi Joseph jong insunga aga valut le atohkhom pi sohdang ho koima ana umpon,apinu bouseh ana ummin ahi. Hiche phat chun apinun Joseph chu asang khollin amannin, Joseph jah a “neilup pin ong?” tin aseitai. Ahin Joseph in Pathen mai avet jeh in, hitobang thilse chu abol nompon, asangkhol asut loijin,inpo lamma ajamtan ahi. Chuin Potiphar inneipin Joseph sangkhol chu a inneipu hung kahse a koidin,akoitan ahi. Potiphar hung vailhun nin, ajinun Potiphar jah a “nasoh pan hito bangbep a eibol hi namu louham?” tin ahehse tan ahile apupa Potiphar jong alunghang behseh in, Joseph chu songkulla akoitan ahi. Ahin Joseph in Pathen atahsan jeh in, athemna thu kamcheng khatcha jong ana seipon, genthei tah in songkulla chun hinkho amantan ahi. Ahivangin Pakaiyin Joseph aumpin, phatthei aboh-in, hijeh chun songkul kotngah pan alungset paitai. Songkul kot ngah pan sohchang dang jouse Joseph khut’a akoiyin, ipi kibol jongle abol jouse Joseph boldoh-in bou akithangtai. Pakaiyin Joseph akilhonpia, abol jouse alolhinsah jeh-in, Joseph thilbol jouse chu songkul kot ngah pan avekhoh tapon ahi. Hitichun phat ahung cheche in ahile lengpan, mang kidang tahkhat ahin neijin, amangchu gimnei asah jeh in, aledoh pehding mi ahollin, ahin lengpa mang ledoh thei agamsunga chun koima aumpon ahi. Lengpan, Joseph in mang aledoh theije tithu ajah phat in, asolte asollin Joseph chu songkulla konnin lengpa mangle din aga puidoh tao un ahi. Chuin lengpan Joseph jahchun “nanghin mang aledoh theije tithu kajah jeh a, kasoh te nang puija kahin sol ahi” tin amanga amuho chu aseipeh tai. Joseph injong Pathen song pummin lengpa chu adonbut in “keima hilouvin,ka sunga um kapathen nin nalungmon natheijin nahin donbut nante” atin, lengpa mangchu aledoh pehtan ahi. Chuin lengpa jong akipah behseh in, Joseph jah a “Pathennin hichengse namu sah jeh in,midang jouse sanga chingjo le hetna neijo” nahi atin, akhutna Amohor khutjem chu asutlhan, Joseph abu peh in, tuhpat ponnem chol asilpeh in, sanakol a ohpeh tai. Lengpan Jospeh jah in aseijin “Leng kahi vangin, nangthu louva Egypt gamsung pumpin, khut lha le kalson abollou hel diu ahi” tin aseitai. Lengpan Joseph min chu Zaphenath Paneah asah-in, Heliopolis khopia Thempupa Potiphera chanu, toh akichen sahtai. Kum lelha phat leni ahung challin, Joseph in Lengpa mang alepeh bang bangin,thil jouse ahung guilhungin, vannoija kel alhatan, nehding donding helou vin vannoi pumpi apeng2 taove. Ahin Egypt miten Joseph thusei banga thil jouse ana bol jeh un, neh lechah ninglhing sellin aummu vin ahile kellhah sungin jong lungmong sellin,hinkho amang jing un ahi. Chuphat in Isreal gamma Joseph inkote jong nehding hollin, Egypt gamma ahungin, Joseph anga nehding thummin ahung tao taove. Joseph injong nehding apen,ajojo nan amajong aute komma akisei doh in, ahinkho thusim hochu aseipeh tan ahi. Chuin a inkote jong Joseph komma ahungin, Joseph jallin, lungmong le lhamongin hinkho amang taove. Joseph in apathen atahsanna, alhaso lou jeh a, genthei nale lhep na jouse apal galkaiya, lengvai apoh ahi. Na umna mun jouse a,Joseph hinkho hi geldoh jingin lang, thilpha louvang hinbol hih beh in. Kathu seihi nalunga nachin jinga, najui jing poule nikho khatle nangjong, Pathennin Joseph banga hi nahin dopsang ding ahi. Phat kahomtho jeh in, kasei sao jeptan,hichan chun chai tange. Nanun aseinom aumle,sei tante ati jouvin,atoutan ahi.

Chuin kachunnu in kajah a
Chunnu- Boi ken thu tam sei ta pong’e. Napa thusei hochu nalunga ching jingin lang,thilse ho akonnin kikang se jingin. Bible lin “Chapa chingin apa akipana ason, chapa ngollin vang anu lung hesohna asopeh e” ati bangin, nangjong nachih theija misei phat nahung hile napa toh keini dinga jong kithang atpi um chapa nahi ding ahin,ahin nachih thei louva thilpha louho nahin bolkhah le napa toh keini japi anga neisuh molphou honding,chuteng nachunga kalung hon nading ahi. Boi chapa changkhat seh a kinei nahi jeh in,nache nom nakhat a sollou ding jong akinom pon,hijehchun gache inlang, ahin na umna mun jouse a chingthei tah in hinkho hin mangin. Chuteng napu te kipah nadingin, atoh toh u tohhun lang, asei jouseo hin ngaijin eitin, atoutan ahi.
Chuin keihon jong taona kanei uvin, jingkho vahle kholgamma potdoh ding kahi jehchun, nommin samang kajaltan ahi.

Jingkho vah in,kangai chat dingho kaki poh in, kalunga kagal dotjing Karbi Anglong gamnom kajon tan ahi.

Aban jingle Simkit taote.

Lunglut tah a simjouse chunga kipathu kahin seije.

How useful was this post?

Click on a star to rate it!

Average rating 0 / 5. Vote count: 0

No votes so far! Be the first to rate this post.

Admin: Get in lamka

Get In Lamka - Digital Marketing & Information Services, Shopping site Lamka, Churachandpur, Manipur, Shop online at getinlamka.com, Read Daily news of CCpur.

Leave a Reply