MOSI-ISRAEL LEH ZO-SUANTE (Exodus 17:8-16}
K. L. Muana khaute
Zo-suante hi le Israel te khawvel a thunei ten mun khat a chengkhawm thei lo in, Burma (Myanmar), Bangladesh (East Pakistan) leh Indian (Bharat) muntin in ei thezak ua, taksa leh thagau a ki ngai ma leu hing le nam lian zaw te khutnuai in sal la hilo-zallen la hilo in kum zabi bang jat ahem apat I kawltang tau a, kigawp khawp kit nuam in mipil masaten lampi ala sial ua, sian in ei phal hina pi in, eimau ki lunggual lo jiak in mi khache nen luak leh nên ikhawsa na lai ua, Gospel meivak jiak bek in Pathian thagau ma puina jiak bek a kilungtuak a zalengam chu itung diam tin hotu tamtak in kum sawm sagi val, khawvel a thunei tu state, country leh UNO kiang tiang in a gentheinau leh zalen gam khat a ki in tum suan di thu igen leh iphut lai in, eisung ki kheu tuana leh nam lian zaw te dal in I um jing ui. Himahleh it up gam chu tung ngei ngei dinga tin leh ha suang in i do ua, thi leh thau pawl a itup gam itun thei na ding a daltu phawt chuanchil a, malam sawn jel ding in iki chial ahi.
I et tawn ding in i Bible thiangtho Exodus 17-1-7 sung I et chun, Israel te Aiguptate te sal atang te chu Pathian in Kanaan gam khuaizu leh sanatui luanna (Ngunkhamtual) lua ding in Hotu Mosi atel ta, zia gamthip apat chun ami Israel mipi te a pui dawk ta, zia jin khawng a, tui leh nek taksap na a hung um ta, tichun mipi te chu kiphin leh a nutsia sau gam lunglen pawl le aum ui, himahleh puitu pa Mosi chu Pathian thupiak leh agin na chu thatham lo in azin kawng uh chu haksa ma ma leh le lungthuai lo in Pathian a gin na tawh a mipite chu a pui tûn tûn hi, aginna jiak in adawn diu tui, mana, vamin sate le a hun hun in Pathian thil hi theina mang a mipi te Aigupta apat a pui a, gim leh chawl bep hilo, nek leh chak, sil leh chen tiang in haksatna a tuak ui. Zia bep chu hilo in sa leh gal hat tak do ding atam ua, zia te chu zaw na ding a chun ei mimal, insung, nam ki thutuak angai ban in Pathian mapuina a pawimaw ma ma ahi.
Pathian in ngaituana chîm tak a piak I hotu chuam ten Bupal (Bawkcha) ki pan chak na ding Manipur state sunga demand (chavo) kibang ki hawm dial dial dinga dawtna ahun nei ua, himahleh, state govt. in a naksak lo bep hilo awl awl a zosuante te gam lak piak di leh Dan dik lo tak a thachimit a guat jiak un UPF leh KNO group in sepai tungtawn in Indian union tawh SoO chu 2005 kum in India capital, Delhi a kinop tuana suai a hun kai tau a, ihat anuam deu ah agreement piting zawsem inei thei na ding tripartite talk Manipur govt taw 2008 in a piting zawsem political inei let thei diak na ding kihethiamna ihung nei ua, designated camp mun tampi ihung nei ua, tichun talk I hun nei to a, lam etna lian tak I nei nung in nam lian zaw te leh state govt in lauthawngna hung in suanlam Dan dik lo tak pan San in galpi ahung puang tau ahi. Zia buaina nam leh nam buai na hi leh chu sukmit thei pai ding a amabo, nam lian zaw te tawh govt hung pang khawm ahi tak jiak in tualgal ti maimai thei ahi tapuan Adolf hitler(Nazi) gal Israel mipi deldaw leh thachimit guatna ahi tak jiak in bang chan dai ding, bangtik leh gal veng di ahem, kuan Zia galpi hi su tawp ding ahem ti hi gen ahaksa ta mama ta ahi. Khawvel siamtu pa lo chun lemna leh ki inchuan na a bawl thei di chu ngaitua kham a ting hi.
Zia gual din mun a um chu ihi tau a, i Bible Exodus 17:8-16 a imu gual a Mosi leh Joshua khut Pathian in a thutep gual a, thil hi theina a hun mat lo chun Zo suan te hi a thafang in a buai thim tau ahi. Khaile, ei lak a ginna Mosi leh Joshua gual itam tau a hotute thupiak zawm in, hangsan tak insem in igal uh hi Pathian thil hi theina ah do leu hin ginna zek tan lo te hi nuai sia ngei ngei di ihiu. Mosi, Aron leh Hur chu mi hun tel dawk in la, pui unla Amalekte chu va do in la zing leh Pathian mol hi choi in, mualvum chunga ala ding ka hi atia, Mosi gen gual achun Mosi, Aron leh Hur chu mualvum chunga dakdok ua Amalekte chu ado taua, Mosia a ban a jak lai sia chu Israelte a zo ua, aban akiak phat leh Amahlekten azo ngen sek ui. Mosi ban chu ahungkhamta, tichun suan alau a a kichutsak ua, Aron in mosi khut alangkhat gel in a dop piak ua, nitum tiang in aban chu a dop piak ua akhut chu a zak thei ta, tichun Joshuan Amaleh leh amipite chu athat zo tai tichun Lalpan jia hetjing na ding a chun lekhabu khat jik inka, Joshua hiat ding in genkit in Amalek te chu vannuai apat nuai mang ding ka hi atia tichun Mosi’n maicham a siam a amin chu Jehova Nisi, Amachun Lalpa puanlap chu khaisang un Lalpa’n akhang khang Amalek te chu do jing di ahi ati.
Zia gual bok a chun ei Zo suan te ut thu hi lo in, Pathian in do ding a meitei gal huipi ahun nunsak a, Hotute hatlo na leh basapna panpi itin, galkap te le anung thup un ahuan pang itin, nek leh chak hawl te le hawlpi itin Sum leh pai thaw te le kithuapi itin, Pathian kianga pauchapte te le han thawn itin, inmun lo mun ana semte le l malzawl na dawt piak itin isep na josia Lalpa hepina puan a kituam tua chiat a, kawng bangkim a kithuak leh Lalpa ei ma pui Dan jel a imelmau do chiat leu hing gual zona bep hilo in Pathian chawihawina leh malzawlna chang ding ihiu Lalpa thupiak guala thitianga ginumna galzawna maicham Lalpa’n kiang a bawl piak ngei ding ihi. Hallelujah Amen.
