TRIBAL POLITICAL SURVIVAL
KL.Muana Social Worker

TRIBAL POLITICAL SURVIVAL

1
(1)

TRIBAL POLITICAL SURVIVAL LAH TUP LEH NGIM AH NEI LO IHI MAI TAK UH LEH MDC, MLA, MP I REPRESENTATIVES DI TEU HI TERM KHAT ZEL A DI’N ROTATION KICHIAPI TALE MAW

Mipi palai/ representative chu thini, manni leh damlo hitanni hun te ah mat di bep hilo ahi. Mipi haksatna government kianga pau leh ham chuam, pianphung ah le kibang lo, biak leh hindan ah le ki bang lo te mapuitu leh thasik ding ah muangtak ah teldaw te ahiu. Ziabanachun, nam tawm leh neute (thingtangmite) ihi ziak un, nam lianzaw te apat suachakna umsun ah kingaitua lianpen, achuam ah ki vaihawmna ding State ahiloleh Higher Autonomy guanggal ah um hi a thupi pen ah sai thei leu, law and order ban ah administration te hung lamzang zaw deu intin thingtanggam pumpi khenchuam umlo ah hiseltak ah khantona lampi ah kiding di ahi. Mipi palai in ngawngkawl gual ah constituency chiat ah mipi, a huaplian zaw ah gamsung pumpi ngainatna lungthim diktak, mawpuakna kipumpiak tak ah lak zing chuh khantona hingei ding ahi.

Ngaidan thiangtho tak in government ah mipi palai I nei teu hin puitu (leadership) hina fund kichuna a buai buai sang un, fund umsun sun ah a mipite’u siam hun mama ahitai. Centre leh State government apat khinthak fund in I gam leh nam tawmcha leh khutpek tia leipek dapsuak maimai te dinmun supiting zo lo chuh hiatsa ahita mai ah. Ziakachun, global economy hat mama ahitak ziakin I government fund bep hilo in International fund deldawk thei ding ah titna nei te matchak thiam leh matthei te teldaw hun mama ta in ka ngaitua hi. Mipi te’n le mipi palai ah teldaw te lamdik ah matdan, gam leh nam khenchuam umlo ah kigual tak ah khantona umna ding in ngaituana lungthim sang hun mama ta ahi.

I gam sung ah thing leh gua, suang, sana, dangka I nei teu thiamthei tak ah mat pawimaw ahi mama tai. Thingtangmite chenna thingtanggam leh phaidung ah nek leh chak hawldan zat chuamchuam ah gam leipek I matdan teu, hun awng I matdan teu ziak in I zogam hawina pak leh ganhing te manthaina um zing hi chawlsan hun ahi mama tai. Nam lianzaw te apat gam duchakna um zing, I gamsung mama hingal ah mi khut ah politics hawilo sai ah kihek, kineksiatna sai tampi um ti hezing kawm ah I gamsung ah go um te matdan kithiamzil zaw chiat leu hin gam leh nam it na hawitak tawh khantona phatak um thei pai zaw ding ah ngaituana liantak a um hi.

Government project um sun te lah a neupen apat percent I lak/ cut un, kilepna ngaw thei thei ngaw in a umsek hi. Zia gual project te ahileh khenkhat te’n UGs te paulap in percent alak sek ziak un suk pitin thei ahi ngai puai. Ziaziak ahin, ngaituana diklo, kizo thepna chi kitu tam ziak in mipite khantona lungthim kitasam ahi. UGs tamtak te bawlkhialna um ngei ding himaleh gam leh nam it mama ah kalsuan khenkhat te hi government leh administration te sang in vaihawmna dik chiapi zaw in a um hi. Ziakachun, khawhethei tak ah mipil puitu hina nei te’n mipi lak ah awareness hawitak piak ah, mipi palai tel hun ah le namneu te dinmun veinatna lungthim ziak ah mimal du- amna taisan theite gam leh nam pitinna ding ah phachuam tak ah ngaitua hun ta hilo ahem tite hin ngaituana a sukha mama hi.

Manipur phaigam te chu chiadan chuam in ala um phawt taleh, thingtanggam ah mipi palai MDC, MLA, MP te’n fund umsa mai le kuama hiatlo gual ah transparency beikei ah um ziang sek hin thingtanggam paklun sak zo lo ahimai hi. Centre leh state fund umsa sem dawk ding in kuama a titlo a um pua’n, gam leh nam dikna taisan kawm ah kizawkna in fund mu tam sem ding ahileh bailam takcha bawlthei hiding ahi. Ziakachun, ngaituana kichian kilkel khat tulai ah um chu I nam sung ah agim achawl deu te, inchen lochen kisiamna mat mai di, term tin ah palai kisang sak thei leu hin, zia chuh, kipanpina um thei sun ahi mai diam ti hih ngaidan mawltak mai in kanei hi.

Zia a chung ah kigen te sia he mama ah zuilo, puitu leh palai te hilo in, I gam leh nam khenchuam umlo ah khantona ding chiapi thei, Indian Constitution nuai ah thingtangmite kihumbitna ding a chuam ah piaksa matthei ding ah kivaihawmna ding hun guanggal thei, chuleh, a gam leh felna hawl masa thei puitu ding ah tit a um leh kua hita lehle politics diktak chiapi mi ahichun piak leh guat ah a um chun masawnna thupi tak um thei ngei ding ahidan aki chiantawk ta mama hi.

 

*@ KL MUAN*

How useful was this post?

Click on a star to rate it!

Average rating 1 / 5. Vote count: 1

No votes so far! Be the first to rate this post.

Admin: Get in lamka

Get In Lamka - Digital Marketing & Information Services, Shopping site Lamka, Churachandpur, Manipur, Shop online at getinlamka.com, Read Daily news of CCpur.

Leave a Reply