You are currently viewing THINGPHAI KHO KIBULU THUSIM
Thingphai fencing

THINGPHAI KHO KIBULU THUSIM

5
(1)

Shillong | Sept 08 | Lrb.munda | Get In Lamka

THINGPHAI KHO KIBULU THUSIM

Thingphai fencing

Chapter-I

THINGPHAI KHO UM DAN LEH GAL KIGOT DAN:

1.1 :- Thingphai kho hi Tolbol 1950 chun Pu Nguljalhun Chongloi mi upa hina’a hung kitungdoh anahi. Amunhi hampa thingphung engjinjen a akena mun, mol le lhangin aningli a a-um kimvel, alailung jangcham hamhing dumjinjen ahijeh a pu le pa ten Thingphai tia ana minsah u ahi. Thingphai vangkho hi Kangpokpi District, Saikul Sub Division a um ahi. Saikul a pat 30 KM vel gamla, Kukite khochenna aning chong Nagate toh kigamgi (border) mun ahin, hiche phat laiya chu khoneocha inbul 25 bep chengah anahi. Langkhatna agallama chun Nagate kho Leisan (Tanrui) kho inbul 100 val chenna, NSCN(IM) lamkai minthang Ramkathing chenna kho toh Zil vadung (Iril River) in akhen, amaho duty post leh eiho duty post a pat kigalkapto jingna mun ahi.Thingphai kho umdan hi alailung ah lentol nomtah uma, kilungthu phu a incheng khom akihi. A inn leitol cheh a nisa lum oiya ihung toudoh chehleh ibonchan aki kimuto theiyin ahi.

1.2 :- Khosung hi sounang kikamdetchet a kiumkimvel ahin, duty post thupi tahtah 8 jen akisan, post khat a pat khat kijotmatna thei trench (bunker) phatah in akilaimat in, galmi itobang hung jong leh nungchon louva lungmongsela kikappi thei ding, ithi jong leh thipiding ihin jong leh hinpi dinga kigotna kinei ahi. Gate ni akihongin sahlam Gate hi mipi pot le lutle nan akimangin chuleh lhumlam gate vang hi khosung goulhang thal choipuma galmite chunga natongdinga (ambush) jankhang janvaiya numei chapang jeng jong hetsah louva vaikon vailhung ho lut le pot le na a kimang ahi. Gate teni jong hi pasal 4 le 5 kitho a kihonga kikhah ji ahi. Sounang kikaidan, duty posts kisemdan hohi kisonpiding hileh khodang ho sanga kisonpi um mama ahi.

1.3 :- Naga te toh kiboilai phat sung a hi Thingphai kho hi agim a gimnei koima behseh amun phangam ah jong umlou ahi. Hahsatah a aga phathei sun jong jan khat jeng jong lungmong a geh ngam ah umlou ahi. Kiseibe leh igollhang hou thal choi ho jeng jong jan geh ngam lou ahiuve. Chubang mun a cheng ah akhomi ho vang alen aneo, numei pasal, koimacha khat jong kicha a lungthoi a, akhomun otdoh a jam mang ding a lunggel neija akium poi. Apaodoh sun chu ahung uleh iki maito piuva ihin uleh ivang u, ithiu leh iba kilo ding ham igam leiset dalha a hoilang kisu chom ding ham ti lunggel nei pum a khosa ngen akihi. Pathen in hansan na eipeuve meidoi, lungneo na lungthim keiho a kon in alamang e kiti leh kiseikhel lou ding ahi. Akhomite ka kison nau, ka hansan nau adang ahipon Pathen bou ahi. Mihem a kison ding hileh upa gollhang agom a mi somthum le nga (35) vel bep aki hi bouve. Galsatna manchah a kison ding hileh koima thal neijah jong aki um poi semthu thal ho tailou. Ka thal neisun u chu kho haosapu’n Single barrel khat aneisun chubou ahi. Galsat them a kison ding hileh koima galsat je dan (training) kichuh ajong aki um poi. Hiche dinmun a kisonpi kineppi chuleh kingaina a kinei chu Thingphaite Pathen bou ahi jeng e. Eingailu diu, eipanpi diu, ei umpi diu, gal eisathu diu, imajouse ka Pathen uvin eibolpeh u ahibouve.

Chapter-II

NIKHO 6TH AUGUST 1993 (Friday) THILSOH GIMNEI:

1.1 :- Vacha khat kho-oi kiti aham ji in, hiche vacha ahamteng leh tehse hon thu aphapoi anati jiu kageldoh uvin, aphat vang hi nai jepjep hitante tin kihoulimnan kaneiji vin ahileh nini nithum jeng jong cheman louvin 6th August 1993 Friday jinglam nidan 3:30 am donin thal ahung ging pan tan, thal gin chu achehleu jengin duty post jouse a konin kholhang sampumin kakikap pan taovin, numei chapang ho leh tehse ho jouse hoidoh nadinga kasemu Community hall lam jonin ka le mao pumin akitoluvin ahi.

1.2 :- Galmiten sahlam Gate No.1 le lhanglam Gate No.2 ahin haphut masapen uvin ahi. Sahlam Gate No.1 duty post a pang keiho lah a kona kisam awgin chu “Khai bol tao, kap tao, nangkhoi gumbah Naga macha tia samchu koidang ahipon, kaminlo pa tehse hangsan milungneitah kapu Pu Lhunkhosei Chongloi ahi. Thingjangvah in ama jong athip tan, thalchang in akapkhah anahitai. Chehleuvin duty posts jouse a konin pumpi kalha khumun, amaho lah a konin jong, “ava avi” (henu hepa) tin ka le mao awgin athong leuve. Hichehi khojin pet sung thilsoh ahinalaiye. Kho ahungvah lhah phat in, naichacha a jankhovah a anakikapto ana kihi. Kathalchang hou, pumpi ho kakap chai gamtaovin ahileh duty post ah kapang jou tapovin ol ol in kakinung khin pan taove. Galmiten sounang ahinsat hong pantaovin, gate teni a konin ahunglut pantaove. Hichun duty posts ho jong ahinlo pantaovin ahi. Chubanin inn ho banneichan ahin halpantaovin, inkah meikhu kitung lenglung chun mihem lung asuneo lheh jenge.

1.3 :- Keima jong meichang hatbehseh jeh chun bunker a ka opleh kaloiho nungchon lam kana hephatapon, kachangseh kana hitai. Hichun keijong eihin kap khatavin ka thisan ahalon val phat in kalung avaitan hichun kakunin Pathen hengah kataovin “Pathen nalhacha natong dinga pha neisah leh neihinso in lang achutilouleh galmite khut a konin kahinkho hi latan katin”. Amen, katiti chun thalgin jong ahung thip in kakho hetna ahung umin, kathal choi puma kahung lhaileh kolchu (sugarcane) leilah a eihingah kangailuttah kapa Late Helkhohem (Hembong) Chongloi athisan akhuplangin anakijam kahin tohkhan, sasahding kati leh kajet kaveiya meichang achuti hat kit phat in, keijong athi chu athi ahitai tin kahindalhan, meikhu lah ining inkah lah ah chun kahung lhaiyin ahileh Pathen venbit jalin eikap vanguvin eikap khapovin, mipi umna Community hall sungah kahung lhailut tai. Hichun keijong Pathen in meichanga eikouna jamsan theilouvin hatmo pum, lhasam pum hijongleng tunichan in alhachana katong jinge.

1.4 :- Mipi kinotkhomna hall leh avela inn 4 bou chu hallhah lou ahitan, galmiten hiho chu hallhah tei ding ago uvin ahi. Asunga um numei chapang huhnan Community hall chu pasal achatthei jousen aki umkimvelin phatah in akiting tai. Hall hung lutna ding lampi chu atuppen u ahin, hichu Maj. Letpao Chongloi KNA Kachin training chaisa, NSCN(IM) ten akichat penu ama’n achangseh in ating in ahi. Hichepet a aman asei chu “songkoh ho hichehi ne tangu” tin olmo louvin akap jingin ahi. Bomb ijat ging melse tahtah leithol kithing leuva asekhum jing vanguvin a otdoh in, apohjah chai teng adellut kit ji in, amun chu alhakang pon ahi. Amahin haosapu Pu Thangkholun Chongloi single barrel akichoiya pang ahibouve. Hiche kikapto pet chun galmi Nagate galkap thei cheh pasal gup jen apetpet in akap lih in, ama masanga akijongdoh jengjung jenguve. Hilai mun chu hinkhel theilouva athi-thi jeng phat uvin amaho jong akicha taove. Galmite thalkhat jong aladoh in ahi. Aman aseibe na ah Kachin ka um laiya kol (Burma) sepoy ho toh kakikapto naova kathal choi G-4/G-3 ho chu choileng tuni jingkah vang Nagate khat a khat jong kahinghoi lou ding ahi, anati. Ama natoh chaloh dan chun mihem jouse lung asulenin, Pathen in Maj. Letpao Chongloi mangcha in Thingphai kho anahuh doh in ahi.

1.5 :- Jinglam nidan 10:00 am don ahung hitan, galmi ho kolchu chep a toukhom mi phabep hall sunga umhon bang avutvang un, pumpi lentah khat khomah khaotoh kanbeh pumin alha khum uleh a eusot jengun akithe thang uve. Khovela cheng Nepali ho thulhut dungjuiyin mitamtah ahung kipo uve ativin ahi. Meichang lamleng in hall sunga um Pa Munkhokam Chongloi ahapi ahinkaplhah pih uvin, meichang le ahapi amom chu ahinset lha in “phui Nagate meichang in thi naisang ponge” atin ahi. Pu Hemkholal Chongloi hi kikaptona hung kipat a pat in mi til in apangin, meichang lamleng jong kichalouva hangsan tah in duty posts ho ah meichang leh meilou homin apangin ahi.

1.6 :- Langkhat ah vangset umtah in hall sunga numei chapang kisuhlungneo nathu ana kithumop khauvin ahileh mipi chu aphutaovin galmi pamlama aumlamu kichalou khop in sounang ho achop khum uvin, gam ong lang ah kihinso ding gelna’n anajam cheh uvin ahileh hi a chun galmiten suhto in alen aneo khenlouvin ana kap uvin ahile mi tamtah akithi lo tan ahi. Chukitleh ahinbulu til u khojin pet a guhthim a kitholdoh a khodanga thupe dinga analhaidoh ho jong vangset umtah in galmite ambush touhon anating kha uvin, mi phabep anakaplih kit taovin ahi. Hiche ho lah a thusep ding a ahingdoh Village Authority Secretary Pu Sehlam Kipgen (tua umtalou) vang chu thinang nangin Jangnoi kho agalhung in ahi. Ama jong chomkhat pi thilmil leuvin aumin, ol le kanga ahung lip domphat in Thingphai thilsoh thu alhut tan ahi. Ama thulhut a konin Jangnoi kho pasal hangsan cheh mi 12 tobangin eihin dellut uvin, thi le hin ginglouvin asopi Thingphai khomite huhdingin ahung lhaitho jenguvin, jinglam nidan som (10:00 am) donin ahunglhung uvin, gamla tah a konin kholhang awgingtah in ahinsamuvin “Eikhoi KNA thung khare, ngasi jengnasi” ahinti uvin ahileh galmi (Nagate) khobulu ho le ambush tou ho chu akicha uvin ajam taovin ahi. KNA min ajah phat uvin galmiten akicha lheh jenguvin, alubuh u ajampi taovin ahi. hiche hi 10:30 am don ahitai.

1.7 :- Chujouvin khomi ijat athi umem tia ahung ki holkhom leh mi 15 hinkho ana beitan ahi. Athilah lah ah chun Jangnoi kho a kon Thingphai kho huhna dinga hangsan tah a pang Gl. Thangtinlen Chongloi jong ajaovin, amahi Thingphai khomiten a itih a kimilou ding ahitai. Ama goh hilouvin Jangnoi khomi pasal hangsan ho umlou hileh Thingphai kho kihuh joulou ding ahi.

1.8 :- Hiche nikho a Thingphai kho kibulu na a galmiten ana kaplih hou chu anoiya kigollha ho ahi:
1. Pu Ngujalet Chongloi (91 yrs)
2. Pu Hellam Chongloi (49 yrs)
3. Pu Kamchon Hangsing (45 yrs)
4. Pu Helkhohem (Hembong) Chongloi (66 yrs)
5. Pu Lhunkhosei Chongloi (87 yrs)
6. Pu Thangpao Chongloi (65 yrs)
7. Nu Chinlam Chongloi (Kangnu) (44 yrs)
8. Nu Kimkhoneng Chongloi (44 yrs)
9. Gl. Thangtinlen Chongloi (21 yrs)
10. Master Satkhosei Chongloi (12 yrs)
11. Ng. Neikim Chongloi (16 yrs)
12. Master Lunkholen Chongloi (12 yrs)
13. Baby Lhingneivah Chongloi (6 yrs)
14. Baby Chinneilhing Chongloi (10 yrs)
15. Baby Hatneilhing Chongloi (6 yrs)

1.9 :- Chujouvin khonungin jong 1997 kumin Gl. Mangkhohao Chongloi (17 yrs) hi jingkah matah a avadoh leh khopam a galmiten ambush anabol uvin akaplih kit uvin ahi. Abanin hichekum mama 6th MR Keising Party toh khosung gollhang ho akikaptona uvah ka u ngaitah Ng. Nengkhochong Chongloi (34 yrs) anakaplih kit uvin ahi. Nagate toh ikiboi jeh uvin Thingphai khomi agomin mi 17 athi in ahi. Galmi hungkon hohi mi 400 vel tobang hiding dan ahi. Amaho hi Thingphai leh C. Kholen bulu dinga mi 200 tobang cheh kihomkhenu ahiuvin, C. Kholen ten akho u anadalhah phat uvin, baitah in akho u chu ahin hallha uvin chuleh tehse khat ahin that uvin ahi. Hiche C. Kholen bulu hon Thingphai bulu ho ahinbelap kit jeh uva, hatah a kinanglel ana hi.

1.10:- Ahinkho itlouhela khosung huhdohna dinga hangsantah a panga kisukha ho amin cheh in akipha jou pon, anikho nilhah lam in Imphal a hospital a kijen dingin eihin posuh uvin, Pathen lungset jalin akisukha ho koima ahinkho lemah aumbe tapoi. Hicheni kikapto na hi phatah a ivetleh manchah choi jong kibang lou, amijat jong kibang lou, mi chujat in eihung bulu uchu hindohtheina ding himhim umlou ahin, hinlah Pathen vantil amatah in gal eisatpih u ahi ti kichentah in akilang in ahi. Nampi’n Thingphai kho huhna a ipan lah nau hi igam u ihuhbit nau ahina chung chon ah khat le khat iki ngailut nau photchetna jong ahi. Thingphai vangkho khang thusim leh KUKI nampi adin laisea haimil louva minphah jing dia lom Pu C. Doungel insung, adeh a achapa Pu Paotinmang Doungel (C.O. 7th M.R.) ahiuve. Pu Paotinmang Doungel hi Pathen ngailu, gam ngailu chuleh nam ngailu tah mikhat ahin, pachat umtah le kisonpi umtah ahi. Tu maban a jong igam leiset u huhtup leh venbit ahijing thei na ding a Thingphai tobang gamning (border line) ho hi venbit jing na ding a nampi’n pan ilah jing diu deisah jong ahi.

Laa CHOINA naho….. omitted….

Pathen in Thingphai vangkho vengbit jing ta hen.

Pastor Seiminthang Chongloi,
KWS, Shillong

How useful was this post?

Click on a star to rate it!

Average rating 5 / 5. Vote count: 1

No votes so far! Be the first to rate this post.

Leave a Reply