NUNGAH GOLLAN LAIYA DONGMA NEI KITI HI ALOU THEI LOU HAM ?
[In a lighter vein].
Anei tam ahivang a aneilou jong um lou ahipon ahi.
Asun:
N Lhungdim,
Thangting House,
Molnom West
27th August 2020.
Nungah Gollang ho hahsatna tamtah hi Khat leh khat kidei kingai leh Sex chung chang hi ahipen in ah.
Sex kiti chu ipi ham itileh kidei kingaijeh tahsa leh tahsa kitimatna sangtah leh thuhrah nei a seisetna thei a um tina ahi.
Houbung lamkai leh Pastor ho muding leh hetding a deiumlou a um ding hi kichih theiding hi akhohpen ahi.
Nungah leh Golhang chan hin phah a mihem ngaina ah Dongma neithei a hung um chu Pathen phatthei bohna ahin ahi ahinla Nungah Gollhang laiya KINGAINA boipi kiti hi alou thei lou ahideh pon ahi.
Keima hinkho a kanungvet leh Gollhan til til Nungah vetnom kipat laikhu kahung hi chun Mijah chase [Shy and intovert] kahijeh in phongtah in Nungah deichat chu ka bol
ngam hih in guhthim in nungah khat toh kingai tobang in ka um lhon in hiche kihoumatna jong umlou kivopna jong um lou kakimu to lhon leh kamit lhon keo keo kiveto kidei kingai jat khat koima chan abolngailou khat kana neiyin ahi. Hesoh um tah hahsat khat ahi.Hiche tobang hi hoimadang ah jong um ponte.
Ahinla thilphachomlou kidei leh kingai ahibouin ahi.
Hiche phat tiding ham TeeAge phat chu ahung kichaiyin class X Exam kahung pass masang Matric kasim lai 1959 chun Manipuri Text book chu Dr Kamal Singh Romantic Novel MADHABI ,iti ahin phatah kasim leh Nungah Gollhang kidei leh kingai dan hi ahahdan leh boi a umhan hiche leiset Dongma nei Hinkho a mihem aum leh leiset chombeh a um ahitan atah tah leiset Real Life ho toh hin kitoh theilou behseh tolou tobang ahi, hiche Novel minthang tah kasim jou in Dongma nei ding jong chu ichan hamkhat in kangap hih [meisan ] in aneilou tobang in kana umtoupeh in ahi.Kei hi ka bol bol khat lunglut tah a bol ho kahi jeh in Nungah bou chu kiboi pi intin imacha kana hi doh ding katahsang pon ahi. Kagin pen chu nungah khat toh kidei pan leh kinga theilouding kahinkho a kana tup pen B A kichai lou in kimah thah den inte kati jeh ahipen in ahi. BA kichai hihkhat in te kati jeh a Tolphei Govt M E School a Headmaster a ka u Tongvom thi jou a ka pan jong 1963 kum a kanu leh pajong hetsah lou a kana Resign ahi kidong leh anop lhonding katah sanpoi, lha tolop Rs 165 kana san chu nahi thim hai ahi.1963 a Rs 165 chu tulaiya Rs 16,000 sang in aman tamna laiyinte, Hotel a 50 paise chulaiya Makhai a Bu vateh a kine thei na lai ahi.
Eiman guhthim aideichat thim nungah jong umlou hilou chuleh Nungah eihin deicha thim ho jong kihe a um lou hikit lou hitichu College a kum 4 kahung kai in ajo na in 1964 May lha in
B A Exam kahinchai in nungah helding kadei pen in eideiya kichen piding anop leh kichen ding katia kahung kipat ahi.Kageldan chu nungah jouse moh deichat a moh hel hellouding ideichat a ihel toh chu kichen tei tei ding ti kana gel ahi.Ajehchu lungle tha luta nungah khat hel a a hithei lou leh khat a athah kipatkitding chu kangaplou ahin ahi, kahung kipat leh Nungah hel jong bai louhel kidei jong bai kilou kakipat a pat kum 2 leh akeh jou in nahchangsal in ji kahin nei nah nah in ahi.Ahahdan . Hahsa kasahnapen chu kapa chu Pathen thu a Pioner missionary 1937 laiya ana kipan anahi a kanu leh kapa jeng jong First generation Christian anahiovin First generation Pastor Thangchhingpuia kiti khat in 1929 laiya chu Houbung Pathen dan theng a ana kichen lhon leh kei achapa lhon kajiding kaki jam pi ding ham chu kadet theilou miho vetding leh khonung a ka Christian hinkho a jong Blot khat umding ahi kai jeh ahi.Achutilou leh anop nop a kiguh leh kijam a jinei chu thil hahsa ahipon ahi .
Christian Church Marriage kangaikhoh jeh ahipen in ahi.
Chuti louleh1965 a kana neiding ahtan Christian Church Marriage ding jeh a 1967 February 22 a kahin neidoh bep ahi. Houbung Christian dan dung jui a jinei hi thilhahsatah but worthwhile attempt and achievement jong ahi kit in ahi. Hiche hin khonung a ka Christian Hinkho nasatah in eipui hoi in Houbung Upa Ordination kahung hinading a jong polama vetdin nolna bei tobang kahung hithei in ahi .Houbung kiloi khomna kimkhat hon a jineina Houbung dan lou a kicheng ho hi Upa ngapdet ana bol pou vin ahi. Mizoram Presbyterian Church hon tuni chan in a jui un eiho lang a KCA/ ECA Houbung hon jong ana chepi khat ahin tuhin ahin relaxed uvin Houbung dan lou a jinei tamtah Houbung Upa ahung hitan ahi.Pathen natohnading a Dan a kikan behseh chu phahihjong leh Houbung Upa hileh Pastor ding hileh Houbung Dan a jinei ho bou in Pathen Houbung Theng a poh kala pha chu um pon te. Ka hinkho a kakisih lou beh ka thulhuh na khat ahi . Ajehchu hinkho sung a hin thulhuh na Decision kimkhat hi inung vet leh kisihna thei tampi ana kibol jing a umdapon ahi.
Nungah khat ahilou leh Gollhang khat ahung kimutoa ahung kingai leh ahung kidei dei leh Kahinkho a kakikitepna ahilou leh nang nanop louleh leiset a kahin nom poi tiho hi aseinom juiuvin hiche ho jong hi atah tah hilou kijoulhepna thucheng tobang ahi bou in ahi.
Kahinkho ah kahinmu leh kahin het ho hi adihlou lah a um pon tin adeh in tulaiyin Nungah hileh Gollhang hileh khat keokeo toh kingaya kidei a kicheng hi ajong um ding in katahsang ta pon ahi.
Dongma 3 leh 4 nei ngen tobang khat ahitheilou leh khat titobang ngen ahi bou in ahi. Tulai hin Spare koi lou um jong um ponte.
Ahi leh Nungah khat leh Gollhang khat chu kidei to kingai to umlou theilou tobang ahin ahi hiche Fact hi pomtao te. Ahinla kidei leh kingai vang a tahsa kitoh khah to a um hi ahithei leh bolou ding nabollou ujong leh Non Sexual hiding Sexual contact chu bol louhelding ahi.
Masang chu Nungah leh Gollhang kidei leh kingai anu leh paten jong chu tia kikam a jahda ding jong hilou ho ahung kigai jui u hi kadetmo keiyin hiche datmo behsehding ahipon ahi ajehchu Nungah khat leh Gollhang khat kingai um khomjing a kitimatna chu hahsa lou hel a Nungah nu naovop sahchu bai lam tah ahi, hiche kitimatna Sex man chu English Sex kiti chu ahi. Nungah theng kitichu a Nungah laiya Pasal toh Sex anamang khalou ho chu kisei na ahi. A LIMIT khat umsah ahilou leh hiche tobang minsetna chu bailam tah ahi, adeh a Nungah chu khatvei aminset leh a market value chu khedel ahi. Pasal chu aha khoh pon ahinla ahalhohpoi tia Gollhang a gollhan laiya Sex a minse ho chu nungah thengtah ho chun adei deh lou hel u ahi kit in ahi. Pasal ho hi Double Standard a nei jui un Nungah chu theng ding ahivang a ama ho chu Virgin gollhang hi nom kit lou u ahi, Gollhan laiya a Pathen thu seiya jong kipe Nungah jong Pathen mitah ham kiti ho ahung kigai leh amahoding a jong hoilou milham adang ho ding a Pathen thu kisei ATHENG Christian dih tah leh hoitah chu miho vet a Atheng leh ahoi hiteiding ahi. Hiti ho hung um jui hin Pathen thu lhahsamna lentah hung um thei ahi.
Tulaya Nungah Gollhang hon hiche nu hiche pa khu ka Ex anahi tiho hi Nungah Gollhang hon MULTIPLE DONGMA ana nei jeh u ahi pen in ahi.
Vangphat tiding ham vangset tiding in ken vang koima Ex tiding kaneo pon ahi. Guhthim a kadeichat ho chu ahingal lou leh DM College a kakailai in Meilhei nungah hoitah leh vetnom umtah tah ana um in Guhthim a kanavetnom jui khat chu Principal NandaBabu Sinha kitikavet da kei pa chanu Latika kiti khat aum in guhthim in kaloi khat toh kathim vet jui lhon in ahi, aman jong heponte hiche chu ka Ex ahi ngal lou leh Meilhei nungah tamtah aumvang in thinglhang mi ho chun akideijong ana umpon akicheng jing khatcha ana um pon ahi. Ahehchu Meilhei toh kichen ding kiti chu kidat thei lou hel ahi.
Bollywood a Film actress nungah akhuti hoivang uva a kidei cha lou hel ahi masang laiyin Kuki gollhang khat in Actress Viyantimala chu anadeichan aboi lheh ti khat kana jakhan ahi.Eihin deilouahi ding Nungah deichat kiti hi Gollhang kim khat in ana bol jui in bolloubehding thil ahi.
https:www.thusimbu.com /category n- lhungdim /
