SA MU IHITAU.
———————
Ei un I dawi uh leh I ma maw uh thil tam tak aum hi. Zia te chu mu thei ahi na ding in I khua leh I gam aten Meithal chawi a gim leh chawl khawk sa lo ah gen thei thuak pum pum a sum le pai tam tak seng a chule hin na lul tak lan dawk ngam hial a kipe dawk zing a um le ila um tau hi.
A le tu hin vangphat um tak in I dawi le tup teu chu Pathian in avek pin ei pe ziang lo male amite ka aw Lalpan angai tha hi tan a, tuhin ei uh a ding a apawi maw pen neithei ta ding in Lampi ei siam ta ahi. Ahi Zia tiang itun nadiu ahin, genthei na leh haksat na te ala tuak um ta mak leu hin lemguat tu ei ma pui na ahi tia I pawm maidiu hun chu ahi tai.
Sak lam thang lam ki gawm masak a pawi pen leh ma maw pen gual a gel le I um diu ka tak sang hi. Zia chu I pawi maw pen uh hile I Pathian un ei pian, ei um khawm sak masa ding ahi. Tu hin Pathian in I pawi maw uh ahet ziak in Separate Administration (S.A) ei piak ma sak ahi tai. Ama ei pui tu pui dan leh dawi dan hi gel in zui in het thiam gua hitiu.
Tuhin ut in ut lo leu hin agal kai ihi tau. Israel chate khan kanaan gam a zawt lai un tha lek gam ah ahung gil kial phat un Aigupta a anek le dawn teu ahun du cha kit thei ui. Tu hin le tha lek gam a um ihi zing ua, nek le chak ding lung kham a ginglo tute sabel du cha I nung thil kit khak uh chun lei kaw hawm in ei val zo in tin, gam tiam gam , kanaan gam chu tung zolo in um khai tiu. Ahin la Pathian a ding a ginum tak a um te kha gamtiam gam, Kanaan gam chu Pathian in apui tung tho kha lam, tu hin le gil pi ding ngai tua na ziak in nung kik ding hi umlo thei lo ding ihiu. Maleh Pathian Jesu Christa ei mapui tu, sumpi lam en zing in kal suan hitiu. Vamin te mana te Lalpan ei pe ding ahi.
Zia tiang I tun tak ua ahi chun, Lalpan kanaan gam chu ei tut ding ahi ziak in I bawl ding uh chu melma dou ding ahi pua melma lak a ei ko dawk tu i Pathian uh Jesu Christa chu I hiatmil lo diu chule ama kiang a ki Pak thu te igen diu ahi tai. Ahi mite gam achun Lalpa bang tin lapak na late ka sak thei ding uh iti lai hun teu kha hemil puai tiu.
Inkuan a chun, Pasal in zi anei chun, inchuan sak in, ama leh ama din ki sin ding in nu leh pa chun ala dawm kang sek hi. Zia gual a chun,tuhin mani le mani I keng ua I din thei na ding ua chun I nei sun sun teu iki hawp tua ua, iki sawm dawl tua diu ahi.Mani leh mani I keng a din ding hun a mi keng a din gua , mani ading ngai tua peilo, mi a buai pi bep bep a hinkhua I mat khak uh chun, gamtiam gam Kanaan gam tungzolo te lak a pang kit tho tho ding ihiu. Ahin la mani keng aki din zo, ma ei pui tu Pathian lam nga zing mite vang chu suk ling gual lo in gam tiam gam chu a la lut tho tho ding uh ahi.
~ John Lamka
01.01.2024
