TRIBAL UNITY DAY   By: Ginlun Valte
Get in Lamka

TRIBAL UNITY DAY By: Ginlun Valte

0
(0)

*TRIBAL UNITY DAY*

By: Ginlun Valte

By: Ginlun Valte

…. Nop kei na khemkhem e maw… Kum khat, kum nih bek daih di kisa a, a Day pen zat ngam huailai di mah ahi diam? Poikei bangteng hileh _Variety Store_ kitaak nateng a le deihteng kim chihna hituanlou hiven, Unity hong ging khiat theih le kipahhuai chi ni mo? Buai hon kipat tunglai in homeground advantage nei Lamka te ihi ua, sih, liam leh bai leng itam mahmah, amaute Zahna sangpen i pia hi.

A sak minthang hiai Bill Thumte:
1) _THE PROTECTION OF MANIPUR PEOPLE BILL, 2015_

2) _THE MANIPUR LAND REVENUE AND LAND REFORMS (7th AMENDMENT) BILL_,
leh
3) _THE MANIPUR SHOPS AND ESTABLISHMENTS (2nd AMENDMENT) BILL, 2015_

Buaipih tham hiai bill thumte deih selua hinapi Meitei-te’n 10th MLA (10th Session) a Bill khat ‘ _Manipur Regulation of Visitors, Tenants & Migrant Workers Bill, 2015_’ kichi zang in phupan ua, Manipur Assembly in leng passed hi.State solkar in March 20,2015 ni-a Governor kiang a apiaktouh himahleh Indian Constitution Article 201 pansan in President dongphot ding chi’n Governor in assent pelou hi. Huchi’n JCILPS min in helna phaizang mite’n hon pan uhi. State Assembly in July 15, 2015 in huai bill tha-khek ding Bill dang puaklut ding ngim in zukkik thak hi.

August 2015 buaina tuh lamet louh pi a Pathian in hunlem hon bawlsak ahi, ka chi a. Pathian in tuh mihing zia ngaklou aka. Mihing deih hunhun a gamta le hilou.Huaiziak a, ni li bang a zekai lele a hunlap hi thouthou dan ahi amah tuh. I buaina ah Nute’ panlakna thupi kasa mahmah mai, thilhoih mahmah ahi a adiak in sai-ip puansilh kawm a thumkhawmna neite kamuh chiang in nikhat tei Toupa’n I gam uh hon damsak ngeiding ahi kachi ngam hi. Khovel a i om sung in, ei Khristiante galvan thupipen tuh thumna ahi a, i Laisiangthou a Israelte le sai-ip puan silh kawm a kiniam khiak tak in Toupa a na buanzel ua huchi’n Toupa’n a gam uh a damsak zel hi.Ka ngaihtuah sek a, Saptuam kichite le kituak theilou, bang ziak Tribalte kituak thei mahmah di! Three Bills ziak liauliau a Unity hon gingthei, Saptuamte i chih _Doctrine_ kibanglou a, kituaktheilou di mah ihi uh chi’n kei leh kei solution ka kibawl suk mai hi. Bangteng sukha a, bangchituk a lauhuai hiam chih thei chiangloute le tu muangthei ki omnon lou, ki awlmoh chiat zaw ahi ngei di, Shillong aka omlai ahi a, ana om muangtheilou zaw ka hisam di, awlmohthu social media te a kana gen ekek sek a *Whatapps Salpha* title bang kana tangkha hi. Pathian in zaw i poimoh uh hon theilua eive, diktatna lunggulh a om heutute ading in hun lemtang mahmah hon suak, diktakna thu nakpitak in genkhiat ngam in hon om khongkhong hi. (Nasepte:2:1-4) Vualzawlna muhtheih a om Tuailaite lak a diktakna chi tuh in hon omkhia hi *”TuaIlai 1434Pro”*

Pathian tuh gam leh leitang ah a lunglut mahmah hi, Ami tel Israelte Aigupta gam a gentheitak a suak leh sal a omlai un, Mosi zang in ana pikhia hi. Pathian nangawn zong betheilouin ‘ _bangchi’ n migam a Zion laate kasathei ding ua’_ chi’ n agamte uh ngai in ana kap uhi. Eite leng i gam hon buai a, Pathian i biak di pen leng betheilou phial in i om uhi. I thiltuah ziak in Unity ahon ging khia a, meima damtheilou bang in, alanglang ahon pehtou a, atuamtuam in i ki Unity vengvung uhi. Tua i thiltuahte ziakin buaihuaina a thuahthuah in hon om khia abang hi. Manipur solkar tunga i hehna toh, I palaite tunga I lungkimlouhna toh, singtangmite unauteng deihbanga kituak diamdiam theilou I batna utoh, I buai vingveng ua, bang thilhoih le hong piang mah diam maw? Kikhekna zaw hon omzek na ei ve maw!. I dinmun buaihuai vingveng (complex/chaotic) apat thilsiam thak, kipatna thak, a hoih mahmah Pathianin hon bawlsak hi! Eilam ah Pathian muangin tawplou in thum in, sem ni. Ngaihtuah mah dih.. nungzuite’ tuanna long huihpi in a nawk ekek takin, Jesu ihmulai a phawng ua, honkhe di’n a sam ua, huchi’n Jesu’n huihpi tuh a khaam dai, chih imu (Matt 8:23–27; Mk 4:35–41). Thummite I tawl nga theikei hi. I huihpi tuahte Jesu in hon khaam daih sak dinga, thil bangkim ahoihpen in ahong kihei ngei ding lam et huai mah di ahi diam….

_KIPUMKHATNA_ tuh mihingte a ding kia a poimoh hilouin Van Pathian in leng poimoh asa hi. “ _Eimah pumkhat ihihmah bangin_”(Jn.17:11) chiin, Jesu leh Pathian pum- khat ahihna dungzui ua mihingte (saptuamte) kipumkhat ding in ahon ngen hi. “ _Huan keizaw khovel ah ka omta keiding, hiaite bel khovel ah aom ding uh, kei na kiang ah ka hongpai dekta, pa siangthou aw, nang kei non piakte namin humin, PUMKHAT ahih theihna ding un, eimah pumkhat ihih mahbang in_ ”(Jn. 17:11). Hiaite banah, kipumkhatna tuh Pathian thu a kinga ahih- dan ana gen hi. _“Na thu akiang uah kapeta hi. Huan khovelin amau ahua a, khovel a ahihlouh ziakun, kei khovel a kahihlouh mahbangin, Nang amau khovel akipan nalak khiak dinga ngen kahi kei a, migilou lakah na hum ding kachi ahijaw_”(Jn. 17:12-16). Kipumkhatna Pathian thu ziakin Paul in leng, _“Navek ua THU KIBANG nagen ua, nalak ua kikhenna himhim a omlouhna dingin LUNGSIM MUNKHAT leh NGAIHTUAH MUNKHAT a diktaka nakizop tinten jawk na ding un, Toupa Jesu minin kon ngen ahi_” (1Kor.1:10) ana chi hi. Hiai in Pathian thupiakte maha kipumkhatna mah poimoh ahihdan ahon musak hi. Huan, Jesu’n, “ _Nou non it uleh ka thupiakte na jui ding uh_”(Jn.14:15). “ _Kuapeuh ka thupiakte neia zui tuh kei hon IT ahi. Min hon IT leh ka thute azui dinga, kapan amah a it dia—amah toh kateng khawm gige ding uh_”(Jn.14:21-23). Himahleh, “ _Kuapeuh hon it louin kathu a jui kei_”( Jn.14:24). Hiai apan thujuihlouhna tuh Pathian toh kipumkhat louhna leh it louhna ahi chih a chiang mahmah hi. Aziak tuh, “ _Pathian i itna tuh a thupiakte i zuihna ahihziak in_”(1Jn.5:3). Pathian thupiak bang a izuihna in Pathian toh pumkhat kihi hi. Huchi ahih dungjui in, thupiak omsate bangbanga Khristian ten i zuih chiat a, thu kibang gena, lungsim mun khat a oma, ngaihtuah munkhata iom chiangin, Saptuam kipumkhatna hon tun hi. “Huan, hiai kipumkhatna pen Pathian thil gel ahihdan ahon hilh hi.
Huaiziakin, noute sapa na omna uhtoh kikhawma om dingin kei Toupa a henta in kahon ngen hi. Kingaih niamna leh migitna tengteng, thuaktheihna toh, itna a kithuakzou zaw chiat a, lemna a KHA a kipumkhatna vom chinten dingin, ahon sapna pen lametna munkhata sap nahih mah- bang un pumpi khat leh Kha khat kia a oma, Toupa khat, Ginna khat leh Baptisma khat bangkim Pathian leh Pa khatkia a oma, amah tuh bangkim tungah a oma, bangkim a musuaka, bangkim sung ah aom hi” (Eph. 4:1-6) chi hi.
Aaaa saulaw man aka maw… I tuppentak zaw… Tribal Unity omtheih louh topin le ei lam (saptuamte) bek kipumkhat in omle deihhuai mahmah ahih man in…atawpna lam ah…I thulu bang taisan khak dek in om ve aw…

_..hitheile eilam bek midangte tengteng toh kituak in omthei chiatta le maw .. Vualzawlna lamkhat bek hon hihtheihna dingin Pathian saptuamte ihi ua_..
_________________________________________________________________________9
Hiai Article gelhtu Mr.Ginlun Valte ReACH: Gospel Writing Ministry kichi co-founder ahi. Hiai Ministry in thugelh tungtawn a khalam taksapte muh ding, khat-le-khat thutak a ki hantoh tuah ding lunggulh pen in nei hi.

How useful was this post?

Click on a star to rate it!

Average rating 0 / 5. Vote count: 0

No votes so far! Be the first to rate this post.

Admin: Get in lamka

Get In Lamka - Digital Marketing & Information Services, Shopping site Lamka, Churachandpur, Manipur, Shop online at getinlamka.com, Read Daily news of CCpur.

Leave a Reply