Featured Video Play Icon

Tui kiting jouse jap thei ahipoi(with special focus of Khuga Dam).

0
(0)

Tui kiting jouse jap thei ahipoi(with special focus of Khuga Dam).

Khuga Dam or Tuitha vadung hi Ccpur mite din thina lhankhuh khat asoh tan ahi. Hiche bep chu hilouvin Ccpur tilou gampam mi ahung thi jong tamtah apha tan ahi. Ithi cheng ule Thilha-Sangah i-ngoh uvin, thilha-sangah honjong Pathen semsa manlutah mihem hinkho hi hiti lom2 in lauvin tin kichepnan anei nadiu vem tihi ngaito khamset ahi. Eiho jong water safety langpang a hi kiven dan lhasam val kha joh ihiu ham tihi ngaito phat ahitai. Kenjong kahe bulhing dehpon hinla internet a dungphet vaiphet katho in ahile thil ijat hamkhat kahetdoh thah aumin ina vetkhom diu kanom in ahi.

Dam tui or tui kiting (reservoirs) or vadung jap(swim) jeh a thi kiti hi thil thah ahipon, eiho gam bou ahipon leiset gam chom2 adeh a mihem khantou behlou nagam ah mi hathi napen khat ahin ahi. Thilha-sangah ahiloule athiphat hita a ahi ti Theory bouseh a compromise ibol jing ule mihem asang aja ihung thi be jing nahlai diu ahi. Anoiya hin point ijat hamkhat anaveu hite:

1). Tui kiting den(reservoirs/dam) kiti jouse jap dinga fit ahipoi. Tui chatlou a kiveiden, akisutheng lou ho ahin hampa-louhing phalou, Blue Green Algae, bacteria phalou cynobacteria le adang2 kitiho tui noiya akeh ji tauvin, mihem tahsa dinga phalou thil tamtah tui lah achun aum jitan ahi. Tui jap laitah a gah don khah ding kichat aumkeu hilouvin, tahsa agah kide khah mai2 dijong kichat um tui asohdoh jin ahi. Nangma mitvet avang ima namulou ding, tui jongchu thengset a namu maithei ahi. Adeh a nisat lai, summer laile algae kitiho apah jin kichat aum dehset in ahi. Hiche poison hohin tui lah a naum lai jeng ajong na tahsa asuh mot(numb) theiya, natha lhasam a chat but talou a nathi thei ahi. Khuga Dam dehset hi thing le go, hampa louhing mot(decay) kide na chuleh atui sunga jong hampa phalou tamtah keh ahin, kichat umtah ahi. Mi damthei tah nahi loule kivengpha in.

2). Temperature Difference in water: Tui najap tengle nalu bou achunga kilap ahin kichat umtah ahi. Twi khu nisa in iti akho jongle half-metre kalval a thuh lum doh joulou ahi. Khutile achung lah neucha bou lum intin anoi langse dap nalai thou2 ahin, adeh a tui thuh dan kitolou namunna chun tui chung le anoi temperature difference alen in ahi. Naki jap tengle nalu langchu alum(warm) lah a um ding, nadip lah apat anoilang se chu adap lah a kide ahin, hiche hin Hypothermia kiti aso dohsah jin, khut le keng hung mo(numb) intin nacha butlou ding tui sung mama achu heart attack jong nanei theiya tuito langa thihtum banga nalhah lut ding ahitai.Hiche natokhah le tuijap themlheh jongle chun akichai nahi jenge. Mi damthei tah nahi lou vang2 leh kichat um dehset in ahi.

3). Khopi toh kinai, Lou toh kinai vadung ho a hi kijap louhel ding ahi. Khopi sunga nen jouse lonlut na, kide na, lou kibol na a Lou(fertilizers, pesticide, etc) phalou jouse longlut ahin, atamjo longmang tajongle thilnen le chemical phalou tamtah tuinoiya umden jong umkit ahin, tui chung le anoi sat dan kitohlou in abelap kitle, mihem in hiche tui chu ajap a tahsa akide tengle natna seithei lou tamtah asodoh theijin, tuilah a umlai jeng ajong problem ajat2 semdoh thei ahi kit e.

4). Vadunga twili(waterpool) hokhu achunga twi umdan toh anoilang khu kibanglou ahi. Anoiya khun tui current hattah ana um nomjin, hiche khun nalah khahle natha jouse bei intin tui noiya napeilut ding ahitai.

Seithei dang tamtah umjongle point 4 hohi apoimo deu cheh ahiuvin ahi.

Tui jouse japthei ahipoi tihi het aphapen ahijeng e. Gam khangtou lah achun tui a kija thei namun le kija theilou namun Govt in phaten avetoh in, signboard kitah jong imu khah ji diu ahin, koiman tui jouse ajap pon ahi. Eiho hin tui kiti phot jap thei jeng dia igel pauhi igel khel mamau khat ahi. Khuga Dam dehset hi ipi angle a ivet jongle jap jengdin a safe hih beh in ahi. Mihem jap dia pha ham phalou ham ima awareness kinei louva tui kajapthei ye ti manna tui jouse ipheng jap jiule, itomo niu aum kha jitan, Thilha-sangah or athiphat hija ahi ti Theory a compromise ibol2 jeng pauhi dihlou ahi. Mihem jap thei dinga kisem Swimming Pool ho jengjong safety nadia asem dingdan, avetkol dingdan um sohkei ahiye.

Mihem hindan kibanglou, thisan chedan kibanglou, damthei dan kibanglou ahin, mijouse vang tohkhel ponte, vangset thu tidi ham phatle khat vei2 le khat chunga tokhelna ahungsoh jin ahi. Tua jonghi District Administration in water safety hi agel khoh a hatah a aboipi louva, awareness langpang hi ilhahsam jing nalai ule Khuga Dam leh Tuitha a thi hi achaina hunghi loulai ding, mi tamtah in ahinkho ahin chan be nalai ding ahiye. Mihem thanop napen le kihuilha nom napen hi tuipang ahijin, hiche awareness pa hi gelkhoh angai lheh in ahi.

Tuijap hi aphapoi ti ahipon, ijap ding jongle vadung le tui kiting hohi jap nathei leh jap natheilou vetoh jep utin, chingthei jep leuhen tuiya tokhel pahi themkhat iki vendoh theidiu ham tihi kaseinom ahi. Ahithei chan invang Swimming Pool kisem inei hou bou ahin kijap leuhen safe pen inte.

(Khuga Dam le Tuitha vadung a sopi ngaicheng tamtah in hinkho alha tahjeh a pohnat jeh a hung kisun ahin, suhdih be ding ihet ujongle suhdih thei hinte, kakipah e).

How useful was this post?

Click on a star to rate it!

Average rating 0 / 5. Vote count: 0

No votes so far! Be the first to rate this post.

Admin: Get in lamka

Get In Lamka - Digital Marketing & Information Services, Shopping site Lamka, Churachandpur, Manipur, Shop online at getinlamka.com, Read Daily news of CCpur.

Leave a Reply