THIMTHU LE ZAILA GROUP  KHAMTANG LANU By- William Lhonga Madrid. ( 8731974334)  (PART-3)

THIMTHU LE ZAILA GROUP KHAMTANG LANU By- William Lhonga Madrid. ( 8731974334) (PART-3)

0
(0)

THIMTHU LE ZAILA GROUP

KHAMTANG LANU
By- William Lhonga Madrid.
( 8731974334)

(PART-3)

Kolbu kaneh chai un janjong asottan, hijehchun keijong kahung kile kittan ahi.

In kalhun na, nomma samang jalding tia kakhunlai chunga kaki jamle Kimneo vin kamdam onem ma eihoupi naho chu kalung sunga aging jingin chule Kimneo vin somai lhai sella eihin vet jiho chu kalung mitlhan, mangmo in alang jingin ahile jansot samang jong jalthei louvin, Kimneo bou kagel gel jengtan ahi. Kimneo kalungset val jehchun, kangaina thimthu ho,akomma khaobanga sutding kanom min, ahin kajopan pasal tampi kipal lhuhna numei jeh ahi eiti jehchun, chapang lunggel chun kamoh kichat kit in ahi. Kapa thusei jehchun,kalungset lheh vangchun kalungsetna thu akomma kasei doh nomkit pon ahi. Hitichun jankho vah in, Kimneo chu helding ham? ole hellou dingham? tin kaki gel2 jengin ahile hetman louvin jingkho ahung vahpai tan ahi.

Kalungset nathu akomma kasei doh nom lou vangchun, Kimneo toh kivop khom jingding chu kanom min, hijehchun vailou konkhom pidingin gaki temhen tin, Kimneo te inlang chu kajon tan ahi. Ahin Kimneo te inna mi ana tamjeh chun, kalunggel chu kasei doh ngam kitpon, kamoh tou2 tan ahi. Chuin Kimneo vin eihin houpi in, kajah a
Kimneo- Uthangcha tuni le ipi nabol ding hitam? eihin tin, kenjong kadonbut paijin
Kei- Kahet lou chula, ipi pen kabol dingham? Kimneo nangin la,ipi nabol ding ham tuni? tin, kadongtan ahi.
Kimneo- Thinglei lhouva kache diu he keiho.
Kei- Koite louva ong? ole nangho louva nakon diuham? tin, kadongtan ahi. Chuin Kimneo vin kajah a
Kimneo- Henge keiho thingleija kakon diu ahi. Uthangcha nangjong hung kon ngap tango. Jingle kei nangho louva hungkon kit nange. Ole janhi nana tohna chu nachim set em? tin eidongin ahile kalunggel to kitoh chet a eihin donbut jehchun, kakipah lheh jengin ahi.
Kei- Kadam poule natoh hi khoh kasa hih e. Kahung konthei chula nangho louva. Jingle kapu te louva konkit lehen na?
Kimneo- Henge uthangcha. Ka louvu hoilai ahi nahet lou ding ahin, neihin hopa tana? eitin,chuin kenjong kadonbut in
Kei- Henge kahin hopa ding ahi. Eina ngah2 jengo na?
Kimneo- Henge uthangcha ana ngah nange eitin, chuin keijong kapu te inlang kajon tan ahi.

In kalhunnin kapu in kajah a
Kapu- Thangcha tuni le kicholdo to gommin,nangin in ana ngah jengtan. Keiho thinglei lhouva che uving’e.
Kei- Hepu, Kimneo te thinglei lhouva,konding kati chuo.
Kapu- Sum lo a konding nati ham? ole nungah lo a konding nati ham? tin, eihin tot in
Kei- Sum lo le milou hilouvin, thalo ajoh konding kati ahi e. Jingle eiho louva Kimneo thasa a hungkon kit ding ahi. Thildang2 chu ol ollin kilo nante tin, kagah le tot kit in ahi.
Kapu- Na umsunga chun Kimneo te louva kon2 ninlang, nache phatle Kimneo chu na inlanga kilhoh lechun hijeng chula tin ahung totkit in. Chuin keijong kagah le tot kit in
Kei- Chejong chu anai lamme hepu. Achop le mat toding hehe tin, kanuijin ahile kapu in kakomma
Kapu- Thangcha tot thu hilouvin, Kimneo khu helding dan ngaito tango. Amella hoija,phala pha a,chekhu naki puilut le avangpha pa nahi jeng ding ahi. Ole kingaipi nungah dang nakho langu va nanei hitam? eitin,chuin kenjong
Kei- Hepu koi chanu deimo tojong kiki ngai di hammo? Amonga tua dongma bolpai jeng dingvang,kagel thei hih e tin,kaseitan ahi. Chuin kapupan kajah a
Kapu- Boi chutia lung nagel thei jongle apha e. Jinei kiti hi kino louding ahi. Hinkho a khatvei bou jinei ding akihi in,vettoh chet angaije. Chapang cha a jinei kiti hi bollou helding ahi. Tulai khangthah hohi chapang chacha a akichengu va,genthei naho ahin tophat leo,kikhen kit jitao. Jinei hi anom lheh jeng ding danna angaito jiu ahi. Jinei nopna hi kumkhat sungjong atoh joulou ahi. Najinun nao ahin vople nalhoh sapan ding, cha le nao nahin neiteng nagenthei nasang ding ahi. Tua nagel phah lou gentheina tampi najinei nungle nahin toh nalai ding ahi. Tulai khangthang tampi kichen la khohsa talou u,kikhen la imacha a gel talou vu, nangvang hoitah in kigellin lang, naji ding hoitah a nalhen ding, naji dinga nakipui numei chu ahinkho lhunga nalungset jingding ahi eitin, chuin kenjong kadonbut in
Kei- Hepu nasei dih behseh jenge. Hijeh ahi numei kiti hi kamoh kichat tho jeng ahi e tuta di avang tin, kasei tan ahi. Chuin kapu ahungtot in
Kapu- Boi phachu hitia lung nagel theile. Jinei kiti hi kigel tohchet a bolding bou hichu. Keijong hi ana kingolla,vetoh chet louva napinu kana kipui le tua hi kaki sih vanga phat jouse kipel ta, paiding lasa,nehding la song napinu hi😂 tin, ahung nuijin ahile kapinu ahung lunghangin
Kapi- Hihi nuijat sah a. Neihel laija chu hoilang koi World miss sangin nahoi jo e neina ti hilou,tuchun najou nanal na tupa nasei peh in.😂 Thangcha napupan chun o eina hellaija chu,kana da le nanop loule ipi pi kabol ding atiham? abangle kaki thading, abangle kahinkho a jinei louva ka umding,😁 ajat2 ana seija, eina lungset valla, ahinkho mandan chu kavet le kalungse a, kadei lou sasa kana kichen pi hibou chu.😂
Kapu- Thangcha napinu jouthep danchu atepu ding aum hih e. Aman eina deichat masat jeh a kagah helle, gah kihi thei sah a kadonda le kanung ajui lele a, kalungse intin kana kichen pikhah ahi.😁
Kapi- Cho tehse kithip doh in. Najou nanal chu na tupa seipeh2 hih in. Neina hel laija toumo ummo a,kache kava na jouse a,kanung najui lele hilou ham?😂
Kei- Tehnung vuinunga hiti hopou chu seija kinel2 angai tahih e hepi le hepu. Sei2 ja aphachom dingbon hilou,thuchom joh sei taote .
Kapu- Boi anop nopna igah kidai u ahi bouve.
Kapi- Napupa chu asam jouse akansoh tah vanga chu, alungthim nangho lungthim sanga khangthah jo nalai hichu. Thudang iseile jaji lou, nungah thu akisei le jathei keikit, hoilang tehse ham?😂
Kapu- Tujong hin sam vomlou kiki nuhen, kiki sem toh chet henlang, nungah ho komma gollhang kahi kiti hen,ki helle anomding nungah atamme😁
Kapi- Chuti chun bollin lang ga hel patep o,namu jou mongding ahile. Angol pennun jong gollhang ahi nati mong2 ponte.😂
Kapu- Hichan chun nga taote. Bu hin thuh loijin, Thangcha jong milouva konding ahin,injole lou neiten ana ngahlel unte.
Chuin kapi in buhneh na ahin semmin, an kane khom tao un ahi.

An kaneh jou uvin, buchun mechun kaki poh in, Kimneo te inlang kajon tan ahi. Chuin Kimneo vin kajah a
Kimneo- Uthangcha nahung gang na e. Hinchoijo na buchun le na mechun chu,ken napoh peh inge.
Kei- Akhoh hih e Kimneo ken hin po tange. Gihjong agih poi.
Kimneo- Agih vallin, napo joupoi kati hilouva, angaina hichume eitin,chuin kenjong ka buchun le ka mechun chu, Kimneo kape tan ahi. Chuin kagah kiphat sah in,hiti hin kasei tan ahi.
Kei- Kimneo keipoh ding hoi ong? Pohding aumle hinla doh o,ken hin po nange.
Kimneo- Thil jouse ka in koten apo jou taove uthangcha. Hitichun hung jengtan eitin, chuin keini jong loulang jonnin,kache lhontan ahi.

Lou kalhun honle, a inkoten chajong ana ommin tao un,chuin chadon to gommin kaki houlim2 tao un ahi. Kimneo pa in eihin houpi in, kajah a
Kimneo pa- Thangcha nangho insung mi ijat nahiu ham? eitin, chuin kenjong kadonbut in
Kei- Kanu le kapan chapa changkhat seh a einei lhon ahi e hepa.
Kimneo pa- Oh chutile nanu le napa chun, ahtui dep a nadep lhonding hichula. Hilanga na natoh2 jenghi helhon le, nopmo asah lhonding ahi e nanu le napa chun.
Kei- Amasa chu na katoh gotle eina jahda ji lhon nahchu hepa. Tulang langa hi amani jong masang banga hat lhon tahih a, atam jo a toh le tham ho ken kabolji hita chu.
Kimneo pa- Phachu boi, toh louva nehna la umlouva hoilaija jong, idam poule natoh thaset bollou ding hichu, Bible la thuchih sunpan “Loubol ponthon neh ding ahaovin, mi thase moh um mi vang vaicha jing ding ahi.” atikhu, Pathen nin damna eipeh poule gunchu tah a na tohjing ding ahi. Eiho louvai mi dinga kihinso nading dang la umlouva eitin, chuin kenjong kadonbut in
Kei- Henge hepa nasei dih behseh jenge katin, chuin ma kapang tao un ahi.

Sun nilhum min natoh le kihoulim kakop uvin,hitichun nomtah in thinglei kalhou khom un ahi. Kimneo jalla nop kasah toh ahile a inkote jong aphat thei jeh uchun,nilhum langjong kana heman pon ahi. Kimneo telou ahijehchun kaki gunchu sah in, “tou tao hite” eiti jongle “nisa jong anommin tou angai hih e” kati jin, hitichun kalunglaija chamjing Kimneo te louva chun,kaki gunchu sahlheh jengin ahi. Nikho chu anomma ham? la kahe pon, hiche nikho chun cholle nanjong,kahe phapon ahi. Ole ba Kimneo jehchu ahidem? Kahetlou kah in, chung tonisa jong lhum langa molpang lepding koncha ahitan, chuin Kimneo vin chetao te,ivai gei val taove” atin,keiho jong inlang jonnin, kahung kile kit tao un ahi.

Nilhah in kalhun jouvin kaki gellin Kimneo te inna kholai lenga chekit ding chu kanom min, ahin Kimneo vin tunilhah le kholaija hung kitno eiti lou jehchun, kache nomlheh vangchun, kaki phalam kit in ahi. Amonga jong Kimneo te inna kholai leng mihem atamji val jehchun, katha ase thimmin, kholai lengin kache tapon ahi. Bolding kahet lou mannin, ka mobile phone na World Football League hopou kaki chemmin ahi. Ipi kabol vangin,kalunga Kimneo jengbou kagellin ahile ipi kabol ham? tijong kahe phaji tapon ahi. Hijehchun kaki cheppi hochun goal ni chenga, eijou jiuvin ahi. Katahsa Kimneo komma kaum lou vangin, kalungthim pumpi ama komma aummin, abangle Kimneo toh katou khomma kaki houlim bangin, kachang changin kahung paodoh jin ahi. Chubanga Kimneo kangai kalungset jengchu kei le keijong kaki datmo in, ipo doi aii jin eilhimma, hibanga hi Kimneo vin eisuh ngol jeng hitam? tin,kei le kei kaki dongjin ahi. Kalungset kangai valjeh chun, akomma kalungguh thimthu cheng seiding kanom min, ahin mi kammol kahi jehle kapa thusei jehchun, kahel ngam kitji pon ahi. Kangaival jehchun phone nabeh houpi ding kanom min, ahin aphone number jong kanei kitlou jehchun, ahithei kitpon ahi. Kalung sunga cheng lungset nan seijeng tan tin eisol sol jengin, ahin numei jeh a,kahinkho achatvai khahding chu kaki cha kit in,hijehchun kalungsetna chu immang teiding, kagong jingin ahi. Janhi janna jong ka ihmu theilou jehchun, kamit kahah jou tapon,kahet loukah in,kana ihmu miltan ahi.

Hiche nilhah ka ihmut chu nom kasa vallin ahile khangjing kathou jou tapon ahi. Kapu ten an nehding atiphat un eihung kaithou un,chuin keijong kaki sutheng loijin,an kane tan ahi. An kaneh leo Kimneo jong ahungtan, kenjong kagah houpi paijin
Kei- Kimneo nahung kima gotdoh na lomme. Keihon an kine bep nalai uva.
Kimneo- Tujingkah chu jingkah dang sanga kaki matho intin, an ima kahon min vah jeh achu,kaki sah jou vah ale kahung doh mong ahi e.
Kei- Nangvang nafel mong2 nge. Keila tuchun kakithou doh bep in.
Kimneo- Janlhah chu kama mutle,kamut chim valla,khojong vah nailouva kaki tho mong ahite. Keipen tah ipi kafel pi hih e. Nungah fel hijat lah a.
Kei- Kenvang fel kahin sa mong2 nge. Na chubanga tonga,jingkah matah2 a nakitho jeng,keivang kajou poi.
Kimneo- Numei hinkho le pasal hinkho kibang lou chula uthangcha. Numei ijing luple koijin eivet nom dingham?
Kei- Hina chu nasei jongchu. Pasal jong jingkah itho vahle pha chuo. Jingthou lou hohi minung della bep a kipanga,kitho vahding kanop lheh ji vanga, kahi nan ajoulou ha? ole kadamthei nan ajillou ham?keivang kathou jou mong2 hih e.
Kimneo- Uthangcha mihem hi eima kigel dan2 ahi e. Igel khoh a ahile jolel ding aum hih e. Nagel khohlou jeh hinah ta hihi.
Kei- Chuti chu himaithei. Nop kisa valla,jingkah kitho vahding jong kilung jolou katin ahile Kimneo ahung tot in,kajah a
Kimneo- Keikomma umle chun twidap kathe khum jiding hija, ole ba nalung ahangin,neivo dem?🤭
Kei- Kathaset dan2 hi koima jong kavoh ngap hih e katile kapupan kajah a
Kapu- Nungah ho masanga ihatmo nale ithaset thujeng iseile, koi nungah in eidei dingham? kenla napinu kana hellai chun “kalungsetna hinkho dia neisan pehle, anjong hon ingting,twijong keiman khai nange” tin,kajou2 kaseijin,😁 hitia chu nasei loule hoilang nungah naki heldoh dingham? eitin ahile kapinun
Kapi- Thangcha khatvei ni jingkah a napu pan nakomma ajou2 aseija,keihin kanung ajui lele jeh a kaki chenpi ahi atichu,tua chu atah2 ahin seidoh tahchu atin ahile kanuija thei vallun,kanui khom tao un ahi.

Hitichun anneh toh kihoulim kakop2 uvin ahile anomchom lheh jengin ahi.An kaneh jou uvin,kapi le kapu komma Nangni ol ollin hung lhontan, Kimneo toh kei ana che ingting,cha ana om lhon inge katin, Kimneo toh loulang jonnin kache lhontan ahi.

Aban jingle simkit tao hite.

Lunglut tah a simjouse chunga kipathu kahin seije.

How useful was this post?

Click on a star to rate it!

Average rating 0 / 5. Vote count: 0

No votes so far! Be the first to rate this post.

Admin: Get in lamka

Get In Lamka - Digital Marketing & Information Services, Shopping site Lamka, Churachandpur, Manipur, Shop online at getinlamka.com, Read Daily news of CCpur.

Leave a Reply