KUATE HI MALZIN- REFUGEE DIK TAK AHI DIAM
– KL Muana Khaute
Bible leh history hi et-le kuama munkhat a damsung ah chengden kumkhua a um puai. Adam leh Eve-te nupan khale Eden huan apat in Siamtu lunglo lam a bawl ziak un nawdaw in a um ua, gam tin in a cheng tawl tawl ui. Zia gual achun Abraham-te leh mi zosia hi nek leh chak hawlna ziak in, mun tin in a cheng vel vel ui. Amau beplo, midangte le Pathian in a sawl ziak ahem, thildang ziak ahem in, muntin in a pem vel vel ui. Zia bep hilo in, nam tinte le gapha hawi zaw leh lemchang zaw dawi ziak in nek leh chak umna lam lam in a pem vel vel ui. Rome-te leh English-te khawvel mun tin ah a thunei nawp ziak un khawvel mun tin in a kichawn vel vel ua, hinla nam tinte le khawvel mun tin in a pem vel ui. Amabo, gam tin a nei phat un refugee ti kampau a hung piang dawk hi.
Anai pen a Burma, Bangladesh leh India hi mipite hillo leh hiatlo in Bristh te’n a gamlua sateu nutsia a ngaitak ziak in mipi dawtna neilo in a nawpdan dan ua ei khenpiak ui. Tuhin, gam tam tak a I ki-unaulo-te gam khat in ei khenpiak ua, tuhin muntin a gam chiat uh lua nuam in kiphinna a nei tau a, buaina leh kinakna ngen in a dim ta ahi. Adiak in North East gam chi leh kuang kibanglo, sakhua ginna kibanglo ngen ei khum khawm ua, kituakna kilungsiatna umlo in ningtin buaina a um pantai. Government leh mipite buai in kilemna leh muanna umlo in ningtin kibuaina ahung um ta, ki-inchuanna a um kinlo leh mihiam in I dawilo gal hung um pai ding in ei ngak ta ahi. Etsakna di’n, Assam Govt. a pilvang ah Bodoland, Kabi Anglong NC hills leh a dang a siam ah chamna le muanna tut in Assam gam vaihawmna nuai a um zing kawm in a chanvo uh a kimu chiat ua, lemna leh muanna a um thei ham ham ahi.
Zia gual dinmun a umlai in, Manipur a kithepna HAC- ADC a min in a siampiu a thuneina neilo, a nawp phat uh leh election a um sak ua, thunei leh a gam leh gua chung ah thaneina him him umlo in a kawi ua, district chanvo ding mawng mawg la phaigam a kimang zo ta, a themnem mai a kikauthak mai chu I nuam ta puau, kiphinna nei ahin, a gam ah majority te chu nam neu zawte chanvo pelo in nuaisia tak a ei kawi ziak un TC/6th schedule I dawn a, zia chu phallo in suanlam chuam pansan in ei nang tau ahi. Zia tribal-te right hi ei piak masang siau thi leh nai sua ah pan I lak tei tei diu ahi. Zia I right uh hi migratory bird gual a um theite I hi puau. Manipur gam a um masang inle Hausa thunuai a kivaihawmte I hiu a, Meitei-te tawh u leh nau gual a kum za tel cheng khawm I hitau a, Manipur a chanvo nei ding namte chu I hiu.
Achang leh refugee a tiu a, amau le Cachar, Bangladesh leh myanmar kum sawtpi tak a pem zel ua, achang leh a hunglut zel ui. Ahina tak ah gen ding achun Meite hi Bangladesh, Thailand, Muslim- Bangladeshi mi leh Assemese a tam ma ma ui. Adiak ah a thiamputeu leh a Bamonteu hi Meitei dik tak ahi puau, sakhua ziak a Meitei ti a minlo mai ahiu.
Chun, ei mite le Arakan, Burma leh Mizoram a pat hun pemlut le a um tho ui. AhinIa, a chung ah I gen gual akhan gam buaiziak a Assam, Bangladesh leh Burma apat hunglut le um tho hi. I hiat taksa gual in, Tripura gam chu Tripuri Tribal-te gam ahi. Himaleh, Bangladesh apat hungzam lutte ziak in Tripura gam neitute’n le a gam uh vai ahawm zo talo uh ahi. Chuti ahileh, khawvel hi mihiam zosia hi unau khat ngen I hiu a, I gam leh gua khawvel hi Pathian in mihiamte lua ding ah kiningting tak a siam ahin, I neikhawm ua lim leh kipak tak ah chengna ding a ei siampiak a, bangtik lai inle mun awng um zing di ahiziak in, lungawi in kipak tak in khawvel hi siamtu’n a siam gual ah, lungtuak tak ah kicheng khawm le’n Pathian lopina himailo ding ahem ti hi ka ngaidan ahi.
