THIMTHU LE ZAILA GROUP  KHAMTANG LANU By- William Lhonga Madrid. (8731974334)

THIMTHU LE ZAILA GROUP KHAMTANG LANU By- William Lhonga Madrid. (8731974334)

0
(0)

THIMTHU LE ZAILA GROUP

KHAMTANG LANU
By- William Lhonga Madrid.
(8731974334)

(PART-7)

Thoh hahsa kasah lheh vangchun, kachunnu khankho ding kagelle kave joupon, hijehchun hahlheh jongle kamaiya mitlhi katheh hullin, kajopa kavai lhahtan ahi.

Hepa ngailheh ingting, kou kou jongleng, damlai mella hung kinung lekit theila nahi tapon, iba ilo diuham? Chung Pathen laitan ahi maiye tin ana kilhem mai2 tange. Lung oi sellin chetan. Nacha keima neingailut jalla neihilna thuho kahinkho lhungin hinjui jing nang’e. Tunnin khenna kolni soh jongle, phatkhat teng insungmi kikimma ilenkhom kit thou2 diu ahi tin kajopa kavailhah tan ahi. Chuin ka Chunnu kalhemmin, “Henu, kapta hih in nachol valtai. Ibolla lainatna mitlhi nalonsah nahlai dingham? Ven, henu nacha keima kaum nai. Keiman nakipah nadingin hinkho mang jingin tin, nalhaset sah pong’e. Pathen thutep banga thil hung guilhung joh ahibouve. Henu kapta hih in. Nacha keiman namaiya mitlhi kave joupon, naka na ocheng hojong kangai ngampoi” tin, ka Chunnu kalhemmin, amaiya mitlhi katheh hulpeh tan ahi. Chuin ka Chunnu in asenji kajopa availhah in, vailhahna thuho asei jouvin, leiset akisem mongmang thei kajopa tahsa chu leiset nungsoh kitdin, kavui tao un ahi.

Gelphah lou laitah a kajopan eidalhah jeng lhonchu, insung ahongin, lenkhom laini lungmit lhan alang jingin ahile jopa damlaini lhangaina mitlhi along jingin, along kang theipon ahi. Ajehchu mitam te jong kihilou, mithum seh2 inkhat a chengkhom kahi jeh uchu ahi. Kajopa aumlou phat in, kamo pohna ahung tam cheh2 in ahile masang banga nop lenna ding phat le nikho aumthei tapon ahi. Chapang kahi vangin, insung bulpi kahung hitan, hijehchun nopsah dingle jalen ding dei jongleng, kajopa toh bangkhai ho ken katoh loule atong ding aumtah jehchun, jo channin kapa nung kathop in, seina dingmun ho a kaseiyin, tohna ding mun ho ajong katong jingtan ahi. Ka Chunnu achanga kadalhah teng asenji ngaijin, puldouna mitlhi along longin, ana kap kapjin ahi. Hijehchun, achanga aumding kanom jipon, kache namun jouse a ka Chunnu jong kapuijin, akipahna ding kabol pehjin ahi. Tot theilou sasan katot jin ahile ka Chunnu jong anuinom lou sasan ahung nuiyin ahi. Hitichun keini nucha chu nupa bangin kaki vopkhom jing lhonnin ahi.

Chung Chollha vah noiya, nilhah khat selunghel pumma kaki geljing laijin, kalungset Kimneo vin phone eihin bollin, kajah a
Kimneo- Uthangcha, ibolla phone behjong neihin bolkhah ji louham? Ole neigel mil ngap hitam? eitin, kalungsetnu o kajahchun lunghelnan kadimmin, kangailheh jengin ahi. Chuin ajah a kaseiyin
Kei- Nao, nangai milni aumpoi. Ven, in kalhun chun hepan eidalha taove. Natehpu mel jong muman lou nahi maitai. Nao, phaten ngaijin, miten hitihin aseijiuve. “Nungah gollhang kingai pet a, insunga thinan vai ahom khahle, lungtup molso louva kikhen jengding ahi. Achuti loule vangsetna akitoh nomme” tin ana seijiuve. Ahile eini ipi iti ding hitam?
Kimneo- Heu, ibolla hiti hopou chu naseiya, khending neiti ham? kenvang nahin khenjou pong”e. Min ipi sei jongle, kalungsetnan nahin khenjou ponte. Damsunga dia lungset kachan, giltah a kangai nahi hitia kimoh chai jengthei ahipoi. Uthangcha, eini vang kikhen poite eitin ahile lungset dihtah a eilungset ahichu kahe chennin, kalungset najong eiki belap sah in ahi. Chuin Kimneo jah a kaseiyin
Kei- Nao, khending lung kagelpoi. Khenjong khenjou pong’e. Nang tailou monna ding dang kanei poi. Miho thusei kasei ahibouve. Nangin neingaina sanga sangjo a, ken nang kahin ngai nahi. Ven, chunga Chollhanu ahungsoh e. Naobang kinuh a thimthu ilelna jan ahung lhung kittai. Gollin nalunga nageldoh louham? Keivang selunghel la thipai ding kahi tai.
Kimneo- Uthangcha ipi nahin seidoh ham? Kalung ahel valle. Nakomma ki umhen lang, sennao bangin na anglaiya kiki phinle kanomme. Uthangcha henu la damma hinam?
Kei- Henge nao, Henu adam nai e. Ahivanga, achanga kadalhah teng asenji ngaijin akap kap ji e.
Kimneo- Uthangcha ibolla henu achanga nadalhah jiham? Dalha kit tahih o. Henu khankho ding kagel pehle, kalung ase valle. Uthangcha henu kasah kit tahih o eitin ahile kalungsetnun ka Chunnu akhohsah naho chu akamchenga konnin kahe chennin, kaki papi lheh jengin ahi. Chule ngailutna a dimset, khankho nunlui nei nungah pha ahichu kahe chen bebe in ahile amatoh kaki ngaikhah chu vangpha kakisa lheh in, kaki thang atpi mama jengin ahi. Chuin Kimneo jah a kaseiyin
Kei- Nao nangvang napha mong monge na? Ngailut kamdam onem heuva neihin houpi naho chun eiki pahsah lheh e. Nao kahin ngai valle. Chungleng va banga lhaving nei hileng kanomme. Nakomma hung lengin tin, goldeinu naphei chung khapleng kalainat nale kalung genthei naho jouse jong na anglaiya miljou tange. Boi, kei ngai banga gollin neihin ngaiji louham?
Kimneo- Uthangcha kahin ngaidan atepi ding aumpoi. Nang ngainan sunsot toni lhum jou louvin zaitha kanem ji e. Janteng jankho vah jou louvin, gam huiva bangin kamao mao ji e. Uthangcha itih le kichen ding nati hitam?
Kei- Nao ana lungneo hih o. Nang thumma insung tule be toh kahung vaikon loidiu ahitai.
Kimneo- Uthangcha injo jeple kihoukit tai hite o? Khanglai te la kijil ding atiuvin, gache inge eitin, chuin kenjong ajah a
Kei- Henge nao akhoh poi katin phone kakoi tan ahi.

Kajopa pul kadou toh kalungset Kimneo kangaina asantoh ahile lunghelnan kadim min, hijehchun gaki huilha toh gommin kaloite inna kholaijin kaga che in ahi. Kaloi kapai ten eidaijun “Bhai ipi nati ham tulai nanui lam akimu kha tahih beh e? Ole Karbi Anglong langa kholla naga che achu Karbi nungah ho khattou chu nahin deichat a, apul nadou ham?” eitiuvin, keijong kale tot kit in “Karbi nungah hilou, ei thinglhang chonna chon, eimi nungah valleh Khamtang Lanu joh kangai ahi. Mudoh leochun nangho loihin deicha kit un natin” tin kale tot in ahi. Kaloi hon eidongun “Bhai na nungah seinu chu hoijem? ngouvem? itobang ham?” tin eidongun, kenjong kaloite kadaijin “hoiya hoi, ngouset jeng, Ahshijolneng atihou tobang chet ahi. Nangho a toh ivet kahle sun le jan bangjeng, mudoh leochun nei otcha kit un natin” tin kaloite chu katot in ahile alungtheh u hintin, question ajat jat eibol jengun ahi. “Bhai itih le naki chenlhon ding hitam? ahoidan chu koiho tobang ham? mipha hinam?” tin eidong sao2 jengun ahi. Chuin keijong katot kit in “nei dong2 hih uvo. Munai louvin deicha get un nate. Namu phatleo hetah taochun. Khamtang Lanu toh kaki chen phatle, nangho jouse Goodbye kibol ding nahi taove” tin kale tot in, hitichun kaki dai2 un ahile hetman louvin jankho asotlheh jengtan ahi. Hijehchun loile pai ngaicheng toh mangpha khat le khat kahung kithot touvin, inlam jonnin kahungtan ahi.

In kalhunna ka Chunnu kavet le noptah a samang ajalchu kamun,hijehchun keijong kaki jampai tan ahi. Nomma samang jal dinga khunlai chunga kamit kasin vangin, kalungthim akichem jingin ahile jansot samang kajal theipon ahi. Insung boina ho kavet jiteng jinei ding katha anomjin, ahin ka Chunnu in kamcheng khatbeh ajong “jinei tan” tia eisol loujeh chun, ka Chunnu phatsah louvin kamoh jinei nomkit pon ahi. Kalungset Kimneo kangaidan la atepi ding aumpon, nidan khat jengjong milthei louvin, sun le jannin Kimneo bou kagel gel jengjin ahi. Khatvei komle kalunggel la gellou ding tincheng kagellin “Kimneo hin lengdang ana sang jengdem? kiki chenpi vah dale eijinei san jengdem?” tin lunga gellou ding tincheng kagellin, jansot samang jalmon kaki sugenthei bebe jin ahi. Kei dinga lungthoi louthei jongvang ahipoi. Ajehchu munkhat a boulkhom jong kihi lou, Kimneo deicha, ahel gollhang la kivat kitlou ahijeh achu keidinga kisonlel umji thou ahi. Moh a amanjong lungset dihtah a eilungset a, Pathenna kingaijing nungahpha ahi jeh a, kiki sonpi ham2 ji ahi. Ka Chunnu kamchenga konna “Thangcha ji neitan” tia solna ogin ahung umle, jinei jeng dinga gottupsa aum kahi tai.

Jingkho vah in ka Chunnu in ei kouvin, kajah a
Chunnu- Boi, kingaipi kilungsetpi nanei nailou ham?
Kei- Henu ipi da hiche thuchu neidoh ham?
Chunnu- Boi napa la um talouva, keila masang banga kihat talou, nang nagim val tah hio. Kingaipi nanei le ithum muva, naji nei jenga pha hita louham? Insung jong ahong valtai.
Kei- Henu, kingaipi kanei e. Hitia chu lung nagelle, nangma phatsah dan2 hitante.
Chunnu- Boi, amonga koitoh naki ngaiham? Na dongmanu min ipi ham?
Kei- Henu, ka dongmanu min Kimneo ahi e. Karbi Anglong gamma kaga che na kapute kho ho ahi e.
Chunnu- Boi ahile Kimneo chu itobang miham? Mipha hinam?
Kei- Henu, Kimneo chu aphat apha hichu. Numei dang banga kiletsah kimitsah ho jong abollou, khankho nunkho heithemma, Pathenna kingaijing numei phatah ahi. Kimneo hung chengle nangin jong nop nasah a nasah ding ahi.
Chunnu- Boi, chubanga nungah pha, Pathenna kingai jingmi khattoh kingaiya, ibolla nasei doh khahlou ham?
Kei- Henu, nangin neidoh khah loujeh a kasei dohlou mong ahi e. Ka Chunnu nangma phatsah louvin, ima kabol nompoi.
Chunnu- Thangcha ahile Kimneo chu kamounu dingin, jingle thaile gathum tao hite o?
Kei- Henge henu, nangma phatsah bangin bol jengin. Hitichun ka Chunnu toh kaki houlim lhonnin, nilhah phatle insung tu lebe ho khop khomma, Kimneo thumma vaikon dohding dan kihoukhom ding thuho kaseikhom lhonnin ahi.

Chujouvin an kane lhonnin, an kaneh jou lhonnin insunga toh thei2 katongin, nilhah phatle kihou khomding bouchu kamoh ngah jengtan ahi. Nilhum kal ingah lel kom jongle, nilhum gei dehset toh abangjin, hiche nikho chu nikho dang sanga sao dehset hile akilom jengin ahi. Nilhum konnin ken an kahonnin, ka Chunnu in mi agakouvin ahi. Ka Chunnu hung vailhun nin an kane loi lhonnin ahile phat chomkhat jouvin insung tule be hojong ahung kikhom kim taovin, chuin kaki houkhom tao un, jinga cheding boi saloi aum jehchun thaini a chedingin kaki phatsah tao un ahi. Kaki houkhom jing laijun, kaphone ringtone ahung gingin kenjong koiham? tia kaga vetle, koima dang ana hipon, kalungset Kimneo ana hi in ahi. Chuin kapick loijin
Kei- Hello nao
Kimneo- Hello, Uthangcha ipi nabol hitam?
Kei- Nao, Meeting kabol uve. Nangin ipi nabol hitam?
Kimneo- Ken ima ka bollou, ipi thu nasei u hita ong?
Kei- Nangthu kasei khommu ahi bouve nao katile kadai dannin agellin, einoh in
Kimneo- Min phate a nahoule, phaten houpi jitang. Ipi natot dehduh jiham?
Kei- Nao katot ahi poi. Thutah kasei ahi.
Kimneo- Ale ipi dinga keithu nasei ju ong?
Kei- Nao, kaboi e. Injojep le kihou kit tai hite o?
Kimneo- Ngailou tua seita. Kahet nom hichu.
Kei- Nao, nang thumma hung dinga insung tule be hotoh kaki houkhom mu ahi e katile akipah lheh jengin, chuin kajah a
Kimneo- Uthangcha atah tah nasei ham? Itihle nahung diuham?
Kei- Nao, thaini leh hungding kati uve. Ahijongle phone koi tange o? kaboi jep e.
Kimneo- Ole, mangpha.
Kei- Nangjong mangpha katin, phone kakoi tan ahi.

Achom langin hinjih tange. Kimneo te kho a vaikon doh dinga kana kitepnao nikho ahung lhungtan, insung boina hojeh in keivang kache jou tapon, ka Chunnu jaona in Kimneo te boulna vangkho jonnin, avaikon doh tao un ahi. Kimneo insung miten jong eiphatsah un, Pathen dan thenga kaki gop lhonna ding nikho jong ahung kitep tao un ahi. Phat le nikho, kumle lha achal challin kana kitepna nikho ahung lhungin, Pathen le japi anga kalungset Kimneo toh hinkho a chengkhom din kaki tep lhon jouvin, Pathen lhachapun eijanggop lhontan ahi.

Tuhin Pathen nin eipeh lhon laigilga, meldei umtah numei khat kanei lhonnin, amin apinun ama deitah in asah in, Nemlhing-Lhingneinem tin aminvo in, minngeiya Nenem tin kakou jiuvin ahi. Khamtang Lanu tia kana kouji ka inneipi Kimneo phatna ho jallin, insung jong akikhel tan, masanga toh vetkah din anom lheh jengtan ahi. Kimneo khankho heithem najallin khosung minjong eingaijun chule ka Chunnu jong alungmong lheh jengtan ahi. Kimneo jallin asenji pul adouna hojong silpon bangin abangin, kipah tah le lungmong tah in hinkho amangtan ahi. Miten asei jiuvin “nangho inko mama otchat na um jiuve. Lung kitoh tah a na cheng khommu vin, chamdellin hinkho namangun, Pathen thu nakhoh sah kitleo, nangho jal jallin khosung le Houbung sung anommin, ki thang atpi naum lheh jengu ve” tin eiseipha jiuvin, kihilna in jong eimang ji un ahi.

BEITA.

Hiche thusim hi Part 11 chan kana jih chaiya, Upcoming Story adinga jong Sangga Hinkho jih chaisa a kakoi le, gelphah louva kaphone ahung boi jeh a, mangjou keija kino tah a kathah jihkit ahi. Hijeh achu thusim hi nangma lunggel toh kitoh lou beh a hung kichai maithei ahi. Ipi hile lunglut tah a eina simpeh hole, ngahlel tah a inbox eihin bol jouse chunga kipathu kahin seijin, Pathen nin Phatthei naboh cheh taohen. Upcoming Story Milni hung um nante ana ngahkit tao hite. Kakipah e.

How useful was this post?

Click on a star to rate it!

Average rating 0 / 5. Vote count: 0

No votes so far! Be the first to rate this post.

Admin: Get in lamka

Get In Lamka - Digital Marketing & Information Services, Shopping site Lamka, Churachandpur, Manipur, Shop online at getinlamka.com, Read Daily news of CCpur.

Leave a Reply