ZALOU NA HIAM TOUPA – Rev. H. Thiankhanmuan

ZALOU NA HIAM TOUPA – Rev. H. Thiankhanmuan

4
(5)

29th March 2020 | Get in Lamka

ZALOU NA HIAM TOUPA
– Rev. H. Thiankhanmuan

Toupa hoihna tellou hileh, khovel siatna tuipi in hon tummang khin ding hi. Toupa hoihna ka hinkhua a omlou hileh, tuni chiang in ni suak muh ka kilamenkei ahi. Toupa hoih hi, Toupa lian hi.

Job mangbat laitak in a kahna aw Toupa’n zalou ahi diam? Kumpi Saul in, David thah dia a delh lai in Toupa’n David taisan a, a lungkhamna leh mangbatnate phawkpihlou ahi diam? Alexandria Plague (3rd CE) ziak a mihing 25 million val sihna tuakte, Black Death/ Great Bubonic Plague (14th CE) ziak a 200 million sihna tuakte, West Africa a Ebola (2014-16) natna ziak a mi 11000 val ana mualliamte leh Covid-19 (2019-till date) ziak a si leh hiai natna ziak a gentheitak a omlelte Toupa’n taisan ahi di maw? Modi in ni 21 *“StayHome”* thusuah a hon bawlkhum ziak a nek ding kisam a ta itte thumna huihkhua a mangthang mai ahi diam, *“Zalou na hiam Toupa?”*

Sam 13 ah David in haksatna a tuah hun a Toupa a sapna, leh Toupa a lungmuanna a ngahdan a kimu ahi. Toupa dawnna ngak in, _”bang tan ahia?”_ chih 4vei mawngmawng a dong thakthak hi. Toupa lungsim bang pu chih a theih David in leng a mangbat hun in Toupa’ aw zalou hileh kilawm in ana om hi. I tulel haksatna uh ziak a Pathian bilngong bangmai a ngaihtuah kha i om hia? Lamet dawnna muhlouh ziak a lungkia a, melmapa vualzousak mai ding na hi diam, sanggam! Huai bang hun in leng David in tuh, ka melma ka tung ah vualzou a kisa ding, Toupa hon panpih in chi in a Toupa muanna toh _“na zahngaihna ka muang ahi”_ chi in buan hi. Hiai ah Pathian lalpen hihna pomlou leh a thilhihtheihna gingtalou mite vualzoutaka a om ding uh David in haksa a sak mahmah ahi. Huaiziak in, na *“zahngaihna”* tungnung ahihdan hon lak in a chi ahi. Huchi in, hiai bang haksatna apan na hon hotdam ziak in kipak in nang ka hon pahtawi ding a chita ahi.

Covid-19 ziak in kuateng in maban ah bang tuaktou lai ding ihia chih i theikei. Himahleh, Toupa thilhihtheihna tuh hiai natna hi _(virus)_ sang a thupizaw ahi, hatzaw leh panpih ding a kinzaw ahi chih mangngilh kei ni. Toupa thu ah dingkip peuh le hang, leitung haksatnate’n Pathian pahtawi ding hon bahsaklou ding ahi. Amah muangngam ni. Aman i thumnate uh za in, panpih ding in a khut eilam ah hon zak gige ahi chih phawk ni (Cf. Isa. 59:1).

How useful was this post?

Click on a star to rate it!

Average rating 4 / 5. Vote count: 5

No votes so far! Be the first to rate this post.

Admin: Get in lamka

Get In Lamka - Digital Marketing & Information Services, Shopping site Lamka, Churachandpur, Manipur, Shop online at getinlamka.com, Read Daily news of CCpur.

Leave a Reply